Ku Philippines, Jonathan wakalindiliranga kukumana na dokotala. Pakuwona umo wakavwalira makora, mama uyo wakagwiranga ntchito pa malo ghakufikira ŵalendo wakamufumba usange wafuma ku kampani ya insuransi. Jonathan wakalongosora kuti ni Kaboni wa Yehova ndipo wakapukwa kovwira Kaboni munyake mulwari uyo  wakakhumbikwiranga wovwiri. Wakati wapulika nthena, mama uyu zina lake Laila, wakaphalira Jonathan kuti adada ŵake, awo ŵakaŵa kuti ŵafwa waka, ŵakatemwanga chomene kuŵazga Gongwe la Mulinda. Jonathan wakamupembuzga mama uyu na fundo ya pa Yohane 5:28, 29, ndipo wakamupa thirakiti lakuti Kasi Pali Chilindizga Wuli kwa Ŵakutemweka Awo Ŵali Kufwa?

Pa maulendo ghakulondezgapo, mubali uyu wakamupanga mabuku ghanyake Laila. Pamanyuma wakatumako mudumbu munyake ndipo wakamba kusambira nayo Baibolo. Nyengo  yichoko waka, mfumu wake kweniso munung’una na amama ŵa Laila, awo wakakhalanga nawo, ŵakamba kusambira.

Rose, mzengezgani wa Laila, wakiza kwa Laila na kumufumba chifukwa icho ŵanthu ŵanandi ŵakiziranga pa nyumba yake. Laila wakalongosora kuti wakusambira Baibolo na Ŵakaboni ŵa Yehova. Ivi vikapangiska kuti Rose nayo wambe kusambira Baibolo. Rose wakati waluta kwa munung’una wake kukaya kwawo, wakamuphalirako ivyo wakasambiranga. Munung’una wake, zina lake Abigail, wakati wapulika vinthu ivi wakakhumba kumanya vinandi, ntheura wakapempha kuti wasambirenge Baibolo. Anyina ŵa Rose nawo ŵakazomera kusambira Baibolo.

Laila wali kubatizika pa ungano wa chigaŵa sonosono apa. Amama ŵake nawo sono ŵali kubatizika. Mzengezgani wake, Rose, na munung’una wake, ŵakabatizika chaka chamara. Sono anyina ŵa Rose ŵakwiza ku maungano nyengo zose. Ŵabali ŵanyake ŵa Laila ŵakulutilira kusambira Baibolo. Vyose vikachitika chifukwa cha kupharazgira munthu yumoza mu chipatala.

Ŵanthu ŵanandi ŵakumangwa sono ŵakusambira unenesko ku Sri Lanka. Mu 2015, ŵabali ŵakaŵa na maadiresi ghambura kukwana 80 gha ŵanthu ŵakumangwa, ndipo ghakalembeka waka pa tumapepara twakupambanapambana. Kwambira nyengo iyi, mpingo wakwamba wa chiyowoyero cha mawoko cha ku Sri Lanka uli kupangika. Ndipo ŵali kunozga pulogiramu ya pa kompyuta na kunjizga mazina gha ŵanthu pafupifupi 420 kweniso maadiresi ghakuŵa na manambara ghakulongora malo pa GPS. Ŵabali ŵapharazgirapo ŵanthu ŵanandi chomene mwa aŵa pamaso na pamaso, kwizira pa vidiyo kweniso kutumirana mauthenga pa foni. Mubali munyake mishonale na muwoli wake, ŵakati: “Pasono, ŵabali ŵakumangwa aŵa ŵali na chigaŵa chakupharazgako. Pambere pulogiramu  iyi yindaŵeko, ŵabali ŵakenderanga waka ŵakumangwa awo ŵakaŵamanyanga pera.”

Ŵabali ku Mongolia ŵakutangwanika na ntchito ya kupharazga mu malo gha ŵanthu ŵanandi nanga kungaŵa kuti kukuzizima chomene (-30°C). Mulara munyake wa boma wakatorapo mabuku pa shelufu yamatayala iyo ŵabali ŵakugwiliskira ntchito pakupharazga, ndipo wakalemba kalata ya kuwonga. Wakati: “Ndine Wachibuda. Kweni napenjapenja mu visopa vinandi, pakuti nkhwendera fundo yakuti tingalondezganga nthowa yimoza pera yayi kweni tipenjengeso zinyake. Nati naŵazga mabuku ghanyake agho mukupeleka ku ŵanthu, naghanaghana kuti nilembe kalata iyi kuti nimuphalirani umo nkhujipulikira. Nkhuwona kuti mukumalirapo nyengo yinandi na nkhongono kuti mulembe fundo ziwemi na zakovwira izi. Chinyake icho nasambira mu mabuku ghinu ntchakuti Baibolo ni buku ilo munthu waliyose wakwenera kuliŵazga. Mu buku ili muli unenesko. Mu Baibolo muli fundo ziwemi zakutilongozga pa umoyo. Nkhuwonga awo ŵakulimbikira kung’anamulira mabuku agha mu Chimongolia. Kweniso nkhuwonga wose awo ŵakupeleka mabuku agha kuti ŵawovwire ŵanthu, nanga kungawotcha panji kuzizima chomene.”

Ku Hong Kong, mupayiniya munyake zina lake Brett wakakumana na munyamata wa vyaka vya m’ma 20 ndipo wakamupa kathirakiti kakuti Kasi Ntchivichi Chingawovwira Kuti Mbumba Yiŵe Yakukondwa? Pakuwona kapepara aka, munyamata yura wakalira. Wakalongosora kuti ŵapapi ŵake ŵakaŵa mu unenesko, kweni iyo wakati wafika vyaka 16, wakachimbira pa nyumba. Vyaka vinkhondi vyakulondezgapo wakakhalanga waka mu misewu, ndipo wakamwanga minkhwala yakutimbanizga wongo. Pamanyuma, wupu unyake uwo ukovwira ŵanthu ŵakusuzgika ndiwo ukamusora na kumovwira.

 Wakayowoya kuti mulenji wa zuŵa ilo wakakumana na mubali uyu, wakalomba kuti, “Usange chisopa icho nkhaŵamo pa wanichi ntchaunenesko, munilongore chimanyikwiro muhanya uno.” Ntheura wakawona kuti Chiuta wazgora lurombo lwake. Mubali wakamutora munyamata uyu na kuya mu shopu yinyake, ndipo wakadumbirana nayo fundo za mu kabuku kakuti Welerani kwa Yehova. Pakuti munyamata uyu wakalutanga ku France mise yeneyira, ŵakapana maadiresi na foni nambara. Munyamata uyu wakatumira uthenga Brett wakuti: “Mubali wane, Yehova wazgora malurombo ghane. Nasanga holo pafupi ndipo nilutengeko pa Sabata.” Munyamata uyu wakakumana na Ŵakaboni ku France, ndipo wakamba kusambira Baibolo na kufika pa maungano.