PAKAJUMPHA pafupifupi vilimika 10 kufumira apo Fumu Nebukadinezara yikatora Ŵaisrayeli ŵa masambiro ghapacanya kuluta nawo ku Babulone. Sono awona ico cikucitika! Msumba wa Yerusalemu ukuphya na moto. Ŵaisrayeli awo ŵakaleka kukomeka ŵakatolekera ku wuzga ku Babulone.

Kumbukira kuti ici ndico nchimi za Yehova zikacenjezga kuti cicitikenge usange ŵanthu ŵakuleka kusintha macitiro ghawo ghaheni. Kweni Ŵaisrayeli ŵakapulikira yayi ivyo nchimi zikayowoya. Ŵakalutilira kusopa ŵaciuta ŵautesi m’malo mwa kusopa Yehova. Ntheura ŵanthu ŵakenera nadi kulangika. Tikumanya za ici cifukwa Ezekiyeli, nchimi ya Ciuta, yikutiphalira za vinthu viheni ivyo Ŵaisrayeli ŵakacitanga.

Kasi Ezekiyeli ukumumanya? Wakaŵa yumoza wa ŵasepuka awo Fumu Nebukadinezara yikaŵatolera ku Babulone vilimika 10 pambere kubwanganduka kukuru kwa Yerusalemu kundacitike. Daniyele na mabwezi ghake ghatatu, Shadiraki, Meshaki na Abedinego, nawoso ŵakatolekera ku Babulone pa nyengo yeneyira.

Nangauli Ezekiyeli wakaŵa mu Babulone, kweni Yehova wakumulongora vinthu viheni ivyo vikacitikanga pa tempele mu Yerusalemu. Yehova wakacita ici mwa munthondwe. Ezekiyeli wakaŵa wacali nadi mu Babulone, kweni Yehova wakamucitiska kuwona cilicose ico cikacitikanga pa tempele. Ndipo ivyo Ezekiyeli wakawona ni vyakupwetekeska comene maghanoghano!

Yehova wakaphalira Ezekiyeli kuti: ‘Wona vinthu vyaunyankasi ivyo ŵanthu ŵakucita pano pa tempele. Wona vimati vyazura na vithuzithuzi vya njoka na nyama zinyake. Ndipo wona Ŵaisrayeli ŵakuvisopa!’ Ezekiyeli wakawona vinthu vyose ivi, ndipo wakalemba ivyo vikacitikanga.

Yehova wakafumba Ezekiyeli kuti: ‘Kasi ukuwona ivyo ŵalongozgi ŵa Israyeli ŵakucita ku ubendi?’ Enya, wakawona ivyo iwo ŵakacitanga. Pakaŵa ŵanalume 70, ndipo wose ŵakasopanga ŵaciuta ŵautesi. Ŵakayowoya kuti: ‘Yehova wakutiwona yayi. Wafumamo mu caru.’

Pamanyuma pake Yehova wakalongora Ezekiyeli ŵanakazi ŵanyake awo ŵakaŵa pa cipata ca kumpoto kwa tempele. Ŵakakhala pa cipata ici kusopa Tamuzi, ciuta wautesi. Ndipo ŵanalume ŵanyake ŵakaŵa pa muryango wa tempele la Yehova! Ŵakaŵapo pafupifupi 25. Ezekiyeli wakaŵawona. Ŵakasindamilanga kuvuma na kusopa dazi!

‘Ŵanthu aŵa ŵakunicindika yayi,’ Yehova wakayowoya ntheura. ‘Ŵakucita vinthu viheni pera yayi, kweniso ŵakwiza na kucitira vinthu ivi mu tempele lane!’ Ntheura Yehova wakati: ‘Ŵawonenge nkhongono ya ukali wane. Ndipo niŵacitilenge citima yayi para ŵayamba kuparanyika.’

Pati pajumpha vilimika vitatu pera kufumira apo Yehova wakalongora Ezekiyeli vinthu ivi, Ŵaisrayeli ŵakagalukira Fumu Nebukadinezara. Antheura wakaluta kukarwa nawo nkhondo. Pamanyuma pa cilimika cimoza na myezi yinkhondi na umoza, Ŵababulone ŵakagumura viliŵa vya Yerusalemu na kocha msumba wose. Ŵanthu ŵanandi ŵakakomeka panji kutolekera ku ukayidi ku Babulone.

Nchifukwa wuli Yehova wakazomerezga kuti Ŵaisrayeli ŵaparanyike nthena? Nchifukwa cakuti ŵakatondeka kupulikira Yehova na kusunga malango ghake. Ici cikulongora kukhumbikwa kwakuti ise ticitenge ivyo Ciuta wakuyowoya nyengo zose.

Pakwamba ŵanthu ŵacoko ŵakazomerezgeka kukhala mu caru ca Israyeli. Nebukadinezara wakimika Gedaliya, Muyuda, kuŵa mulongozgi wa ŵanthu aŵa. Kweni Ŵaisrayeli ŵanyake ŵakakoma Gedaliya. Ŵanthu ŵakacita wofi kuti Ŵababulone panyake ŵizenge na kuŵaparanya wose cifukwa ca cinthu ciheni ici ico cikacitika. Cifukwa ca ici ŵakacicizga Yeremiya kuti walute nawo peneapo ŵakacimbiliranga ku Egupto.

Ici cikapangiska kuti caru ca Israyeli cikhale cambura ŵanthu. Caru cikakhala waka cambura ŵanthu kwa vilimika 70. Mukaŵavya munthu nanga njumoza. Kweni Yehova wakalayizga kuti wawezgerenge ŵanthu ŵake ku caru cawo para pajumpha vilimika 70. Kasi nchivici ico cikacitikira ŵanthu ŵa Ciuta mu caru ca Babulone uko ŵatolekera? Tiye tiwone.