Minthondwe Yinyake mu Kaperenaumu
Cipaturo 23
Minthondwe Yinyake mu Kaperenaumu
YESU wati wacema ŵasambiri ŵake ŵanayi, Petrosi, Andireya, Yakobe, na Yohane, Sabata lafika ndipo wose ŵakunjira mu sunagoge mu Kaperenaumu. Mwenemumu, Yesu wakwamba kusambizga, ndipo ŵanthu ŵakuzizikika cifukwa wakuŵasambizga nga ni munthu wamazaza, kuti nga mbalembi yayi.
Pa Sabata ili, mu sunagoge muli munthu wakukoleka na ciŵanda. Pati pajumpha kanyengo, wakucemerezga comene, wakuti: “Tili namwe na kanthu wuli, imwe Yesu Munazarete? Kasi mwiza kuzakatiparanya? Nkhumumanyani makora comene, ndimwe Mutuŵa wa Ciuta.”
Ciŵanda ico cili mwa munthu uyu njumoza wa ŵangelo ŵa Satana. Yesu wakucenya ciŵanda ici, wakuti: “Khala cete, ndipo fumamo mwa iyo!”
Sono ciŵanda ici cikumucitiska cizilisi munthu uyu ndipo wakukolomoka comene. Kweni cikufuma kwambura kumupweteka. Waliyose wakuzizikika waka. Ŵakufumba kuti: “Nchivici ici? . . . Wakulangura mwamazaza nanga ni mizimu yaukazuzi, ndipo yikumupulikira.” Nkhani ya cakucitika ici yathandazgika mu caru cose cakuzingilizga.
Pakufuma mu sunagoge, Yesu na ŵasambiri ŵake ŵakuluta ku nyumba ya Simoni panji kuti Petrosi. Kura, nyinavyara wa Petrosi ni mulwari comene, wasuzgika muthupi. Ŵakumupempha kuti: ‘Ŵawovwirani.’ Ntheura Yesu wakwiza pafupi, wakumukora pa woko, na kumuwuska. Nyengo yeneyiyo wakucira na kwamba kuŵanozgera cakurya.
Pamanyuma, dazi lati lanjira, ŵanthu kufuma kosekose ŵakwamba kwiza ku nyumba ya Petrosi na ŵalwari ŵawo. Nakalinga ŵanthu ŵa mu msumba wose ŵakuwungana pa mulyango wa nyumba. Ndipo Yesu wakucizga ŵalwari ŵawo wose, kwali ŵali na nthenda wuli. Wakufumiska na viŵanda wuwo. Peneapo viŵanda vikufuma, vikucemerezga kuti: “Ndimwe Mwana wa Ciuta.” Kweni Yesu wakuvicenya ndipo wakuvizomerezga yayi kuyowoya cifukwa cakuti vikumumanya kuti iyo ni Khristu. Mariko 1:21-34; Luka 4:31-41; Mateyu 8:14-17.
▪ Kasi nchivici ico cikucitika mu sunagoge pa Sabata, Yesu wati wacema ŵasambiri ŵake ŵanayi?
▪ Kasi Yesu wakuluta nkhu pakufuma mu sunagoge, ndipo ni munthondwe wuli uwo wakucita kwenekuko?
▪ Nchivici cikucitika pamanyuma pake mise yeneyiyi?
