Cipaturo 94

Kukhumbikwa kwa Kulomba na Kujiyuyura

PAKWAMBILIRA, apo wakaŵa mu Yudeya, Yesu wakayowoya ntharika iyo yikulongora kuti nchakuzirwa kukosera pakulomba. Sono pa ulendo wake waumaliro wa ku Yerusalemu, wakuwerezgapo kuti nchakukhumbikwa kulomba kwambura kuleka. Yesu wakwenera kuti wacali mu Samariya panji mu Galileya, apo wakuphalira ŵasambiri ŵake ntharika yakusazgirapo iyi, yakuti:

“Mu msumba unyake mukaŵa mweruzgi yunji uyo wakopanga Ciuta cara ndipo wakapwelerangako vya munthu cara. Kweni mukaŵa cokoro mu msumba wura ndipo cikalutanga kwa iyo, cikatenge, ‘Woneseskani kuti mwadumura mwaurunji pakati pa ine na uyo wali nane na mulandu.’ Sono kwa kanyengo wakakhumbanga cara kumovwira, kweni pamanyuma pake wakati mu mtima wake, ‘Nangauli nkhopa Ciuta cara panji kupwelerako vya munthu, nanga vingaŵa wuli, cifukwa cakuti cokoro ici cikunisuzga kwambura kuleka, niwoneseskenge kuti capokera urunji, mwakuti cileke kulutilira kwizaso na kunivuska comene.’”

Yesu wakulongosora ivyo ntharika iyi yikung’anamura, wakuti: “Pulikani ico mweruzgi wakayowoya, nangauli wakaŵa wambura urunji! Ipo nadi, asi Ciuta wacitiskenge urunji kucitikira ŵakusoleka ŵake awo ŵakulilira kwa iyo muhanya na usiku, nangauli ngwakukhomezga kwa iwo?”

Yesu wakung’anamura kuti Yehova Ciuta wali nga ni mweruzgi wambura urunji uyu yayi. M’malo mwake, wakung’anamura kuti usange mweruzgi wambura urunji wangapulika para ŵanthu ŵamuŵeyelera kwambura kuleka, ipo Ciuta, uyo ni murunji na muwemi, wazgorenge usange ŵanthu ŵake ŵakukosera pa kulomba. Ntheura Yesu wakulutilira kuti: “Nkhumuphalirani, [Ciuta] wacitiskenge urunji kuŵacitikira mwaluŵiro.”

Kanandi ŵanthu ŵakweruzga mwaurunji yayi milandu ya ŵanthu ŵapasi na ŵakavu, kweni ŵakutemwera ŵakumanyikwa na ŵasambazi. Ndipouli, Ciuta wazamuwoneseska kuti ŵaheni ŵalangika kweniso wazamuwoneseska kuti ŵateŵeti ŵake waŵacitira urunji mwa kuŵapa umoyo wamuyirayira. Kweni kasi mbanthu ŵalinga awo ŵakugomezga kuti Ciuta wazamuwoneseska kuti urunji wacitika mwaluŵiro?

Pakuyowoya za cipulikano ico munthu wakulongora pakumanya kuti lurombo luli na nkhongono, Yesu wakufumba kuti: “Para Mwana wa munthu wakwiza, kasi wazamusanga nadi cipulikano ici pa caru capasi?” Nangauli fumbo ili lindazgoreke, panji wakung’anamura kuti cipulikano cantheura cizamusangika bweka yayi para Khristu wakwiza mu nkhongono za Ufumu.

Pakati pa awo ŵakutegherezga kwa Yesu, pali awo ŵakujiwona kuti ŵali na cipulikano cikuru. Ŵakujigomezga kuti mbarunji, ndipo ŵakuyuyura ŵanji. Ŵasambiri ŵanji ŵa Yesu nawo ŵangaŵa mu gulu lenelili. Ntheura ŵanthu aŵa ndiwo wakuŵaphalira ntharika yakulondezgapo iyi:

“Ŵanthu ŵaŵiri ŵakakwera kuya mu tempele kukalomba, yumoza Mufarisi ndipo munyake wakusonkheska msonkho. Mufarisi yura wakimilira na kwamba kulomba vinthu ivi mu mtima wake, ‘A Ciuta, nkhumuwongani kuti nili nga mbanthu ŵanyake cara, ŵakuphanga, ŵambura urunji, ŵaleŵi, panji nga ngwakusonkheska msonkho uyu. Nkhuziŵizga kurya kaŵiri mu sabata, nkhupeleka cakhumi ca vinthu vyose ivyo nkhusanga.’”

Ŵafarisi ŵakumanyikwa na nkharo ya kujilongora pa wumba kuti mbarunji mwakuti ŵanji ŵaŵawone. Mazuŵa agho ŵali kujiŵikira kuti ŵaziŵizgenge kurya ni Mande na Cinayi, ndipo ŵakulimbikira kupeleka cakhumi nanga ncha twakumera tucokotucoko twa mu munda. Myezi yicoko waka kumasinda, pa Ciphikiro ca Mahema, ŵakalongora kuti ŵakuyuyura ŵanthu bweka, apo ŵakati: “Mzinda uwu wambura kumanya Dango [ndiko kuti, mwakuyana na umo Ŵafarisi ŵakulilongosolera] mbanthu ŵakutembeka.”

Pakulutilira na ntharika yake, Yesu wakuyowoya za yumoza wa ŵanthu “ŵakutembeka” aŵa, wakuti: “Kweni wakusonkheska msonkho yura wakimilira pataliko wakakhumba cara nanga nkhwinuska maso ghake kucanya, kweni ŵakajitimbanga pa nganga, wakatenge, ‘A Ciuta, muŵe na lusungu kwa ine wakwananga.’” Cifukwa cakuti wakusonkheska msonkho wakazomera mwakujiyuyura maubudi ghake, Yesu wakuti: “Nkhumuphalirani kuti, Munthu uyu wakakhilira ku nyumba yake wakurunjiskika comene kuluska munthu yura; cifukwa waliyose uyo wakujikwezga wazamukhizgika, kweni uyo wakujiyuyura wazamukwezgeka.”

Ntheura Yesu wakudidimizgaso kukhumbikwa kwa kuŵa ŵakujiyuyura. Nchakuzizwiska yayi kuti ŵasambiri ŵa Yesu nawo ŵakujiwona kuti mbarunji, cifukwa cakuti ŵakakulira pakati pa ŵanthu ŵakulongozgeka na Ŵafarisi awo ŵakujiwona kuti mbarunji, ndipo mazaza na udindo ŵakuviwona kuti ni vyakuzirwa comene. Kweni Yesu wakupeleka visambizgo viwemi comene pa nkhani ya kujiyuyura. Luka 18:1-14; Yohane 7:49.

▪ Cifukwa wuli mweruzgi wambura urunji wakovwira cokoro, ndipo ni sambiro wuli ilo Yesu wakusambizga mu ntharika iyi?

▪ Kasi Yesu wazamupenja cipulikano ca mtundu wuli para wakwiza?

▪ Kasi Yesu wakuyowoyera njani ntharika ya Mufarisi na wakusonkheska msonkho?

▪ Kasi ni nkharo wuli ya Ŵafarisi iyo tikwenera kugega?