Sambiro 8

Umoyo wa Mbumba Weneuwo Ukumukondweska Ciuta

Kasi malo gha mwanarumi mu mbumba ndi ngani? (1)

Ndi mwauli umo mwanarumi wangacitira na muwoli wake? (2)

Kasi ndi ncito uli izo mwanarumi wali nazo? (3)

Kasi ncito ya muwoli mu mbumba nivici? (4)

Kasi Ciuta wakukhumbaci ku ŵapapi kweniso ku ŵana? (5)

Kasi ghanaghano la Baibolo ndakuti uli pakunena za kulekana na kupatana? (6, 7)

1. Baibolo likuyowoya kuti mwanarumi ndi mutu wa mbumba. (1 Ŵakorinte 11:3) Mwanarumi wakwenera kuŵa na mwanakazi yumoza pera. Ŵakwenera kutolana mwa ndondomeko mwakuyana na dango.—1 Timote 3:2; Tito 3:1.

2. Mwanarumi wakwenera kutemwa muwoli wake nga ndi umo wakujitemwera iye mwene. Wakwenera kucita nayo nga ndi mweneumo Yesu wakucitira na ŵarondezgi ŵake. (Ŵaefeso 5:25, 28, 29) Mwanarumi wangatimbanga muwoli yayi nesi kumucitira nkaza mwantowa yiriyose. M’malo mwake, wakwenera kumurongora ncindi na ulemu.—Ŵakolose 3:19; 1 Petros 3:7.

3. Dada wakwenera kugwira ncito mwankongono kuti wapwerelere mbumba yake. Wakwenera kusanga cakurya, vyakuvwala, na nyumba cifukwa ca muwoli na ŵana ŵake. Dada wakweneraso kupereka cakurya cauzimu ku mbumba yake. (1 Timote 5:8) Iye wakudangilira kovwira mbumba yake kusambira za Ciuta na makhumbo Ghake.—Duteronome 6:4-9; Ŵaefeso 6:4.

4. Muwoli wakwenera kuŵa movwiri muweme wa mwanarumi wake. (Genesis 2:18) Wakwenera kumovwira mufumu wake mu kuŵanozgekereska na kuŵasambizga ŵana ŵawo. (Zintharika 1:8) Yehova wakukhumba muwoli kuti wapwelererenge mbumba yake mwacitemwa. (Zintharika 31:10, 15, 26, 27; Tito 2:4, 5) Wakwenera kuŵa na ncindi yeneco pa mufumu wake.—Ŵaefeso 5:22, 23, 33.

5. Ciuta wakukhumba ŵana kupulikira ŵapapi ŵaŵo. (Ŵaefeso 6:1-3) Wana cirindizga  cakuti ŵapapi ŵakwenera kuŵasambizga na kuŵanyololera ŵana ŵawo. Ŵapapi ŵakwenera kuŵa na nyengo yakusambira Baibolo pamoza na ŵana ŵawo, kupwelerera vyakukhumba vyawo vyauzimu na vyakuthupi. (Duteronome 11:18, 19; Zintharika 22:6, 15) Ŵapapi ŵangalanganga ŵana ŵawo mwaukali na mwankaza cara.—Ŵakolose 3:21.

6. Usange ŵakutorana ŵanasuzgo lakutondeka kucitira vintu pamoza, ŵakwenera kuyezga kugwiriskira ncito urongozgi wa mu Baibolo. Baibolo likutikhuŵirizga kurongora citemwa na kugowokerana. (Ŵakolose 3:12-14) Mazgo gha Ciuta kuti ghakukhuŵirizga kulekana nga ndi ntowa yakumazgira tumasuzgo tucokotucoko cara. Kweni muwoli wangasanka kumuleka mufumu wake usange (1) mwaunonono mtima wakukana kupeleka pwelerero ku mbumba yake, (2) ngwaciwawa comeni mwakuti wakuŵika umoyo wamuwoli wake mungozi, panji (3) makhaliro ghake mukususka ghakupangiska kuŵa kunonono ku mwanakazi kulambira Yehova.—1 Ŵakorinte 7:12, 13.

7. Ŵakutorana ŵakwenera kuŵa ŵakugomezgana kwa uyu na uyu. Uleŵe nkwananga kwa Ciuta kweniso kwa munyithu wakutorana naye. (Ŵahebere 13:4) Kugonana kuwalo kwa ntengwa ndico cekha cifukwa ca Malemba ca kupatirana na kuzomerezgera ntengwa yinyake. (Mateyu 19:6-9; Ŵaroma 7:2, 3) Yehova kuti wakuca nako yayi para ŵantu ŵakupatana kwambura malufura gha Malemba na kukatoraso munyake.—Malaki 2:14-16.

[Vithuzithuzi pa peji 16, 17]

Ciuta wana cirindizga cakuti ŵapapi ŵakwenera kuŵasambizga na kuŵanyolorera ŵana ŵawo

[Cithuzithuzi pa peji 17]

Dada wacitemwa wakupwererera mbumba yake kuthupi na kuuzimu