Chaka chilichose, ŵanthu ŵa Yehova ŵakukondwa kuwungana pamoza kuti ŵakumbukire nyifwa ya Yesu. Pambere Chikumbusko chindachitike kweniso para chajumpha, tikuŵa na mwaŵi wakulumba na kuwonga Yehova chifukwa cha chawanangwa cha sembe yakuwombora icho wali kutipa. (Efe 1:3, 7) Mwachiyelezgero, tikuŵikapo mtima kuti tichemereko ŵanthu ku Chikumbusko. Ŵanji ŵakusintha vinthu vinyake kuti ŵachiteko upayiniya wakanyengo wa maora 30 panji 50 mu mwezi wa Malichi panji Epulero. Kasi namwe mungasazgirako maora agho mukumalira mu uteŵeti mu nyengo ya Chikumbusko? Kasi ntchivichi chingamovwirani kuti mufiske?

Kanandi, tikufiska vinandi para tinganozgekerathu pambere nyengo ya Chikumbusko yindafike. (Zi 21:5) Pakuti nyengo ya Chikumbusko yili pafupi, sono ndiyo ni nyengo yiwemi yakuti tambeko kunozgekera. Ghanaghanirani ivyo mukukhumba kuchita kuti musazgireko uteŵeti winu mu nyengo ya Chikumbusko kweniso ivyo mungachita kuti mufiske vilato vinu. Pemphani Yehova kuti watumbike ivyo mwasankha.—1Yo 5:14, 15.

Kasi mungaghanaghanira nthowa zinyake izo mungasazgirako uteŵeti winu mu nyengo ya Chikumbusko?