Zintharika 6:1-35
6 Mwana wane, usange wimira* mzengezgani wako,+Usange wakorana chasa* na mulendo,+
2 Usange wajithya na layizgo lako,Wakoleka na mazgu gha mulomo wako,+
3 Uchite ichi, mwana wane, kuti ujithaske,Pakuti wawira mu woko la mzengezgani wako:
Luta, ukajiyuyure na kumuŵeya luŵiro mzengezgani wako.+
4 Ungazomerezganga yayi maso ghako kugona tulo,Panji vikopi vyako kusiwa.
5 Ujithaske nga ni mphoyo mu woko la chiŵinda,Nga nkhayuni mu woko la muthyezi.
6 Luta ku nyerere, iwe wamukata.+Wona umo yikuchitira ndipo uŵe wavinjeru.
7 Nangauli yilije mulongozgi, kapitawo, panji muwusi,
8 Yikunozga vyakurya vyake mu chihanya,+Yikuwunjika vyakurya vyake mu nyengo ya vuna.
9 Iwe wamukata, kasi ugonenge pasi m’paka pawuli?
Kasi uwukenge pawuli mu tulo twako?
10 Na tulo tuchoko waka, kusiwa kuchoko waka,Kupinda mawoko na kugona,+
11 Ukavu wizenge pa iwe nga ni munkhungu,Kusoŵerwa kwizenge nga ni munthu uyo wali na vilwero.+
12 Munthu wawakawaka na muheni wakwendendeka na mazgu ghaukhuluku.+
13 Wakutinyira munthu jiso lake,+ wakuchita vimanyikwiro na lundi lake, wakusinizga na minwe yake.
14 Na mtima wauryarya,Wakwata viheni+ na kwambiska mphindano nyengo zose.+
15 Ntheura, soka limwizirenge mwamabuchi.Mu kanyengo kachoko waka waphyokenge kwambura kuchizgika.+
16 Pali vinthu 6 ivyo Yehova wakutinkha.Enya, vinthu 7 ivyo wakuseluka navyo ni ivi:
17 Maso ghakujikuzga,+ lulimi lwautesi,+ na mawoko agho ghakuthiska ndopa zambura mulandu,+
18 Mtima uwo ukwata viŵembu,+ na malundi agho ghakuchimbilira ku uheni,
19 Kaboni mutesi uyo wakuthuta utesi,+Na waliyose uyo wakuseŵa mphindano pakati pa ŵabali.+
20 Iwe mwana wane, sungilira dango la awuso,Ungasidanga yayi ulongozgi* wa anyoko.+
21 Uvivunge mu mtima wako nyengo zose,Uvikakilire mu singo yako.
22 Para ukwenda, vikulongozgenge.Para wagona pasi, vikulindenge.Para wawuka, viyowoyenge nawe.*
23 Pakuti chisambizgo ni nyali,+Dango mbungweru,+Ndipo ntchenyo zakusambizga ni nthowa ya ku umoyo.+
24 Vikusungenge ku mwanakazi muheni,+Ku mazgu ghakukopa gha mwanakazi muleŵi.*+
25 Ungadokeranga yayi kutowa kwake mu mtima wako,+Panji kumuzomerezga kuti wakutore mtima na maso ghake ghakukopa,
26 Pakuti chifukwa cha hule, munthu wakukhala na chingwa pera.+Kweni muwoli wa munthu munyake wakuŵenda umoyo wakuzirwa.
27 Kasi munthu wangalunda moto pa nganga yake kwambura kotcha malaya ghake?+
28 Panji kasi munthu wangenda pa makara gha moto kwambura kuphya malundi?
29 Ndimo viliri na mwanalume uyo wakugona na muwoli wa mzengezgani wake.Yose uyo wakukhwaska mwanakazi uyu walekenge chara kulangika.+
30 Ŵanthu ŵakumuyuyura yayi munkhunguUsange wiba kuti wajikhutiske para wali na njara.
31 Kweni para wasangika, wawezgerengepo kankhondi na kaŵiri.Wapelekenge vinthu vyose vyakuzirwa vya mu nyumba yake.+
32 Yose uyo wakuchita uleŵi na mwanakazi walije mahara.*Uyo wakuchita ivi wakujiparanya yekha.+
33 Wapokerenge waka mabamba na muyuyuro,+Ndipo soni zake zifyulikenge chara.+
34 Pakuti mwanalume wakuŵa mukali chifukwa cha sanji.Waŵenge na chiwuravi chara para wakuwezgera nduzga.+
35 Wazomerenge chara chibadala.*Waphepiskikenge chara, nanga ungapeleka chawanangwa chikuru wuli.
Mazgu Ghamusi
^ Ndiko kuti, wapangana.
^ Mazgu gheneko, “wakhalira ukaboni pa ngongoli.”
^ Panji kuti, “dango la.”
^ Panji kuti, “vikusambizgenge.”
^ Mazgu gheneko, “ngwakupeleŵera mu mtima.”
^ Mazgu gheneko, “chiwombolero.”
