Zintharika 13:1-25
13 Mwana wavinjeru wakuzomera para awiske ŵakumulanga,+Kweni wakugoska wakupulika yayi ntchenyo.+
2 Munthu waryenge viwemi kufuma mu chipambi cha mulomo wake,*+Kweni khumbo la ŵaryarya ni nkhaza.
3 Uyo wakuŵa maso na mulomo wake* wakuvikilira umoyo wake.+Kweni uyo wakupambawura milomo yake waparanyikenge.+
4 Mukata wakudokera waka vinthu, uku walije kanthu,+Kweni munthu wachitatata wakhutenge* fikepo.+
5 Munthu murunji wakutinkha utesi,+Kweni ivyo muheni wakuchita vikukhozga soni na kulengeska.
6 Urunji ukuvikilira munthu uyo wakwenda kwambura kafukwa,+Kweni uheni ukumuwiskira pasi wakwananga.
7 Waliko munthu uyo wakujitora nga ni musambazi kweni walije na kalikose.+Waliko munyake uyo wakujitora nga ni mukavu kweni wali na vyuma vinandi.
8 Usambazi ntchiwombolero cha umoyo wa munthu,+Kweni ŵakavu ŵakofyeka chara.*+
9 Ungweru wa murunji ukuŵala chomene,*+Kweni nyali ya muheni yizimwikenge.+
10 Kujiŵikamo kukwambiska waka mbembe,+Kweni vinjeru vili na awo ŵakupenja ulongozgi.*+
11 Chuma chakuchisangira mu luŵiro chimalenge,+Kweni chuma cha uyo wakuwunjika pachokopachoko* chiŵenge chinandi.
12 Mtima ukulwara usange icho wakhazganga* chindize,+Kweni khumbo ilo lafiskika ni khuni la umoyo.+
13 Uyo wakupepura ulongozgi* wavifyonthenge,+Kweni uyo wakuchindika dango wapokerenge njombe.+
14 Chisambizgo* cha munthu wavinjeru ntchisimi cha umoyo+Kuti munthu wawukeko ku vipingo vya nyifwa.
15 Munthu wamahara wakutemweka,Kweni nthowa ya ŵaryarya njinonono.
16 Munthu wakuchenjera wakuchita vinthu mwamahara,+Kweni chindere chikuvumbura uchindere wake.+
17 Thenga liheni likuwa mu suzgo,+Kweni nthumi yakugomezgeka yikuchizga.+
18 Uyo wakusulako chisambizgo wakusanga ukavu na soni,Kweni uyo wakupulikira ntchenyo wachindikikenge.+
19 Khumbo ilo lafiskika ndiwemi kwa munthu,+Kweni chindere chikutinkha kufumako ku uheni.+
20 Uyo wakwenda na ŵavinjeru waŵenge wavinjeru,+Kweni uyo wakuchita vinthu pamoza na vindere wapwetekekenge.+
21 Soka likulondezga ŵakwananga,+Kweni uwemi upelekenge njombe ku ŵarunji.+
22 Munthu muwemi wakulekera ŵazukuru ŵake chiharo,Kweni usambazi wa munthu wakwananga usungikirenge murunji.+
23 Munda wa munthu mukavu ukupasa vyakurya vinandi,Kweni chifukwa cha kusoŵerwa urunji, vingayoleka.
24 Uyo wakuleka kuthyapura* mwana wake wakumutinkha,+Kweni uyo wakumutemwa wakulimbikira* kumulanga.+
25 Murunji wakurya na kukhuta,+Kweni nthumbo ya muheni yili pwankhu.+
Mazgu Ghamusi
^ Panji kuti, “kayowoyero kake.”
^ Panji kuti, “ivyo wakuyowoya.”
^ Mazgu gheneko, “watutuŵenge.”
^ Mazgu gheneko, “ŵakupulika chara ntchenyo.”
^ Mazgu gheneko, “ukusekelera.”
^ Panji kuti, “ŵakukhala pasi na kudumbiskana.”
^ Mazgu gheneko, “wakuwunjika na woko.”
^ Panji kuti, “wagomezganga.”
^ Panji kuti, “mazgu.”
^ Panji kuti, “Dango la.”
^ Panji kuti, “kuchenya; kulanga.”
^ Pangayowoyekaso kuti, “wakutendekera.”
