Yobu 37:1-24
37 “Pa ichi mtima wane ukukhung’uska,Ndipo ukuduka kufumapo pa malo ghake.
2 Tegherezgani mwakupwelelera kapomezi ka mazgu ghake,Na kududumira uko kukufuma mu mulomo wake.
3 Wakutuma kapomezi kusi kwa mtambo wose,Ndipo wakutuma leza wake+ ku vigoti vya charu chapasi.
4 Pamanyuma wakubangura,Wakududumira na mazgu ghakuru,+Ndipo wakulekeska chara leza para mazgu ghake ghapulikikwa.
5 Chiuta wakududumira mwakuzizwiska na mazgu ghake,+Wakuchita vinthu vikuru ivyo tingavipulikiska chara.+
6 Pakuti wakuphalira chiwuvi kuti, ‘Khilira pa charu chapasi,’+
Na vula kuti, ‘Lokwa chomene.’+
7 Chiuta wakulekeska mulimo wose wa ŵanthu,*Mwakuti munthu waliyose wamanyenge mulimo wa Chiuta.
8 Nyama zamuthengere zikunjira mu malo ghakubisamamo,Na kukhala mwenemumo.
9 Chimphepo chikuputa kufuma mu chipinda chake,+Ndipo kuzizima kukwiza na mphepo za kumpoto.+
10 Na mvuchi wa Chiuta, maji ghakukhoma ghakupangika,+Vimaji vinandi vikukhoma gwaa.+
11 Enya, mabingu wakughanyekezga na maji,Wakutandazga leza wake+ mu mabingu,
12 Ghakuzgokera kose uko wakughalongozgera,Ghakuchita chilichose icho waghaphalira+ kuti ghachite pa charu chapasi.
13 Kwali kuti ghapeleke chilango,+ panji kuti ghanyeweske charu,Panji kuti walongore lusungu* lukuru, wakuvichita kuti viŵeko.+
14 Pulikizgani ichi, a Yobu,Muti chete na kughanaghanira mwakupwelelera milimo yakuzizwiska ya Chiuta.+
15 Kasi mukumanya umo Chiuta wakulongozgera mabingu,Na umo wakumwetuskira leza kufuma mu mabingu ghake?
16 Kasi mukumanya icho chikukhozga mabingu muchanya?+
Iyi ni milimo yakuzizwiska ya uyo wali na mahara ghakufikapo.+
17 Chifukwa wuli vyakuvwara vinu vikotchaApo charu chili bata chifukwa cha mphepo ya kumwera?+
18 Kasi imwe mungatandawura mitambo pamoza na iyo,+Iyo yili gwaa nga ni gilasi lachisulo?
19 Tiphalirani chakuti tiyowoye kwa iyo,Tingazgora yayi chifukwa tili mu mdima.
20 Kasi waphalirike kuti nkhukhumba kuyowoya?
Panji munyake wayowoya chinthu chinyake chakuti waphalirike?+
21 Ŵangawona yayi ungweru,Nangauli ukuŵala mu mtambo,M’paka mphepo yiputepo dankha na kuwuskapo mabingu.
22 Kugadima kwa nga ni golide kukufumira kumpoto,Uchindami wa Chiuta+ ngwakofya.
23 Wankhongonozose tingamupulikiska yayi,+Wali na nkhongono zikuru,+Wakunanga yayi urunji wake+ na kunyoloka kwake kukuru.+
24 Ntheura ŵanthu ŵakwenera kumopa.+
Pakuti iyo wakuŵatemwa chara wose awo ŵakughanaghana kuti mbavinjeru.”*+
Mazgu Ghamusi
^ Mazgu gheneko, “wakuŵika chidindo pa woko la munthu waliyose.”
^ Panji kuti, “chitemwa chakugomezgeka.”
^ Mazgu gheneko, “awo mbavinjeru mu mtima.”
