Yeremiya 43:1-13
43 Yeremiya wakamara kuphalira ŵanthu wose mazgu ghose agha ghakufuma kwa Yehova Chiuta wawo, lizgu lililose ilo Yehova Chiuta wawo wakamutuma kuti waŵaphalire.
2 Penepapo Azariya mwana wa Hoshaya, Yohanani+ mwana wa Kareya, na ŵanthu wose ŵakujiŵikamo ŵakati kwa Yeremiya: “Uli mutesi. Yehova Chiuta withu wandakutumepo kuyowoya kuti: ‘Mungalutanga kukakhala ku Eguputo yayi.’
3 Kweni Baruki+ mwana wa Neriya ndiyo wakukupusika kuti utipeleke ku Ŵakalidi, mwakuti ŵatikome panji kutitolera ku wuzga ku Babuloni.”+
4 Ntheura Yohanani mwana wa Kareya na ŵalongozgi wose ŵa nkhondo na ŵanthu wose ŵakapulikira yayi mazgu gha Yehova ghakuti ŵakhale mu charu cha Yuda.
5 Kweni Yohanani mwana wa Kareya na ŵalongozgi wose ŵa nkhondo ŵakatora ŵakukhalako wose ŵa ku Yuda awo ŵakawerako ku mitundu yose iyo ŵakambininikira mwakuti ŵazakakhale mu charu cha Yuda.+
6 Ŵakatora ŵanalume, ŵanakazi, ŵana, ŵana ŵasungwana ŵa themba, na wose awo Nebuzaradani+ mulara wa ŵalinda wakaŵaleka na Gedaliya+ mwana wa Ahikamu+ mwana wa Shafani,+ kweniso Yeremiya ntchimi na Baruki mwana wa Neriya.
7 Ŵakaluta ku charu cha Eguputo, pakuti ŵakapulikira yayi mazgu gha Yehova, ndipo ŵakafika ku Tapanesi.+
8 Penepapo mazgu gha Yehova ghakiza kwa Yeremiya mu Tapanesi, kuti:
9 “Tora malibwe ghakuru mu woko lako, ughabise mu dongo kusi ku makwelero ghanjerwa agho ghali pa mulyango wa nyumba ya Farawo mu Tapanesi, uku ŵanthu ŵa ku Yuda ŵakuwona.
10 Mbwenu uŵaphalire kuti: ‘Yehova wa mawumba, Chiuta wa Israyeli, wakuti: “Wonani, nkhuchemeska Nebukadinezara* themba la Babuloni, muteŵeti wane,+ ndipo niŵikenge chitengo chake pachanya pa malibwe agho naghabisa, ndipo watandawulirenge hema lake laufumu pa igho.+
11 Wizenge na kutimba charu cha Eguputo.+ Yose uyo ngwakuti wafwenge na nthenda yakofya, wafwenge na nthenda yakofya, yose uyo ngwakuti wakolekenge wuzga, walutenge ku wuzga, ndipo yose uyo ngwakuti wakomekenge na lupanga, wafwenge na lupanga.+
12 Niwotchenge nyumba za ŵachiuta ŵa Eguputo na moto,+ iyo waŵawotchenge na kuŵatolera ku wuzga. Wajivungilizgenge na charu cha Eguputo, nga umo muliska wakujivungilizgira na chakuvwara, ndipo wafumengeko mu mtende.*
13 Wabwangandurenge vipilara vya Beti-shemeshi* mu charu cha Eguputo, ndipo wawotchenge na moto nyumba* za ŵachiuta ŵa Eguputo.”’”
Mazgu Ghamusi
^ Wakulembekaso kuti, Nebukadirezara.
^ Panji kuti, “kwambura kupwetekeka.”
^ Panji kuti, “Nyumba ya (Tempile la) Dazi,” ndiko kuti, Heliopolisi.
^ Panji kuti, “matempile gha.”
