MAVESI GHA MU BAIBOLO GHALONGOSOREKA

Yesaya 42:8—“Ine Ndine FUMU”

JULANI

“Ine ndine Yehova. Ili ndilo zina lane; Uchindami wane nkhupeleka kwa munyake chara, panji malumbo ghane ku vikozgo vyakuŵaja.”—Yesaya 42:8, Mang’anamuliro gha Charu Chiphya.

“Ine ndine FUMU: Zina lane ndeneliri: Uchindami wane kuti nkhupereka ku munyakhe chara, nanga ndi marumbo ghane kuti nkhupereka ku vikozgo vyakuŵaja.”—Yesaya 42:8, Mazgu gha Chiuta mu Kang’anamuliro Kaphya.

Ivyo Lemba la Yesaya 42:8 Likung’anamura

Chiuta wakutiphalira zina lake leneko ndipo wakutiphaliraso kuti tikwenera yayi kupeleka ntchindi panji uchindami uwo ukumwenelera iyo, ku vikozgo.

Chiuta wali kujipa yekha zina ili, ilo mu Chitumbuka likumanyikwa kuti “Yehova.” a (Ekisodo 3:14, 15) Nangauli zina la Chiuta ili likusangika mu malo pafupifupi 7,000 mu Testamente Lakale (Malemba Ghachihebere na Chiaramu), kweni mu Mabaibolo ghanandi ŵali kuwuskamo zina la Chiuta, ndipo ŵali kulembamo kuti “FUMU” (mu vilembo vikulu). Chiyelezgero ni lemba la Salimo 110:1, ilo ni uchimi wakuyowoya za Yehova na Yesu. Mu Baibolo la Mazgu gha Chiuta mu Kang’anamuliro Kaphya, tikuŵerenga kuti: “FUMU Chiuta [Yehova] wakati kwa Fumu yane [Yesu].” (Milimo 2:34-36) Baibolo la Mang’anamuliro gha Charu Chiphya likulongosora makora mphambano ya mazgu ghaŵiri agha ghakuti “Fumu”, ndipo lili na zina la Chiuta mu malo ghose agho likwenera kusangika. Lemba ili likuti: “Yehova wakati kwa Fumu yane: ‘Khala ku woko lane lamalyero, m’paka niŵike ŵalwani ŵako kuŵa chakukandapo malundi ghako.’”

Awo ŵakusanda vya Baibolo ŵanandi ŵakugomezga kuti zina la Chiuta likung’anamura, “Wakuchitiska Kuŵako.” Zina ili ndakwenelera nadi Chiuta waunenesko pera, chifukwa ndiyo pera uyo wangaŵa chilichose icho wakhumba panji wangachitiska chilengiwa chake kuŵa chilichose kuti wafiske khumbo lake.

Pakuŵa Mlengi withu kweniso Chiuta waunenesko, ntchakuzirwa kuti timusopenge mwakujipeleka. Tikwenera yayi kusopa waliyose panji chinthu chilichose, ndipo ivi vikusazgapo vikozgo vya mtundu uliwose.—Ekisodo 20:2-6; 34:14; 1 Yohane 5:21.

Fundo za pa Yesaya 42:8

Mu mavesi ghakwambilira gha mu Yesaya chaputara 42, Yehova wakayowoyerathu ivyo “wakusoleka” wake wazamuchita. Chiuta wakati muteŵeti wake wakusoleka uyu, “wizenge na urunji ku mitundu.” (Yesaya 42:1) Pakuyowoya vya layizgo ili, Chiuta wakati: “Sono nkhupharazga vinthu viphya. Pambere vindawoneke, nkhumuphalirani.” (Yesaya 42:9) Pati pajumpha vyaka vinandi, uchimi wakuyowoya za “wakusoleka” ukafiskika, apo Mesiya panji kuti Khristu wakiza pa charu chapasi kuzakachita uteŵeti wake.—Mateyu 3:16, 17; 12:15-21.

a Mu Chihebere zina la Chiuta likulembeka mu vilembo vinayi, ivyo mu Chingelezi ni YHWH. Ndipo mu Mabaibolo ghanyake zina la Chiuta ili ŵakuti “Yawe.” Para mukukhumba kumanya vinandi, wonani mutu wakuti, “Zina la Chiuta mu Malemba Ghachihebere,” pa Vyakusazgirapo A4, mu Baibolo la Malemba Ghakupatulika mu Mang’anamuliro gha Charu Chiphya.