“Lekani nkhumuphalirani kuti, vinthu vyose ivyo mukulomba na kupempha, muŵe na chipulikano kuti mwapokera kale, ndipo muŵenge navyo.”—Mariko 11:24, Mang’anamuliro gha Charu Chiphya.

 ‘Chifukwa cheneichi nkhumunenerani, vyose ivyo mukuviromba na kuvipempha, pulikanani kuti mwavipokera, ndipo muti muŵe navyo.’—Mariko 11:24, Tumbuka Bible.

 Apa Yesu wakalongoranga ŵalondezgi ŵake kuzirwa kwa kulomba mwakuti ŵaŵe na chipulikano chakukhora. Wakaŵasimikizgira kuti Chiuta wakupulika malurombo ghawo kweniso wakuŵazgora. Munthu uyo wakulomba kuyana na khumbo la Chiuta wangaŵa na chigomezgo kuti ivyo wakulomba vichitikenge nadi kwambura kutondeka. Vikuŵa nga lurombo lwake lwazgoreka kale.

 Yesu wakadidimizga chomene kuzirwa kwa kulomba na chipulikano. Wakayowoya kuti munthu uyo wakulomba wakwenera yayi ‘kukayika mu mtima wake’ kweni wakwenera kuŵa na “chipulikano kuti icho wakuyowoya chichitikenge.” (Mariko 11:23) Chifukwa wuli? Chifukwa ntchakuti awo ŵakukayika ŵaleke kukhazga kuti ‘ŵapokerenge kanthu kwa Yehova.’ a—Yakobe 1:5-8.

 Munthu uyo wali na chipulikano wakulomba kanandi waka. (Luka 11:9, 10; Ŵaroma 12:12) Para wakuchita nthena, wakulongora kuti ivyo wakupempha wakuvikhumba nadi ndipo wakugomezga nadi kuti Chiuta wangazgora lurombo lwake. Nakuti wakumanya kuti Chiuta wangazgora lurombo lwake munthowa iyo mwenecho wakhazganga yayi ndipo wangachita ivi pa nyengo yakupambanako na iyo waghanaghananga.—Ŵaefeso 3:20; Ŵahebere 11:6.

 Ndipouli mazgu gha Yesu agha, ghakung’anamura kuti munthu waliyose wangakhazganga yayi kupokera chilichose icho walomba kwa Chiuta. Yesu wakayowoyanga ku ŵalondezgi ŵake, ŵanthu ŵachipulikano awo ŵakayezgangayezganga kusopa Yehova Chiuta mwakuzomerezgeka. Baibolo likuti Yehova wakupulika malurombo ghekha agho ghakukolerana na khumbo lake. (1 Yohane 5:14) Wakuzgora yayi malurombo gha ŵanthu awo ŵakusulako fundo zake zaurunji na awo ŵakuchita viheni kwambura kupera. (Yesaya 1:15; Mika 3:4; Yohane 9:31) Kuti mumanye vinandi pa nkhani yakukhwaskana na malurombo agho Chiuta wakupulika, wonelerani vidiyo iyi.

 Mu mazuŵa ghaumaliro gha uteŵeti wake wa pa charu chapasi, Yesu wakayowoyanga na ŵasambiri ŵake kuti ntchakuzirwa kuŵa na chipulikano chakukhora mwa Chiuta. Wakadidimizgapo nkhani iyi mwakuŵaphalira chiyelezgero. Apo wakendanga kuya ku Yerusalemu, wakawona khuni la mkuyu ilo likaŵa na mahamba. Kweni khuni likaŵavya vipasi, ntheura Yesu wakalitemba. (Mariko 11:12-14) Nga umo khuni likawonekeranga makora nga lili na vipambi apo likaŵavya, vikalongoranga waka umo mtundu wakale wa Israyeli ukaŵira, ukachitanga nga ukusopa Chiuta kweni ukaŵavya chipulikano. (Mateyu 21:43) Nyengo yichoko waka, khuni la mkuyu lira likafota, ndipo ivi vikalongoranga ivyo vikaŵa pafupi kuchitikira mtundu wambura chipulikano wa Israyeli.—Mariko 11:19-21.

 Mwakupambanako, Yesu wakamanya kuti ŵalondezgi ŵake ŵangaŵa na chipulikano icho chingaŵawovwira kumarana na masuzgo kweniso kuti ŵafiske milimo yakuzizwiska. (Mariko 11:22, 23) Ivyo Yesu wakaŵaphalira ŵalondezgi ŵake pa nkhani ya lurombo vikaŵa vyakwenelera, chifukwa chipulikano chawo chikaŵa pafupi kuyezgeka. Ŵakeneranga kuzizipizga nyifwa ya Yesu kweniso kutambuzgika pa uteŵeti wawo. (Luka 24:17-20; Milimo 5:17, 18, 40) Mazuŵa ghano, awo ŵakulondezga Yesu nawo ŵangatonda masuzgo para ŵakulongora kuti ŵali na chipulikano mwa Chiuta kweniso para ŵakumulomba.—Yakobe 2:26.

 Wonelerani vidiyo yakudumura iyi, iyo yikulongosora ivyo vili mu buku la Mariko.