“Kufuma apo, Chiuta wakati: ‘Tipange munthu mu chikozgo chithu, wakuŵa nga ndise, ndipo waŵe na mazaza pa somba zamunyanja, pa vyamoyo vyakuduka mudera, pa vinyama vyakuŵeta, pa charu chose chapasi, na pa vyamoyo vyose vyakukhwaŵa ivyo vikwenda pa charu chapasi.’”—Genizesi 1:26, Mang’anamuliro gha Charu Chiphya.

 ‘Chiuta wakati, “Tilenge munthu mu chikozgo chithu, kwakulingana na nkharo yithu; waŵe na mazaza pa somba za mu nyanja, na pa viyuni vya mu dera, na pa vyakuŵeta, na pa charu chose, na pa vyakukhwaŵa vyose ivyo vikukhwaŵa pa charu.”’—Genizesi 1:26, Tumbuka Bible.

 Ŵanthu ŵali kulengeka mu chikozgo cha Chiuta, ndipo nawo ŵangalongora makhaliro agho Chiuta wali nagho, nga ntchitemwa, lusungu na urunji. Ivi vikutovwira kumanya chifukwa icho taŵanthu tingayezgera makhaliro gha Chiuta.

 “Chiuta wakati: ‘Tipange munthu mu chikozgo chithu.’” Pambere Yehova Chiuta a wandalenge munthu panji chilichose, wakalenga chilengiwa chauzimu chankhongono chomene icho pamanyuma chikazakamba kumanyikwa na zina lakuti Yesu. Kwizira mwa Yesu, “vinthu vinyake vyose vikalengeka kuchanya na pa charu chapasi.” (Ŵakolose 1:16) Yesu wakalongora makhaliro gha Yehova pakuti iyo “ntchikozgo cha Chiuta wambura kuwoneka.” (Ŵakolose 1:15) Lekani ntchakupulikikwa kuti Chiuta wakati kwa Yesu: “Tipange munthu mu chikozgo chithu.”

 “Waŵe na mazaza pa . . . vinyama vyakuŵeta, pa charu chose chapasi.” Vinyama vili kulengeka mu chikozgo cha Chiuta yayi. Ivyo vikalengeka mu nthowa yakuti vingalongora yayi makhaliro agho ŵanthu ŵakwenelera kuŵa nagho, nga ntchitemwa panji kuŵa na njuŵi. Ndipouli, Chiuta wakuvighanaghanira vinyama. Lekani wakati ŵanthu ŵakwenera kuŵa na “mazaza” pa vinyama, mazgu agho ghangang’anamurikaso kuti “kuwusa” panji “kuŵa na wenelero pa.” Ntheura Yehova wakapelekanga udindo wa kupwelelera vinyama ku ŵanthu. (Salimo 8:6-8; Zintharika 12:10) Yehova wakukhazga kuti ŵanthu ŵapwelelerenge makora charu na vyamoyo vyose ivyo vilimo.

 Machaputara ghaŵiri ghakwambilira mu buku la Genizesi ghakulongosora umo chilengiwa chikaŵirako, umo charu chikalengekera, kweniso vyose ivyo vilimo. Chilichose icho Yehova wakalenga ntchapadera, ndipouli ŵanthu ndiwo mbakuzirwa chomene pa vilengiwa vya pa charu chapasi. Chiuta wati wamara kulenga vyose “wakawona kuti vyose ivyo wakapanga vikaŵa viwemi chomene.”—Genizesi 1:31.

 Wonelerani vidiyo yakudumura iyi kuti mumanye vinandi vyakukhwaskana na nkhani ya chilengiwa iyo yili mu buku la Genizesi.

 Utesi: Lemba la Genizesi 1:26 likusimikizgira kuti Yesu ni Chiuta.

 Unenesko: Nga dada na mwana, Chiuta na Yesu ŵakutemwana chomene, kweni ni munthu yumoza yayi. Yesu wakasambizga kuti Chiuta ni mukuru kuluska iyo. (Yohane 14:28) Kuti mumanye vinandi, wonelerani vidiyo ya mutu wakuti Kasi Yesu Khristu Ni Chiuta? panji ŵerengani nkhani yakuti, “Chifukwa Wuli Yesu Wakuchemeka Mwana wa Chiuta?””

 Wonelerani vidiyo yakudumura iyi kuti muwone ivyo vili mu buku la Genizesi.