Yayi, mu Baibolo mulije chisambizgo chakuti ‘para munthu zina lake lalembeka mu buku la umoyo mbwenu ndikuti waponoskeka kale.’ Munthu uyo zina lake lalembeka mu buku la umoyo chifukwa cha kuŵa na chipulikano mwa Yesu Khristu, wangataya chipulikano chake kweniso mwaŵi wakuzakaponoskeka. Baibolo likuti munthu wakwenera kufwilirapo kuti walutilire kuŵa na chipulikano, panji kuti ‘kukoleska chipulikano.’ (Yuda 3, 5) Ŵakhristu ŵakwambilira awo ŵakaŵa kale na chipulikano mwa Khristu ŵakaphalirika kuti: “Lutilirani kopa na kutenthema kuti musange chiponosko chinu.”​—Ŵafilipi 2:12.

Mavesi gha mu Baibolo agho ghakususka chisambizgo chakuti ‘para munthu zina lake lalembeka mu buku la umoyo mbwenu ndikuti waponoskeka kale’

•   Baibolo likuchenjezga vya maubudi ghakurughakuru agho ghangazakamupangiska munthu kutondeka kunjira mu Ufumu wa Chiuta. (1 Ŵakorinte 6:9-11; Ŵagalatiya 5:19-21) Viŵenge kuti para munthu walembeka mu buku la umoyo mbwenu wapona kale, nthena mu Baibolo mukaŵavya machenjezgo agha. M’malo mwake, Baibolo likulongora kuti munthu uyo zina lake lalembeka mu buku la umoyo, wangatondeka kuzakaponoskeka chifukwa chakuti wachita ubudi unyake ukuru. Mwachiyelezgero, pa Ŵahebere 10:26 pakuti: “Chifukwa usange tikuchitira dala kwananga uku tamanya makora unenesko, palijeso sembe yinyake ya zakwananga iyo yakhalako.”​—Ŵahebere 10:26; 6:4-6; 2 Petrosi 2:20-22.

•   Yesu wakadidimizga fundo ya uwemi wakulutilira kuŵa na chipulikano apo wakayowoya vya ntharika ya mpheska. Mu ntharika iyi, iyo wakajiyelezgera na mpheska ndipo ŵalondezgi ŵake wakaŵayaniska na minthavi ya mpheska. Ŵanyake ŵakalongoranga kuti ŵali na chipulikano pakwamba, kwizira mu vipambi vyawo panji vyakuchita vyawo, kweni pati pajumpha nyengo ŵakaleka kuchita nthena ndipo ‘ŵakaponyeka kuwaro nga ni munthavi wambura kupambika vipambi,’ ndipo ŵakataya mwaŵi wakuponoskeka. (Yohane 15:1-6) Mpositole Paulosi nayo wakagwiliskira ntchito chiyelezgero chakuyana waka, apo wakati Ŵakhristu awo ŵakuleka kulutilira kuŵa na chipulikano ‘ŵadumulikenge.’—Ŵaroma 11:17-22.

•   Ŵakhristu ŵakuphalirika kuti ŵakwenera kulutilira ‘kuŵa maso.’ (Mateyu 24:42; 25:13) Awo ŵakugona tulo mwauzimu, kwali chifukwa cha kuchita “milimo ya chisi” panji chifukwa cha kuleka kuchita mwakukwana milimo iyo Yesu wali kutituma, ŵakutaya chiponosko chawo.—Ŵaroma 13:11-13; Chivumbuzi 3:1-3.

•   Malemba ghanandi ghakulongora kuti awo ŵali kulembeka mu buku la umoyo ŵakwenera kulutilira kuzizipizga mwakugomezgeka mpaka paumaliro. (Mateyu 24:13; Ŵahebere 10:36; 12:2, 3; Chivumbuzi 2:10) Ŵakhristu ŵakwambilira ŵakakondwa chomene ŵakati ŵapulika kuti ŵanyawo ŵakulutilira kuzizipizga na chipulikano. (1 Ŵatesalonika 1:2, 3; 3 Yohane 3, 4) Kasi nthena ntchakupulikikwa kuti Baibolo lididimizgenge uwemi wa kulutilira kuzizipizga uku awo ŵalembeka kale mu buku la umoyo ndikuti ŵazamupona visuzge viti wuli?

•   Apo mpositole Paulosi wakakhala pachoko kukomeka ndipo wakamba kuwona kuti chiponosko chake chili pafupi nadi. (2 Timote 4:6-8) Kukwambilira kwa umoyo wake, iyo wakamanyanga kuti wangazakatondeka kuponoskeka para wangathera ku makhumbiro gha thupi. Iyo wakalemba kuti: “Nkhutchaya thupi lane ndipo nkhulilongozga nga ni muzga, mwakuti para napharazgira ŵanthu, ine nileke kuŵa wambura kwenelera mu nthowa yinyake.”​—1 Ŵakorinte 9:27; Ŵafilipi 3:12-14.