Baibolo lili na fundo zinandi izo zingamovwirani kuti mulipulikiskenge. Vilije kanthu kuti kwali mukufuma nkhu kweniso umo muliri, uthenga wa Chiuta uwo uli mu Baibolo ‘ngunonono chara kwa imwe, ndipo uli kutali chomene yayi na imwe.’—Dotoronome 30:11.

Ivyo Vingamovwirani Kuti Mupulikiskenge Baibolo

1.   Ŵani na maghanoghano ghawemi. Zomerezgani kuti Baibolo ni Mazgu gha Chiuta. Ŵani ŵakujiyuyura, pakuti Chiuta wakususka ŵakujikuzga. (1 Ŵatesalonika 2:13; Yakobe 4:6) Lekani kugomezgeramo waka bweka, kweni mupulikiskenge ivyo mukuŵerenga. Chiuta wakukhumba kuti mugwiliskirenge ntchito “nkhongono yinu ya kughanaghana.”—Ŵaroma 12:1, 2.

2.   Lombani vinjeru. Pa Zintharika 3:5, Baibolo likuti: “Ungagomezganga pa kapulikiskiro kako yayi.” M’malo mwake, mulutilire ‘kulomba Chiuta’ kuti wamupani vinjeru kuti mupulikiskenge Baibolo.—Yakobe 1:5.

3.   Muŵerengenge nyengo zose. Para nyengo zose mukuŵerenga Baibolo vinthu vimwenderaninge makora.—Joshuwa 1:8.

4.   Sankhani nkhani yakuti muŵerenge. Mungapulikiska makora Baibolo para mungasankha nkhani yinyake na kuwona ivyo Malemba ghakuyowoya pa nkhani iyo. Mungamba na ‘visambizgo vyakwambilira’ vya mu Baibolo, pamanyuma, lutilirani kusambira vinandi kuti muŵe “ŵakukhwima.” (Ŵahebere 6:1, 2) Para mungayaniska malemba, mumanyenge kuti Baibolo ndakukolerana, ndipo mupulikiskenge nanga ni vigaŵa “vinyake vyakusuzga kupulikiska.”—2 Petrosi 3:16.

5.   Fumbani ŵanyinu. Baibolo likutichiska kuti tikwenera kufumba ŵanyithu awo ŵakupulikiska makora Baibolo. (Milimo 8:30, 31) Ŵakaboni ŵa Yehova ŵakusambira Baibolo na ŵanthu kwaulere. Nga Mbakhristu ŵakwambilira, Ŵakaboni ŵa Yehova nawo ŵakugwiliskira ntchito Malemba kuti ŵawovwire ŵanthu kumanya ivyo Baibolo likusambizga.—Milimo 17:2, 3.

Mukukhumbikwira vinthu ivi yayi kuti mupulikiske Baibolo

1.   Masambiro ghapachanya. Ŵapositole 12 ŵa Yesu ŵakamanyanga makora Malemba ndipo ŵakaphalirangako ŵanyawo, nangauli ŵanthu ŵanyake ŵakaŵawonanga kuti ni “ŵanthu ŵambura kusambira ndiposo ŵanthu bweka.”—Milimo 4:13.

2.   Ndalama. Mungamanya ivyo Baibolo likusambizga kwambura kulipira kalikose. Yesu wakaphalira ŵasambiri ŵake kuti: “Mukapokera kwawanangwa, pelekani kwawanangwa.”—Mateyu 10:8.