Malango Khumi ni malango agho Chiuta wakapeleka ku mtundu wakale wa Israyeli. Malango agha ghakumanyikwaso kuti Mazgu Khumi, ndipo ghali kufuma ku lizgu la Chihebere lakuti ʽaseʹreth had·deva·rim.ʹ Mazgu agha ghakusangika mu Baibolo maulendo ghatatu mu mabuku ghankhondi ghakwambilira agho ghakuchemeka kuti Pentateuch (Torah). (Ekisodo 34:28; Dotoronome 4:13; 10:4) Mazgu agha ghakuyanako na lizgu la Chigiriki lakuti, deʹka (khumi) loʹgous, kung’anamura “Decalogue.”

 Chiuta wakalemba Malango Khumi pa malibwe ghaŵiri ghapapati na kughapeleka kwa Mozesi pa Phiri la Sinayi. (Ekisodo 24:12-18) Malango Khumi agha ghakusangika pa Ekisodo 20:1-17 na pa Dotoronome 5:6-21.

•  Malango Khumi

•  Chifukwa wuli Malango Khumi ghakupambana?

•  Chifukwa wuli Chiuta wakapeleka Malango Khumi?

•  Kasi Ŵakhristu ŵakwenera kulondezga Malango Khumi?

•  Kasi Malango Khumi ngakovwira mazuŵa ghano?

•  Fundo za mu Malango Khumi izo zikusangika mu Testamente Lasono

1.   Usopenge Yehova Chiuta pera.—Ekisodo 20:3.

2.   Ungasopanga vikozgo chara.—Ekisodo 20:4-6.

3.   Ungazunuranga zina la Chiuta mwambura kwenelera yayi.—Ekisodo 20:7.

4.   Umbukenge zuŵa la Sabata.—Ekisodo 20:8-11.

5.   Uchindikenge ŵapapi ŵako.—Ekisodo 20:12.

6.   Ungakomanga munthu chara.—Ekisodo 20:13.

7.   Ungaleŵanga chara.—Ekisodo 20:14.

8.   Ungibanga chara.—Ekisodo 20:15.

9.   Ungapelekanga ukaboni wautesi chara.—Ekisodo 20:16.

10.   Ungadokeranga chara.—Ekisodo 20:17.

 Malango Khumi agha ghandalembeke mwandondomeko. Ntheura ŵanthu ŵakususkana za ndondomeko ya malango agha. Ndondomeko iyo yili pachanya apa ndiyo ŵanandi ŵakutemwa kulemba. Ndipouli, ŵanyake ŵakulemba mwakupambanako. Ŵakupambana pa ilo likwenera kuŵa dango lakwamba, lachiŵiri, na laumaliro. a

 Malango Khumi ngamoza mwa malango agho Chiuta wakapeleka kwa Mozesi. Malango ghose ghakaŵa ghakujumpha 600 ndipo ghakaŵa phangano pakati pa Chiuta na mtundu wakale wa Israyeli. (Ekisodo 34:27) Chiuta wakalayizga Ŵaisrayeli kuti usange ŵapulikirenge malango ghake, vinthu viŵayenderenge makora chomene. (Dotoronome 28:1-14) Kweni chilato chikuru chomene cha malango agha chikaŵa chakuti ghaŵe mulinda wakulongozgera Ŵaisrayeli kwa Mesiya, panji kuti Khristu.—Ŵagalatiya 3:24.

 Yayi. Chiuta wakapeleka malango agha kwa Ŵaisrayeli ŵakale pera. (Dotoronome 5:2, 3; Salimo 147:19, 20) Ŵakhristu ŵali pasi pa dango la Mozesi yayi, nakuti Ŵakhristu Ŵachiyuda nawo ‘ŵakafwatulika ku Dango ili.’ (Ŵaroma 7:6) b “Dango la Khristu,” ilo likwimira vyose ivyo Yesu wakasambizga ŵasambiri ŵake kuti ŵachitenge, ndilo lili kunjira m’malo mwa Dango la Mozesi.—Ŵagalatiya 6:2; Mateyu 28:19, 20.

 Enya. Malango Khumi ghakulongora umo Chiuta wakuwonera vinthu, ipo ghangatovwira chomene. (2 Timote 3:16, 17) Mu Malango Khumi muli fundo zakuzirwa chomene izo zizamumara ntchito yayi. (Salimo 111:7, 8) Zinandi mwa fundo izi zikusangika mu Testamente Lasono.—Wonani “ Fundo za mu Malango Khumi izo zili mu Testamente Lasono.”

 Yesu wakasambizga kuti Dango lose la Mozesi lagona waka pa fundo ziŵiri zakuzirwa chomene. Iyo wakati: “‘Utemwenge Yehova Chiuta wako na mtima wako wose na umoyo wako wose na maghanoghano ghako ghose.’ Ili ndilo ni dango likuru chomene na lakwamba. Lachiŵiri, lakuyanako nalo ni ili: ‘Utemwenge mzengezgani wako nga umo ukujitemwera wamwene.’ Pa malango ghaŵiri agha ndipo pajintha Dango lose.” (Mateyu 22:34-40) Nangauli Ŵakhristu ŵali pasi pa Dango la Mozesi yayi, kweni ŵakwenera kutemwa Chiuta na ŵazengezgani ŵawo.—Yohane 13:34; 1 Yohane 4:20, 21.