•  Chifukwa nkhwenera kuchita maseŵera ghakukhozga thupi?

•  Ntchivichi chikunitondeska kuchita maseŵera ghakukhozga thupi?

•  Kasi nkhwenera kuchita maseŵera wuli kuti nikhozge thupi?

•  Muŵenge na mphaka

•  Ivyo ŵanyinu ŵakuyowoya

 Mu vyaru vinyake, ŵachinyamata ŵakutemwa yayi kuchita maseŵera ghakukhozga thupi ndipo ivi vikuŵika umoyo wawo pangozi. Baibolo likuti “maseŵero ghakukhozga thupi ghali na chandulo.” (1 Timote 4:8) Ghanaghanirani fundo izi:

•   Maseŵera ghakukhozga thupi ghangamovwirani kuti mukondwenge. Para tikuchita maseŵera, wongo withu ukufumiska tumaji tunyake uto tukovwira kuti tiŵenge ŵakukondwa kweniso kuti tijipulikenge makora. Lekani ŵanthu ŵanyake ŵakuti maseŵera ghakukhozga thupi, ni munkhwala wakuchepeskera kwenjerwa.

   “Para nachimbira mulenji, vinthu vikunendera makora chomene zuŵa ilo. Nkhuŵa wakukondwa chomene.”—Regina.

•   Maseŵera ghakukhozga thupi ghangamovwirani kuti muwonekenge makora. Kuchita maseŵera ghakukhozga thupi mwakwenelera, kungamovwirani kuti muŵe wankhongono, muŵe na umoyo uwemi kweniso kuti muleke kujidelera.

   “Nkhujipulika makora chomene para nkhuchita maseŵera ghakulendewera chinthu chinyake. Nkhulendewera kuluta muchanya na kukhira pasi maulendo 10. Chaka chamara nkhatondekanga kuchita na ulendo umoza wuwo. Kweni icho chikunikondweska chomene ntchakuti nkhuyezgayezga kupwelelera umoyo wane.”—Olivia.

•   Maseŵera ghakukhozga thupi ghangamovwirani kuti muŵe na umoyo utaliko. Maseŵera ghakovwira kuti mtima winu ugwirenge makora ntchito ndipo mukusuzgikira yayi pakuthuta. Ghangamovwiraniso kuti muleke kuŵa na nthenda ya mtima iyo yikukoma ŵanthu ŵanandi, ŵanalume na ŵanakazi wuwo.

   “Para tili na ndondomeko yiwemi yakuchitira maseŵera ghakukhozga thupi, ndikuti tikuwonga chawanangwa cha umoyo icho Mlengi wali kutipa.”—Jessica.

 Fundo yikuru: Maseŵera ghakukhozga thupi ghangamovwirani kuti muŵe na umoyo uwemi sono kweniso munthazi. Msungwana munyake zina lake Tonya wakati: “Muzamudandawurapo yayi para mukuchita maseŵera ghakukhozga thupi. Nane nkhudandawura yayi para naleka dankha ntchito zane kuti nichite maseŵera ghakukhozga thupi.”

 Vinyake mwa vinthu ivyo vingamutondeskani ni ivi:

•   Kuleka kumanya kuti ngakuzirwa. “Para uchali muwukirano ukughanaghana kuti vyose vili makora. Ukughanaghanako yayi kuti zuŵa linyake ungazakalwara. Ukughanaghana kuti ŵachekuru pera ndiwo ŵangalwara.”—Sophia..

•   Kusoŵa nyengo. “Pakuti nkhutangwanika chomene, nkhwenera kupatura nyengo ya kunozgera chakurya chiwemi na ya kugonera. Kweni vikunisuzga chomene kuti nisange nyengo yakuchitira maseŵera ghakukhozga thupi.”—Clarissa.

•   Kusoŵa ndalama ya kulipilira ku malo ghakuchitirako maseŵera ghakukhozga thupi. “Para ukukhumba kuti ulutenge ku malo ghakuchitirako maseŵera ghakukhozga thupi (jimu), ukwenera kulipira ndipo kanandi zikuŵa ndalama zinandi!”—Gina.

 Fundo yakuti mughanaghanirepo:

 Kasi ntchinthu wuli chikuru icho chikumutondeskani kuchita maseŵera ghakukhozga thupi? Nangauli ntchipusu yayi kuti mumazge suzgo ili, kweni vinthu vingamwenderani makora para mungachitapo kanthu.

 Wonani fundo zinyake izo zingamovwirani:

•   Manyani kuti ni udindo winu kupwelelera umoyo winu.—Ŵagalatiya 6:5.

•   Lekani kusinthasintha maghanoghano. (Mupharazgi 11:4) Mwachiyelezgero, para mulije ndalama za kulipilira ku jimu, mungachita waka maseŵera ghanyake kunyumba kwinu agho mukuwona kuti ghangamovwirani ndipo muchitenge nyengo zose.

•   Mufumbenge ŵanyinu ivyo ŵakuchita kuti ŵakhozge mathupi ghawo.—Zintharika 20:18.

•   Muŵenge na ndondomeko ya ivyo mukukhumba kufiska, ndipo mulembenge ivyo mwafiska.—Zintharika 21:5.

•   Sangani munyinu wakuti muchitirenge lumoza maseŵera ghakukhozga thupi. Munyinu wangamuchiskani na kumovwirani kuti mulondezgenge ndondomeko yinu nyengo zose.—Mupharazgi 4:9, 10.

•   Manyani kuti mukumanenge na masuzgo ghanyake, kweni ivi vileke kumugongoweskani.—Zintharika 24:10.

 Baibolo likuti ŵanalume na ŵanakazi ŵakwenera ‘kujikora mu vyakuchita.’ (1 Timote 3:2, 11) Ntheura ntchakuzirwa kuti muŵenge na mphaka para mukuchita maseŵera ghakukhozga thupi. Kanandi awo ŵakuchita maseŵera ghakukhozga thupi mwakujumphizga, ŵakupindura kalikose yayi. Msungwana munyake zina lake Julia wakati: “Nkhukondwa yayi na munyamata uyo wakuwoneka wavinkhongono (bawusa), kweni mahara walije.”

 Muŵenge maso na ŵanthu awo ŵakuchiska ŵanyawo kuti ŵachitenge maseŵera ghakukhozga thupi mwakujumphizga. Ivi vingananga umoyo winu na kumupangiskani kuti muluwe “ivyo ni vinthu vyakuzirwa chomene” pa umoyo.—Ŵafilipi 1:10.

 Para mungapulikira waka vyose ivyo ŵanthu ŵakuyowoya, paumaliro mukhuŵarenge waka. Msungwana munyake zina lake Vera wakati: “Ŵasungwana ŵanandi ŵakusunga vithuzi vya ŵanthu awo ŵakuwoneka makora kuti viŵakhozgenge, ndipo nawo ŵakulimbikira kuchita maseŵera ghakukhozga thupi kuti ŵafike pa ŵanthu aŵa. Kweni para ŵakuwona kuti ŵakutondeka, ŵakukhuŵara chomene. Imwe chilato chinu chiŵe chakuti mupwelelere thupi linu, kuti musinthe waka umo mukuwonekera yayi.”