Munyamata munyake zina lake Will wakati: “Munthu wangaboweka para wakuŵerenga Baibolo usange wakumanya yayi ivyo wangachita pakuŵerenga.”

 Kasi ukumanya ivyo ungachita kuti ukondwenge para ukuŵerenga Baibolo? Nkhani iyi yikovwirenge.

•  Uwonenge nga kuti nkhani iyo yikuchitika sono

•  Chita kafukufuku!

•  Ivyo ŵanyako ŵakuyowoya

 Ujitore kuti nawe ukaŵapo apo nkhani iyo ukuŵerenga yikachitikanga. Yezga kuchita vinthu ivi:

1.   Sankha nkhani yimoza iyo ukukhumba kuŵerenga. Ungasankha nkhani yiliyose mu Baibolo, ungatora mu mabuku gha Makani Ghawemi panji pa jw.org pa chigaŵa cha Madirama gha Nkhani za mu Baibolo.

2.   Ŵerenga nkhani iyo wasankha. Ungaŵazga cha mu mtima panji mwakukwezga pamoza na ŵabwezi panji ŵabali ŵako. Munthu yumoza wangaŵazga chigaŵa cha kulongosora nkhani ndipo ŵanyake ŵangaŵazga pa vigaŵa vya ŵanthu awo ŵakuzunulika mu nkhani.

3.   Yezga kuchita vinthu ivi:

   •   Jambura vithuzi kuti ulongosore ivyo vikuchitika. Panji ungajambura waka tuvithuzi kuti ulongosore umo nkhani yose yikaŵira kweniso nyengo iyo yikachitikira. Mumphepete mwa tuvithuzi ulembemo mazgu ghakulongosora ivyo vikuchitika.

   •   Jambura tchati. Mwachiyelezgero, para ukuŵerenga nkhani ya munthu munyake wakugomezgeka, wona ivyo vikamovwira kuti wachite nthena kweniso vitumbiko ivyo wakasanga.

   •   Ulongosore nkhani munthowa yakuti yachitika nadi. Uyilongosore munthowa zakupambanapambana, ungaŵa nga ukuŵafumba mafumbo ŵanthu awo ŵali mu nkhani iyo, kweniso awo ŵakaŵapo apo nkhani iyo yikachitikanga.

   •   Usange munthu munyake mu nkhani iyo ukuŵerenga wakachita makora yayi vinthu, ungayezgelera vinthu ivyo mphanyi vikamovwira kuti wachite makora. Mwachiyelezgero, ghanaghanira umo Petrosi wakakanira Yesu. (Mariko 14:66-72) Kasi mphanyi Petrosi wakazgora wuli pa nyengo yakusuzga iyi?

   •   Usange ungakwaniska, ungalemba nkhani yako iyo yajintha pa nkhani yinyake ya mu Baibolo. Ungalembaso ivyo ungasambirapo pa nkhani iyo.—Ŵaroma 15:4.

 Para wachita kafukufuku, ungasanga na kupulikiska fundo zakunyang’amira izo zili mu nkhani iyo. Lizgu limoza panji ghaŵiri ghangakovwira kuti usange fundo zakunyang’amira.

 Mwachiyelezgero, yaniska nkhani iyo yili pa Mateyu 28:7 na Mariko 16:7.

•    Chifukwa wuli apo Mariko wakayowoyanga vyakuti Yesu wamuwonekera ku ŵasambiri ŵake wakasazgirapo mazgu ghakuti “na Petrosi”?

•  Kuti usange zgoro: Mariko wakaŵapo yayi apo nkhani iyi yikachitikanga; wakwenera kuti wakapulika waka kwa Petrosi.

•  Fundo yakunyang’amira: Chifukwa wuli Petrosi wakakhumbanga kusimikizga kuti Yesu wakukhumba kukumanaso nayo? (Mariko 14:66-72) Kasi Yesu wakalongora wuli kuti wakaŵa mubwezi wanadi wa Petrosi? Kasi ungamuyezga wuli Yesu kuti uŵe mubwezi wanadi ku ŵanyako?

 Para ukuwona nkhani iyo ukuŵerenga nga kuti yikuchitika kweniso ukuchita kafukufuku, ukondwenge para ukuŵazga Baibolo!