Taŵakaboni ŵa Yehova tikutemwa chomene kuphalira ŵanyithu ivyo tikugomezga, kweni tikusopera lumoza na matchalitchi ghanyake yayi. Baibolo likuti Ŵakhristu ŵaunenesko ŵali nga ni viŵaro vyose vya thupi ivyo “vikukumana pamoza,” ndipo mbakukolerana chifukwa wose ŵali na chigomezgo chakuyana waka. (Ŵaefeso 4:16; 1 Ŵakorinte 1:10; Ŵafilipi 2:2) Ŵanthu ŵakutemwana, kulengerana lusungu, na kugowokerana. Kweni chakuzirwa chomene nkhumanya makora fundo za mu Baibolo. Ŵakaboni ŵa Yehova ŵakumanya kuti kuŵavyenge fundo izi mphanyi chipulikano chawo ntchambura ntchito.—Ŵaroma 10:2, 3.

 Baibolo likuti kusopera lumoza na matchalitchi ghanyake vikuyana waka na nyama ziŵiri zakupambana izo zakakika mu joko. Ivi vingananga chipulikano cha Mkhristu. (2 Ŵakorinte 6:14-17) Lekani Yesu wakazomerezgapo yayi ŵasambiri ŵake kusopera lumoza na visopa vinyake. (Mateyu 12:30; Yohane 14:6) Kweniso Dango ilo Chiuta wakapeleka kwa Mozesi, nalo likakanizganga Ŵaisrayeli kusopa pamoza na mitundu yinyake iyo yikasopanga ŵachiuta ŵangoza. (Ekisodo 34:11-14) Nyengo yinyake Ŵaisrayeli ŵakakana kuti ŵanthu awo ŵakasopanga ŵangoza ŵaŵawovwire pa ntchito ya Chiuta iyo ŵakagwiranga.—Ezira 4:1-3.

 Enya. Mu 2023 tikamalira maora 1,791,490,713 kupharazgira ŵanthu ŵa visopa vinyake. Nga umo Paulosi wakachitiranga, nase tikukhumba kumanya maghanoghano na vigomezgo vya “ŵanthu ŵanandi.” (1 Ŵakorinte 9:19-22) Para tikuchezga na ŵanthu, tikulondezga ulongozgi wa mu Baibolo wakuti tichindikenge awo tikuchezga nawo.—1 Petrosi 3:15.