Nkakurra omu Los Angeles, California, U.S.A., omu bicweka ebyali nibimanywa kubamu ebikoosi eby’abasigazi ha nguudo hamu n’okukozesa ebitokooza bwongo. Bazaire bange baali baine abaana mukaaga kandi nkaba ndi izaara lya kabiri.

Nyina itwe akatukuliza omu diini ey’ekipurotesitanti. Baitu obunahikire omu myaka y’obusigazi, nkatandika kuba n’obwomeezi obw’emiringo ebiri. Ha Sande nazinaga omu kwaya y’ekanisa. Kandi omu wiiki nagendaga omu pate, nkozesa ebitookoza bwongo, kandi nsiihana.

Nkaba nyine ekiniga ky’amaani. Nakozesaga eky’okurwanisa kyona kurora nasingura. Ebinayegaga ha kanisa bitankonyere. Nakiraga kugamba ngu: “Okuhoora enzigu kwa Ruhanga​—kandi nyowe ndi kikwato kye!” Obunkaba ndi omu siniya omu myaka eya 1960, nkatandika kugonza muno ekitebe eky’eby’obulemi ekirukumanywa nka Black Panthers ekyakozesaaga eby’okurwanisa kurora ngu ensonga ezirukukwata ha bugabe bw’abantu zagonjoorwa. Nketeraniza ha kitebe ekyateranizaaga abeegi abaali baine ebigendererwa nk’eby’ekitebe ekyo eky’eby’obulemi. Emirundi nyingi, haroho obutwayesaalingaga kandi bakinga n’isomero.

Baitu n’obukiraaba ngu twayesaalingaga, nahurraga ntamazirwe habwekiniga kingi ekinkaba nyine. Nkatandika kukora kubi abantu abanasorooraga. Ekyokurroraho, nyowe n’abanywani bange twakiraga kurora filimu ezirukwoleka omulingo abairu kuruga omu Afrika baabonabonesebwaga omu Amerika. Ebitwaroraga byatuleteraga kukwatwa ekiniga, niturwanisa abasigazi ab’erangi erukwera abatwabaga tuli nabo omu kibaanda kya filimu. Hanyuma twagendaga omu biikaro nambere abarukwera baikaraga, nituserra abantu abandi ab’okuteera.

Obukaba ndi haihi kuruga omu myaka ey’ensigaanto, nyowe n’abagenzi bange twali tumanyirwe kuba basuma, bayaayi kandi nk’abarukugonza muno kurwana. Twatungaga ebizibu n’abobusobozi. Omu ha bagenzi bange omuto kaba ali omu ha b’ekikoosi ekyakabi muno kandi nakiraga kuba nabo. Obwomeezi bwange bukaba nibweyongera kusiisikara.

Bazaire b’omu ha banywani bange baali Bakaiso ba Yahwe. Bakandaaliza omusorrokano zaabo ez’ekitebe kandi nkaikiriza kugenda nabo. Kurugira kimu ha kutandika, nkakirora ngu Abaakiaso ba Yahwe baali b’embaganiza. Buli omu akaba aine Baibuli n’agikozesa omu rusorrokano. Abato nabo bakaha embazo! Kikampuniriza muno kumanya ngu Ruhanga aine ibara, Yahwe kandi n’okuhurra nibalikozesa. (Zabuli 83:18) Ekitebe kyali kirumu abantu baingi kuruga omu mahanga agarukwahukana, baitu kandi kyali nikyeyolekera kimu ngu busaho kusoroorangana omu rangi.

Hakubanza, nkaba ntarukugonza kwega Baibuli n’Abakaiso ba Yahwe baitu nagonzaaga kugenda omu nsorrokano zaabo. Kiro kimu omu bwire bw’ekiro, obunkaba ndi omu nsorrokano, gurrupu y’abanywani bange bakagenda mu pate. Bakatera omusigazi kandi baamwita habwokuba akanga kubaha jaketi ye. Ekiro ekyayongiireho baali nibepanka habwekikorwa ekyo. Kandi omu kooti, obu baali nibabasomera omusango ogu baali bakozere, bakasekabuseka. Abarukukira obwingi omuli bo bakacwerwa ogw’okusibwa obwomeezi bwabo bwona. Mali kikansemeza ngu nkaba ntali nabo omu bwire bw’ekiro obu. Nkacwamu kuhindura obwomeezi bwange kandi natandika kwega Baibuli.

Habwokuba bansorooraga muno habw’erangi yange kumara emyaka nyingi, nkahunirra muno habw’ebintu narozere omu Bakaiso ba Yahwe. Ekyokurroraho, omu h’Abakaiso ba Yahwe ow’erangi erukwera obuyali n’agonza kugenda omu ihanga erindi, abaana be akabasiga omu ka y’abairaguzi. Ekindi, eka y’Abakaiso ba Yahwe ab’erangi erukwera bakaikiriza kwikara n’omusigazi omwiraguzi ow’akaba n’ayetaaga ah’okwikara. Nkakigumiza kimu ngu Abakaiso ba Yahwe nibahondera ebigambo bya Yesu binu ebirukusangwa omu Yohana 13:35: “Nukwo bona balimanya muli begeswa bange,obumurabaga nokugonzangana inywenka.” Nkakimanya ngu nkaba ntugire oruganda orw’amananu.

Obunkaba ninyega Baibuli nkakyetegereza ngu nkaba nsemeriire kuhindura entekereza yange. Nkaba nyine kuhindurra kimu ebitekerezo hatali kwikara omu businge kwonka baitu nkakirora ngu nubwo obwomeezi oburukukirayo oburungi. (Abarumi 12:2) Mpora mpora nkakurakurana kandi omu Janwali 1974, nkabatizibwa nk’omu ha Bakaiso ba Yahwe.

Baitu na hanyuma y’okubatizbwa, nkaikara nindengaho kurwanisa ekiniga kyange ekingi. Ekyokurroraho, kiro kimu obunkaba nitebeza enju ha nju, haroho omusuma ayali aibire rediyo kuruga omu motoka yange kandi nkamuhambya. Obunkaba ndi haihi kumukwata, akaginaga yagumizaamu nairuka. Obunagambiireho abandi nk’oku nkaba nyongiire natunga rediyo yange, omugurusi omu akankaguza ati: “Stephen, kakuba obaire omukwasire, wakumukozere ki?” Ekikaguzo eki kikandetera kutekereza kandi kyanyekambisa kwikara nindengaho kuba muntu arukulinda obusinge.

Omu Okitoba 1974, nkatandika kuheereza nk’omutebezi ow’akasumi koona, obu nimara esaaha 100 buli kwezi ninyegesa abandi ebirukukwata ha Baibuli. Hanyuma nkatunga omugisa gw’okuheereza nk’omukonyezi ha Kitebe Ekikuru eky’Abakaiso ba Yahwe omu Brooklyn, New York. Omu mwaka 1978, nkagaruka omu Los Angeles kurolerra nyina nyowe ow’akaba arwaire. Hanyuma y’emyaka ebiri, nkaswera mukazi wange omugonzebwa arukwetwa Aarhonda. Akansagika muno omu kurolerra nyina nyowe kuhikya nyina nyowe obuyafiire. Hanyuma y’akasumi, nyowe na Aarhonda tukagenda omu isomero lya Gilead kandi tukasindikwa omu Panama, nambere tukyaheereza nk’abaminsaani.

Kuruga mbatizibwa, nyikaire nimpikwaho enyikara ezigumire mali. Baitu nyegere kuhigiza abantu abarukulengaho kunyendereza nukwo bandetere kwetwaza omu mulingo ogutasemeriire. Abantu baingi, otwaliiremu n’amukazi wange bansiima habw’omulingo nyetwaza omu nyikara nk’ezi. Mali nanyowe nimpunirra! Tinsobora kugamba ngu ninyowe nsoboire kukora empindahinduka zinu habwange. Baitu amaani ga Baibuli nugo gankonyiire kuhindukira kimu.​—Abaheburaniya 4:12.

Baibuli enkonyiire kutunga ekigendererwa omu bwomeezi kandi enyegeseze kuba muntu ow’obusinge mali. Tinkyaserra abantu ab’okuteera, baitu hati mbakonyera kukira omu by’omwoyo. Nkegesaaho Baibuli n’ayali munyanzigwa wange obunkaba ndi omu siniya! Kandi hanyuma y’okubatizibwa kwe Tukaikaraho hamu kumara akasumi. N’okuhikya hati tuli banywani nfe na nfe. Kasumi kanu nyowe na mukazi wange tukonyiire abantu abarukuhingura omu 80 kufooka Abakaiso ba Yahwe obu nitubeegesa nabo Baibuli.

Ninsiima Yahwe ntaine bugarukiro habwo kumpa obwomeezi obwine ekigendererwa kandi obwijwire okusemererwa.