Nkakurra omu kiikaro ekikaba kirumu obucwi bw’ebiragiro bwingi omu rubuga rwa Montreal. Obunahikize emyezi mukaaga, ise nyowe akafa kandi nyina itwe nuwe yasigaire n’obujunaanizibwa bwona obw’eka. Ninyowe nkaba ninkirayo obuto omu baana munaana.

Obunkaba nkyali muto nkatandika kwejumbira omu kukozesa ebitokooza bwongo, kuteera ejaara, kurwana, n’okumara obwire n’abacwi b’ebiragiro. Obunahikize emyaka ikumi, nkatandika kukoragana n’abamalaaya nibantuma ebintu hamu n’okwohoza abantu sente kandi ninzitekaho amagoba maingi. Nakiraga kubiiha kandi nayegondezaaga omu kubuzabuza abantu nimbanyagaho sente. Kukora eki gukaba guli nk’omubazi hali nyowe.

Nambere nahikiize emyaka 14, nkaba nyeyongiire kuba mukugu omu kunyaga abantu. Ekyokurorraho, naguraga esaaha nyingi, empeta n’ebikomo ebisiigirwe erangi erukusisana nk’ezaabbu, nintekaho sitampu n’obwapa oburukwoleka ngu bikozerwe omu zaabbu yonka. Nabitundiraga ha rubaju rw’enguundo, omu maduuka hamu n’omu biikaro nambere hali abantu baingi. Nayegondezaaga omu kutunga sente eza bwangu bwangu. Haroho obunakozere sente za doola $10,000 omu kiro kimu!

Hanyuma y’okumbinga omu isomero ha myaka 15, nkaba ntaine hokwikara. Naraaraga ha rubaju rw’enguundo, nambere bemereza motoka rundi omu maka g’abanywani bange.

Habw’ebikorwa byange eby’okutunda ebicupuli, poliisi yakiraga kunkaguliiriza. Ntatwarwe omu nkomo habwokuba tinatundaga ebintu ebinyibire. Baitu emirundi nyingi bansasusaaga sente habw’okutunda ebicupuli, kwefoora ekintali, hamu n’okutunda ebintu ntaine ebihandiiko ebirukunyikiriza. Habwokuba tinatiinaga muntu wena, nasorozaaga sente eziroho amagoba maingi abandi ezibabaaga bohoize. Obwire obumu eki kyabaga ky’akabi, nahabweki nagendaga n’emundu. Obwire obumu nakoraga n’ebikoosi byabacwi b’ebiragiro.

Obunkaba nyine emyaka 17 nubwo narozere Baibuli omurundi gw’okubanza. Nkaba ninyikara n’omwisiki wange ayatandikire kwega Baibuli n’Abakaiso ba Yahwe. Nahabweki nkahakaniza endengo za Baibuli ezirukukwata ha ngeso, kandi nkamuleka nagenda kwikara n’omwisiki ondi.

Nkakwatwaho muno omwisiki onu nauwe obuyatandikire kwega Baibuli n’Abakaiso ba Yahwe! Akakora empindahinduka omu bwomeezi bwe kandi kikansemeza muno kurora ngu akatandika kuba muculeezi kandi arukugumiisiriza. Obunaraliziibwe kugenda omu nsorrokano ha Kyombeko ky’Obukama nkaikiriza. Abantu abarukuzooka kurungi kandi ab’embabazi nubo bantangiriire. Kinu mali kyali nikyahukanira kimu h’abantu abanaikaraga nabo! Nkaba ntakehurraga ngu ab’omu ka nibangonza. Batanyoleke okugonza kurugira kimu omu buto. Okugonza Abakaiso ba Yahwe okubanyolekere nukwo nkaba ninyegomba. Obubansabire kunyegesa Baibuli, n’okusemererwa kwingi nkaikiriza.

Ebinkaba ninyegega kuruga omu Baibuli bikajuna obwomeezi bwange. Nyowe n’abanywani bange babiri tukaba nitutekaniza kugenda ahantu kwiba nukwo nsobole kusasura amabanja aganatungire habwokwejumbira omu kuteera ejaara. Nkaba nyine amabanja agarukuhingura omu doola $50,000. Baitu hati nikinsemeza ngu ntagende kwiba! Banywani bange bakagumizaamu bagenda kwiba. Omu hali bo akakwatwa kandi ondi yaitwa.

Obunayeyongiire kwega Baibuli, nkakirora ngu haroho empindahinduka nyingi ezinsemeriire kukora. Ekyokurorraho, nkega Baibuli ekyeyegesa omu 1 Abakolinso 6:10 ngu: “Abasuma, nobubakuba abegombi, nobubakuba abatamizi, nobubakuba abatera enaku, nobubakuba abahogozi, tibaligwetwa bukama bwa Ruhanga.” Obunasomere orukarra runu, kandi natekerezaaho ebinkaba ninkora, nkarra. Nkakyetegereza ngu nkaba nsemeriire kuhindurra kimu obwomeezi bwange. (Abarumi 12:2) Nkaba ndi muntu w’ekiniga, arukugonza kurwana n’okubiiha ebisuba.

Baitu nkongera nayega ngu Yahwe w’embabazi kandi w’okuganyira. (Isaya 1:18) Nkasaba muno Yahwe namwesengereza ankonyere nyecwereho kimu ebintu ebibi ebinkaba ninkora. Habw’obukonyezi bwe, mporampora nkandika kuhindura engeso zange. Empindahinduka endi enkuru einakozere ekaba y’okuhandiikisa obuswere bwaitu.

Nkaba nyine emyaka 24 kandi tukaba twine abaana basatu. Hati nkaba nyine kuserra omulimo ogutarukucwa emisingi ya Baibuli. Ekindi nkaba ntaine obwegese bwahaiguru kandi ntaine bukugu bwona. Na ha murundi gunu, nkasaba muno Yahwe. Hanyuma nagenda kuserra omulimo. Hoona nambere nagendaga kuserra omulimo nabagambiraga ngu ningonza kuhindura obwomeezi bwange kandi nkole n’obwesigwa. Obwire obumu nabasoborraga nk’oku ndiyo ninyega Baibuli kandi ngu ningonza kufooka mwikazi murungi. Baingi bakanga kumpa omulimo. Baitu haroho nambere nagenzere bankaguza ebirukunkwataho, kandi hanyuma y’okubagambira obwomeezi bwange obwa kara, ow’akaba nankaguza akagamba ati: “Amananu gali tindukugonza kukuha omulimo, baitu haroho ekintu ekirukungambira ngu nsemeriire kugukuha.” Ninkigumiza kimu ngu Yahwe nuwe akagarukamu esaara yange. Hanyuma y’akasumi nyowe na mukazi wange tukabatizibwa nk’Abakaiso ba Yahwe.

Ninkigumya ngu nkyali mwomeezi habwokuteeka omu nkora emisingi ya Baibuli, n’okwetwaza omu mulingo gw’Ekikristaayo. Eka yange erumu okusemererwa. Nyine omuntu ow’omunda omurungi habwokuba ninkigumya ngu Yahwe akanganyira.

Mazire emyaka 14, ndi omu buheereza obw’akasumi koona, ninkonyera abantu kumanya Baibuli eky’eyegesa kandi enyumaho, na mukazi wange akanyeteranizaaho omu buheereza obw’akasumi koona. Omu myaka erukuhingura omu 30 eyehingwireho, ntungire okusemererwa habw’okukonyera abakozi bataahi bange 22 kutandika kuheereza Yahwe. Na hati ninkyagenda omu butale baitu tingendayo kunyaga abantu nk’oku nakoraga kara. Ngendayo kubaha okunihira okw’akasumi ak’omu maiso okw’okwikara omu nsi etarumu abanyagi n’abasuma.​—Zabuli 37:10, 11.