KUBAZA N’OMUTAAHI
Obukama Bwa Ruhanga Bukatandika Di Kulema? (Ekicweka 2)
Ebyolekerwe hansi, guli mulingo omu h’Abakaiso ba Yahwe asobora kuhingisaniza ebitekerezo n’omuntu ondi. Leka tugambe ngu ow’oruganda arukwetwa Cameron agarukire omu ka ey’omusaija arukwetwa Jon.
KWEYIJUKYAMU KAKE EKIROOTO KYA NEBUKADENEZA
Cameron: Nsemeriirwe kwongera kukurora Jon. Nkira kwegondeza omu kwega naiwe Baibuli buli wiiki. * Obwomeezi buli buta?
Jon: Buli kurungi.
Cameron: Kirungi ngu oli kurungi. Omurundi ogw’okumalirra obunkaba ndi hanu, tukabazaaho ensonga habwaki Abakaiso ba Yahwe bagamba ngu Obukama bwa Ruhanga bukatandika kulema omu 1914. * Nk’oku twarozere, tukatunga obwakaiso obukuru omu bunabbi obuli omu suura ya 4 ey’ekitabu kya Danieri. Noijuka nk’oku burukugamba?
Jon: Kikaba kirooto eky’Omukma Nebukadeneza ekirukukwata ha muti omukooto.
Cameron: Ego, nikyo kyonyini. Omu kirooto kye, Nebukadeneza akarora omuti omukooto ogukaba niguhikira kimu omu iguru. Akahurra omutumwa wa Ruhanga naragira ngu omuti gutemwe, baitu ekikoro n’emihama birekwe omu itaka. Hanyuma y’akasumi ‘ak’emirundi musanju,’ omuti gwakwongiire gukura. * Kandi tukarora ensonga habwaki obunabbi bunu bukahikirra omu miringo ebiri. Noijuka bukahikirra buta omu mulingo ogw’okubanza?
Jon: Kikaba kintu ekyahikireho Nebukadeneza wenyini, tinukwo? Akagwa iraru kumara emyaka musanju.
Cameron: Nikyo kyonyini. Habw’akasumi akagwa iraru, nahabweki obulemi bwe bukemerezebwamu. Baitu omulingo omukuru obunabbi bunu bukaba nibugenda kuhikirizibwamu, gwali ngu obulemi bwa Ruhanga bukaba nibugenda kwemerezebwamu kumara akasumi ak’emirundi musanju. Nk’oku twarozere, emirundi musanju ekatandika Yerusalemu obuyahwerekereziibwe omu 607 B.C.E. Kuruga omu kasumi ako, hakaba hatakyaroho abakama omu nsi abakaba nibakikirra Yahwe omu kulema abantu be. Baitu, ha kumalirra kw’emirundi musanju, Ruhanga akaba nagenda kukoma Omulemi omuhyaka kulema abantu be—omuntu onu yakubaire omu iguru. Ekirukumanyisa, kumalirra kw’emirundi musanju nukwo kwakwolekere kutandika kw’Obukama bwa Ruhanga kulema omu iguru. Hati tumazire kubazaaho emirundi musanju nambere yatandikiire. Nahabweki kakuba tumanya oburaiha obw’emirundi musanju, nubwo turamanya Obukama bwa Ruhanga bukatandika di kulema. Nambere twahika, oyetegeriize byona ebitubalizeeho?
Jon: Ego, kweyijukyamu kunu kunkonyire kubiijuka.
Cameron: Eki kirungi. Leka tugumizeemu turole oburaiha obw’emirundi musanju. Nubwo ndugire kwesomesa ebirukukwata ha isomo linu nukwo nyeyijukye ensonga enkuru. Ningenda kulengaho kuzikusobororra kurungi nk’oku ndukusobora.
Jon: Kale.
EMIRUNDI MUSANJU EHWAHO—EBIRO EBYA HA MPERO BITANDIKA
Cameron: Omu kuhikirizibwa okw’obunabbi bunu okw’okubanza okwali nikukwataho Nebukadeneza, emirundi musanju ekaba n’emanyisa emyaka musanju. Baitu omu kuhikirizibwa okurukukira obukuru, okurukukwataho Obukama bwa Ruhanga, emirundi musanju eine kuba eraihire kukira emyaka musanju.
Jon: Habwaki nogamba oti?
Cameron: Ensonga ey’okubanza, ijuka ngu emirundu musanju ekatandika Yerusalemu obuyahwerekereziibwe omu 607 B.C.E. Kakuba tutandika kubara kuruga omu mwaka ogu, emyaka musanju n’egarukira omu mwaka 600 B.C.E. Baitu busaho kintu kyona eky’amaani eyabaireho omu mwaka ogu ekirukukwata ha bulemi bwa Ruhanga. Ensonga eyakabiri, hanyuma y’emyaka nyingi Yesu obwakaba ali omu nsi akoleka ngu emirundi musanju ekaba etakahoireho.
Jon: Eeeh, ego. Naijuka hati.
Cameron: Nahabweki, omu kiikaro ky’okumanyisa emyaka musanju, emirundi musanju eine kuba n’emanyisa akasumi akaraihire kukiraho.
Jon: Karaihire kwingana nkaha?
Cameron: Ekitabu eky’Okusuku’rwa kiine akakwate ak’amaani n’ekitabu ekya Danieri, nikitukonyera kumanya emirundi musanju ningana nkaha. Nikyoleka ngu ebicu bisatu n’ekicweka rundi emirundi esatu n’ekicweka n’emanyisa ebiro 1,260. * Nahabweki emirundi musanju, n’etezaamu emirundi ebiri emirundi esatu n’ekicweka, ekirukumanyisa ebiro 2,520. Okyali hamu nanyowe?
Jon: Ego, nimpondera. Baitu tindukurora omu mulingo kinu kirukwoleka ngu Obukama bwa Ruhanga bukatandika kulema omu 1914.
Cameron: Kale, leka turole akakwate akaroho. Obwire obumu, omu bunabbi bwa Baibuli, ekiro kimu kimanyisa omwaka gumu. * Kakuba tusigikirra ha musingi ogw‘ekiro kimu kumanyisa omwaka gumu, emirundi musanju neeba n’emanyisa emyaka 2,520. Kakuba tubara emyaka 2,520 nitutandikira omu 607 B.C.E., nituhika omu mwaka 1914. * Ogu nugwo omulingo tuhika omu 1914 nk’omwaka emirundi musanju yahoireyo, kandi nugwo omwaka Yesu yatandikire kulema nk’Omukama w’Obukama bwa Ruhanga. Kandi kikuru kukimanya ngu ebintu eby’amaani omu nsi biizire nibibaho kuruga omu 1914, ebintu ebi bikaba birangirwe omu Baibuli ngu byakubaireho omu biro ebya ha mpero.
Jon: Bintu ki ebi?
Cameron: Tekerezaaho Yesu ekiyagambire ekirukusangwa omu Matayo 24:7. Yesu akabazaaho akasumi obuyakutandikire kulema nagamba ati: “Ihanga liriramagira ihanga, nomukama aliramagira omukama: halibaho ekiihe nemisisa handi na handi.” Wetegereze ngu Yesu akaranga ngu hakubaireho ibura ly’ebyokulya hamu n’emisisa omu kasumi ako. Hataroho kugurukyagurukya ensi ehikirweho ebizibu bingi nk’ebi omu kyasa ekihingwire, tinukwo?
Jon: Ago mananu.
Cameron: Ekindi, omu rukarra runu Yesu akaranga ngu ha kubaireho obulemu omu kasumi obuyakubaire nalema nk’Omukama w’Obukama bwa Ruhanga. Kandi omu kitabu eky’Okusuku’rwa Baibuli ekaranga ngu tihakubaireho obulemu omu ihanga limu lyonka, baitu ha kubaireho n’obulemu obwakukwasireho ensi yoona omu kasumi aka ha mpero. * Noijuka obulemu obw’ensi yoona obw’okubanza bukatandika di?
Jon: Omu 1914, omu mwaka nugwo gumu ogw’orukugamba ngu Yesu akatandika kulema! Eki nkaba ntakakitekerezaahoga.
Cameron: Obuturukuteraniza hamu binu byona, obunabbi oburukukwata ha mirundi musanju hamu n’obunabbi obundi oburukukwata ha kasumi aka ha mpero, mali nikikora amakuru. Abakaiso ba Yahwe nibakigumya ngu Yesu akatandika kulema nk’Omukama w’Obukama bwa Ruhanga omu 1914 kandi ngu ebiro ebya ha mpero bikatandika omu mwaka nugwo gumu *
Jon: Ninkyalengaho kwetegereza binu byona.
Cameron: Eki ninkyetegereza. Nk’oku nsangirwe nkugambiire, nanyowe kikantwarra akasumi kukyetegereza kurungi. Baitu hakire, nintekereza ngu okwega kwaitu kukukonyire kukirora ngu n’obukiraaba ngu omwaka 1914 tiguhandiikirwe omu Baibuli, enyikiriza ez’Abakaiso ba Yahwe ha mwaka gunu nizisigikirra ha Byahandiikirwe.
Jon: Ego, kinu kinsemeza muno hali iwe, buli kimu ekyogamba okisagika n’ekyahandiikirwe. Tosigikirra ha ntekereza yaawe. Baitu ekinkwekaguza, habwaki kinu kigumire muno kwetegereza. Habwaki Ruhanga ataratugambiire bbwa omu Baibuli ngu 1914 nugwo mwaka Yesu yakutandikire kulema omu iguru?
Cameron: Eki kikaguzo kirungi muno, Jon. Amananu gali, haroho ebintu bingi omu Byahandiikirwe ebitolekerwe bbwa. Nahabweki, habwaki Ruhanga yahandiikisize Baibuli omu mulingo ogurukwetaagisa abantu kuteekamu amaani kusobora kugyetegereza? Obundi eki nitusobora kukibazaaho ha murundi ogundi.
Jon: Eki ninkigonza.
Haroho ekikaguzo ekirukukwata ha Baibuli eky’otaaha n’oyekaguza? Haroho ekiwakugondeze kumanya ha nyegesa rundi enkora y’Abakaiso ba Yahwe? Obukiraaba nukwo kiri, n’osobora kukaguza omu h’Abakaiso ba Yahwe. Naija kukusoborra ensonga zinu.
^ Kurabira omu ntekaniza ey’okwegesa Baibuli, Abakaiso ba Yahwe bakira kubazaaho Baibuli n’abataahi baabo omu mulingo ogutekaniziibwe kurungi.
^ Rora ekicweka “Kubaza n’Omutaahi—Obukama Bwa Ruhanga Bukatandika Di Kulema?—Ekicweka 1” omu magaziini enu eya Okitobba 1, 2014.
^ Rora Danieri 4:23-25.
^ Rora Okusuku’rwa 12:6, 14.
^ Rora Okubara 14:34; Ezekyeri 4:6.
^ Rora caati “Ekirooto kya Nebukadeneza eky’Omuti.”
^ Rora Okusuku’rwa 6:4.
^ Rora esuura 9 eya katabu Baibuli Mali Eyegesa Ki? Akaatirwe Abakaiso ba Yahwe. Kandi akali na ha mukura ogwa www.jw.org.
