Nyikaire ningonza ebitwetoroire kurugira kimu omu buto bwange. Eka yaitu yayegondezaaga omu kugenda kurora ebibira ebirukusemeza n’enyanja ezirukuzooka kurungi ezaali zetoroire eka yaitu ey’ekaba eri omu tawuni ya Jyväskylä, omu Central Finland. Ekindi ngonza ebisoro. Obunkaba nkyali muto, n’agonzaaga kukiikira buli njangu n’embwa ebinaroraga! Obunkaba ninkura, nkakwatwaho habw’omulingo abantu batwazaamuga kubi ebisoro. Hanyuma y’akasumi nk’eteranizaaho ekitongole ekirukurwanirra obugabe bw’ebisoro nambere nasangire abantu abaine entekereza nk’eyange.

Tukakora kampeini z’okurwanirra obugabe bw’ebisoro. Twagabaga obutumwa kandi twesalinga hali eduuka ezatundaga ebyoya by’ebisoro hamu n’ebiikaro nambere batwara ebisoro kubirengesa n’okubiseruliirizaaho. Ekindi, tukatandikaho ekitongole ekihyaka ekirukulinda ebisoro. Habwokuba twakozesaaga amaani maingi kulengaho kuhikiriza ebigendererwa byaitu, twakiraga kwesanga niturwanisangana n’ab’obusobozi. Nkakwatwa kandi natwarwa omu mbuga z’ebiragiro emirundi nyingi.

Oihireho kusaalirirwa ebisoro, nkakwatwaho habw’ebizibu ebindi ebiri omu nsi. Hakumalirra, nketeraniza ha bitongole ebindi bingi otwaliremu n’ekitongole ekirukwetwa Amnesty International na Greenpeace. Amaani gange goona nkagateeka omu kusagika emirimo yabyo. Narwanirraga abanaku, abataine by’okulya hamu n’abantu abandi abatarukwesobora.

Baitu, mporampora nkakyetegereza ngu nkaba ntasobora kuhindura ensi. N’obukiraaba ngu ebitongole ebi bikasobora kumaraho ebizibu ebimu, ebizibu eby’amaani byaikaraga nibyeyongera. Kikasisana oti rundi amaani g’ekibi gaali gamalireeho kimu ensi yoona kandi busaho muntu ow’akaba aine eky’asobora kukoraho. Nkahwamu amaani.

Habwokuba nkehurra nyenuubire kandi ntaine bukonyezi, nkatandika kutekerezaaho Ruhanga na Baibuli. N’obukiraaba ngu nkaba nyegereho Baibuli n’Abakaiso ba Yahwe kandi n’asiima habw’embabazi n’okugonza okubaanyolekere, nkaba ntaketegekere kukora empindahinduka omu bwomeezi bwange. Baitu ha murundi gunu ebintu bikaba biri by’embaganiza.

Nkaihayo Baibuli yange natandika kugisoma. Ekaheheeza ebihooya ebinkaba nyine. Nkazoora ebyahandiikirwe kuruga omu Baibuli ebirukutwegesa kutwaza ebisoro omu mulingo ogw’embabazi. Ekyokurorraho, omu Enfumo 12:10 nihagamba ngu “abantu abarungi bafaaho ebisoro byabo.” (Good News Translation) Ekindi, nkakyetegereza ngu Ruhanga tali nuwe ndugirro y’ebizibu ebinyakuli omu nsi. Oihireho ebizibu byaitu byeyongiire habwokuba abantu abarukukira obwingi tibahondera oburagirizi bwe. Kikansemeza muno obunayegereho okugonza kwa Yahwe n’okugumiisiriza kwe.​—Zabuli 103:8-14.

Omu kasumi ako, nkasaba akatabu Baibuli Mali Eyegesa Ki? Hanyuma y’akacu kake ow’oruganda na mukazi we bakaija owange baasaba kunyegesa Baibuli kandi naikiriza. Ekindi, nkatandika kugenda omu nsorrokano z’Ekikristaayo ha Kyombeko ky’Obukama. Ekyarugiremu, amananu agali omu Baibuli gakatandika kumpika ha mutima.

Ninsiima muno habwokuba Baibuli ekankonyera kukora empindahinduka nyingi. Nkaleka kunywa etaaba n’amaarwa maingi. Nkasemezaamu omulingo n’azookamuga n’omulingo nabazaamuga. Kandi nkahinduramu entekereza yange hali ab’obusobozi. (Abarumi 13:1) Ekindi, nkaleka obusiihani.

Empindahinduka eyakizireyo kungumira kukora nukwo kuba n’entekereza ey’ehikire hali ebitongole ebyarwanirraga obugabe bw’abantu n’ebisoro. Mali kikantwarra akasumi kaingi. Ha kubanza, nkehurra ngu nkaba ningobeza ebitongole binu kakuba mbirugamu. Baitu nkakyetegereza ngu Obukama bwa Ruhanga nubwo bwonka oburukwija kumaraho ebizibu by’ensi yaitu. Nahabweki nkacwamu kukozesa amaani gange goona kusagika Obukama obu n’okukonyera abandi kubumanya.​—Matayo 6:33.

Obunkaba ninkyarwanirra obugabe bw’ebisoro n’abantu, naroraga ngu haroho abantu ab’emiringo ebiri​—abarungi n’ababi—​kandi nkaba nyetegekere kugira ekinakora hali abo abanaroraga nk’ababi. Baitu ninsiima muno habwokuba Baibuli ekankonyera kurwanisa enobi ey’amaani einkaba nyiniire abandi. Hati, ndengaho kukurakuraniza okugonza okw’Ekikristaayo hali abantu boona. (Matayo 5:44) Gumu ha miringo nyolekamu okugonza kunu, nukwo kutebeza amakuru amarungi ag’Obukama bwa Ruhanga. Nikinsemeza kurora omulingo omulimo gunu omurungi guleetaho obusinge, okusemererwa kandi guha abantu okunihira kwonyini.

Ntungire obusinge omu bitekerezo habwokuba ensonga nzirekiire Yahwe. Ninkigumya ngu uwe nk’omuhangi waitu talireka ebisoro n’abantu kubonabonesebwa ebiro n’ebiro, kandi talireka ensi yaitu enungi ekahwerekerezebwa. Kwahukanaho n’eki, kurabira omu Bukama bwe, naija kuterekereza ebintu byona ebisiisirwe. (Isaya 11:1-9) Ntungire okusemererwa kwingi habw’okumanya amananu ganu, n’okukonyera abandi kugaikiririzaamu. Tinkyayehurra ngu nsemeriire kuhindura ensi.