Yahwe akaha amaani abatebezi banu abakaba baine ekihika. Omu mwaka ogu gwonyini, omuhendo gw’abakolopoota rundi bapayoniya gukeyongera kuruga ha 225 kuhika 350. Kandi abatebezi 8,000 nubo bahaireyo ripooti ey’obuheereza ha kitebe ekikuru, ekintu ekikaba kitakabahoga. Yahwe akaha abantu be omugisa habwokuba baingi bakabahuliiriza.

Ebiro 21 Maaci, 1920, Joseph F. Rutherford, ayayebemberaga Abeegi ba Baibuli kasumi ako, akaha orubazo orwine omutwe “Obukaikuru bw’Abantu Abaroho Hati Tibalifa.” Abeegi ba Baibuli bakakora kyona ekirukusoboka kuraaliza abantu kwija ha rusorrokano runu. Bakapangisa emu ha hoolu ezirukukirayo obukooto omu New York City kandi bakagaba kaadi nka 320,000 kuraaliza abantu.

Hakaija abantu baingi muno kukira nk’oku bakaba nibanihira. Nk’oku hoolu ekaba eri y’abantu 5,000 bonka, abantu abandi 7,000 bataikirizibwe kutaahamu. Magaziini eya The Watch Tower ekagamba ngu “orusorrokano runu nurwo rwali nirukirrayo kimu kuba rw’obusinguzi omu nsorrokano Abeegi ba Baibuli batekaniize.”

Abeegi ba Baibuli bakamanywa muno habw’okurangirra ngu “obukaikuru bw’abantu abaroho hati tibalifa.” Kasumi ako, bakaba batakakyetegeriize ngu amakuru amarungi ag’Obukama gasemeriire kutebezebwa kukiraho. Baitu nabwo, obwekambi bwabo bwali bw’embaganiza muno. Munyaanya itwe Ida Olmstead, ayatandikire kwija omu nsorrokano omu 1902 akagamba ati: “Tukaba tukimanyire ngu emigisa ey’amaani hali abantu boona eri omu maiso, nahabweki tutaleke kutebeza amakuru amarungi.”

Kusobora kurora ngu haroho ebyokulya eby’omwoyo, ab’oruganda ha Beseri bakatandika kweterra ebitabu ebimu. Bakagura ekyoma eky’okubiteera kandi bapangisa enju nambere bakitaire ey’ekaba eri haihi na Beseri ha 35 Myrtle Avenue omu Brooklyn, New York.

Ab’oruganda Leo Pelle na Walter Kessler bakatandika kuheereza ha Beseri omu Janwali 1920. Walter n’agamba ati: “Obutwahikire, ow’oruganda ow’akaba n’arolerra omulimo ogw’okuteera ebitabu akaturora kandi yagamba ati, ‘Nihaburayo esaaha emu n’ekicweka obwire bw’ekyanyamusana buhike.’ Nahabweki, akatuheraho omulimo ogw’okusomba katoni z’ebitabu kuruga omu kisiika kya hansi.”

Leo n’abazaaho ekyabaireho ekiro ekyahondiireho: “Tukahebwa omulimo ogw’okwogya ebisiika omu kalina ey’okubanza. Nkaba ntakakoraga omulimo  omurofu nk’ogu. Baitu habwokuba tukaba nitukorra Yahwe, tukagukora.”

Omu wiiki nke muno, magaziini eya The Watch Tower ekaba n’eteerwa abaheereza abekambi kandi abehaireyo. Bakateera magaziini emitwaro mukaaga eza The Watch Tower eya Febwali 1, 1920 nibakozesa ekyoma ekirukwetwa flatbed press ekikaba kiri omu kalina eyakabiri. Kandi omu kisiika ekya hansi ab’oruganda bakaba baliyo nibatekayo ekyoma ekindi eky’okuteera ebitabu ekibayesere ekirukirro Battleship. Bakatandika n’okuteera magaziini The Golden Age nibatandika na magaziini eya Apuli 14, 1920. Hataroho kugurukyagurukya kwona, Yahwe akaha emigisa abakozi abo abaali behaireyo.

Abantu ba Yahwe bakongera bayegondeza omulimo gw’abo kandi batunga obumu. Baitu, Abeegi ba Baibuli abamu bakaba barugire omu kitebe omu kasumi ak’okulengwa akatandikire omu 1917 kuhika 1919. Kiki ekyali kiine kukorwa kubakonyera?

The Watch Tower eya Apuli 1, 1920, ekaba erumu ekicweka ekiine omutwe “Katwikale omu Businge.” Omu mulingo ogw’okugonza, ekicweka eki kikagamba kiti: “Nitukigumya ngu . . . omuntu wena anyakwine omwoyo ogurukwera kuruga ha Mukama waitu . . . aikiriza kwebwa eby’enyuma, . . . kwikara omu bumu kandi n’okukorra hamu n’abandi nk’omubiri gumu.”

Baingi bakakorra ha bigambo ebi eby’embabazi. Ow’oruganda omu na mukazi we bakahandiika nibagamba bati: “Nitukigumiza kimu ngu omwaka oguhoire n’okukiraho tukakora ensobi ey’okurolerra kwonka kandi kunu abandi nibakora omulimo [ogw’okutebeza]. . . . Twine okunihira ngu titulyongera kuhabisibwa.” Abakozi banu abaali bagarukirwemu amaani bakaba baine omulimo mwingi ogw’okukora.

Omu Juuni 21, 1920, Abeegi ba Baibuli bakatandika kampaini ey’okugaba ekitabu ekirukwetwa The Finished Mystery * ekyali kiine idipa ly’orupapura kandi ekibayesere “ZG.” Omuhendo mwingi  ogw’ebitabu binu gukahurwa ekitabu kinu obukyatangirwe omu 1918.

Abatebezi boona, hatali abakolopoota bonka, bakasabwa kwejumbira omu kugaba ekitabu kinu. “Buli omu wena omu kitebe ow’ayehaireyo [ow’abatiziibwe] ow’arukusobora kwejumbira omu mulimo gunu, akikole ayegondiize. Leka enu ebe mooto ya buli omu wena hati: ‘Kinu nikyo nyine kukora​—kugaba ZG.” Ow’oruganda Edmund Hooper akagamba ngu omu kampaini enu baingi nubwo babandize kutebeza nju ha nju. Akongeraho ati: “Tukatandika kwetegereza kurungi omulimo gunu ogwali nigugenda kweyongera kukira nk’oku twali nitunihira.”

Nk’oku kyali kitanguhire kubaza n’Abeegi ba Baibuli ab’omu mahanga agandi omu kasumi ak’Obulemu obw’Ensi Yoona obw’Okubanza, Ow’oruganda Rutherford akaba n’agonza kugarramu ab’oruganda abo amaani n’okwongera kutekaniza omulimo ogw’okutebeza. Nahabweki omu Agusto 12, 1920, uwe n’ab’oruganda abandi bbana bakatandika orugendo oruraihire orw’okugenda Bungereza hamu n’omu mahanga agandi.

Rutherford obuyahikire Bungereza, Abeegi ba Baibuli bakatunga ensorrokano enkooto isatu kandi n’ensorrokano ezindi 12. Abantu nka 50,000 nibateberezebwa kuba babaire omu nsorrokano zinu. Magaziini eya The Watch Tower ekabazaaho orubungo runu eti: “Ab’oruganda bakagarurwamu muno amaani. Bakeyongera kuba omu bumu, kukorra hamu omu buheereza, kandi eki kikabaletera okusemererwa.” Omu Paris, Ow’oruganda Rutherford akongera yaha orubazo “Obukaikuru bw’Abantu Abomiire Hati Tibalifa.” Nambere orubazo rw’atandikiire hoolu ekaba ijwire. Abantu bikumi bisatu bakasaba kumanya ebirukukiraho.

Omu wiiki ez’ayongiireho, ab’oruganda abamu bakabungira ebibuga Athens, Cairo, na Yerusalemu. Kwongera kukonyera abantu abayolekere okugonza omu bicweka binu, Rutherford akatandikaho dipo y’ebitabu omu tawuni ya Ramallah, haihi na Yerusalemu. Hanyuma akagaruka Bulaaya yatandikaho ofiisi ey’okurolerra ebicweka ebiri hagati ya Bulaaya kandi yakora entekaniza ez’okutandika kuteera ebitabu.

Omu Sebutemba 1920, Abeegi ba Baibuli bakaturukya magaziini eya The Golden Age eya Na. 27, ey’embaganiza eyayolekere okuhiganizibwa kw’Abeegi ba Baibuli omu 1918. Ekyoma Battleship, ekitubalizeehoga kyakoraga nyamusana n’ekiro kuturukya magaziini zinu ezahingwire omu bukaikuru bbuna.

 Abasomi ba magaziini enu bakasomaho omusango ogurukuhuniriza ogwa munyaanya itwe Emma Martin. Munyaanya itwe Martin akaba ali mukolopoota omu San Bernardino, California. Omu Maaci 17, 1918, uwe n’ab’oruganda basatu banu, E. Hamm, E. J. Sonnenburg, na E. A. Stevens, bakagenda omu rusorrokano orutaito orw’Abeegi ba Baibuli.

Omusaija omu ow’akaba aizire omu rusorrokano runu, ataije kwegaho Baibuli. Hanyuma akagamba ati: “Nkagenda omu rusorrokano oru . . . habwokuba nkaba ntumirwe ofiisi ey’erukujunanizibwa n’okunyegerra emisango. Nkagendayo n’ekigendererwa eky’okuserra obwakaiso.” Akatunga ekitabu The Finished Mystery kandi bunu nubwo “obwakaiso” akaba n’aserra. Hanyuma y’ebiro bike, Munyaanya itwe Martin hamu n’ab’oruganda basatu bakakwatwa. Bakajunaanwa omusango ogw’okugaba ekitabu ekyali kitangirwe.

Emma hamu n’abagenzi be bakasingwa omusango kandi bacwerwa emyaka esatu omu nkomo. Bakagenda omu nkomo Maayi 17, 1920, hanyuma y’okujurra emirundi nyingi bikalema. Baitu omu kasumi kake ebintu bikahinduka.

Omu Juuni 20, 1920, Ow’oruganda Rutherford akabazaaho ekyahikireho ab’oruganda abo obwakaba ali ha rusorrokano orukooto omu San Francisco. Abantu bakasalirwa muno obubahulire omulingo Abakristaayo banu batwazibwemu, nahabweki bakasindikira Purezidenti wa Amerika ebbaruha. Bakahandika bati: Kusingisa Omukyara Martin omusango. . . ngu acwire ebiragiro, tikiri ky’obwinganiza. . . , ab’obusobozi kukozesa kubi ofiisi yabo. . . kutega . . . Omukyara. Martin . . . kandi hanyuma kumusibaho omusango nukwo bamusindike omu nkomo nitukijumirra habwokuba . . . tikihikire nakake.”

Ekiro ekyayongireho Purezidenti Woodrow Wilson akaganyira aho naaho Munyaanya itwe Martin hamu n’Ab’oruganda Hamm, Sonnenburg, na Stevens. Kusibwa kwabo okutali kw’obwinganiza kukagarukira aho.

Ha kumalirra kwa 1920, Abeegi ba Baibuli bakakyetegereza ngu haali habaireho ebintu ebingi eby’abaletiire okusemererwa. Omulimo ha kitebe ekiikuro gukagumizaamu kweyongera, kandi Abeegi ba Baibuli bakeyongerra kutebeza kukira nakara ngu Obukama bwa Ruhanga nubwo buramaraho ebizibu by’abantu. (Mat. 24:14) Omwaka ogw’ahondiireho, ogwa 1921, gwali nigugenda kuba mwaka ogwokwongerra kimu kurangirra Obukama.