1. Yahwe akaha ata abaheereza be abaakara amaani?

 EKIGAMBO kya Ruhanga kikira kubazaaho abasaija abesigwa nk’abamanzi. Baitu tinukwo baayehurraga obwire bwona. Ekyokurorraho, haroho Omukama Daudi obuyayehurraga agumire ‘nk’orusozi,’ baitu obwire obundi yayehurraga ‘ayetuntwire.’ (Zab. 30:7) N’obukiraaba ngu Samusoni akaba aine amaani maingi habw’omwoyo gwa Ruhanga, akakyetegereza ngu obuyabaga ataine amaani ganu ‘yafookaga muceke, nasisana nk’abantu abandi.’ (Bac. 14:​5, 6; 16:17) Yahwe nuwe yahaga abasaija banu abesigwa amaani.

2. Habwaki omukwenda Paulo yagambire ngu obuyabaga ali muceke akasumi nuko kamu yabaga ali w’amaani? (2 Abakolinso 12:​9, 10)

² Omukwenda Paulo akagamba ngu nauwe yayetaagaga amaani kuruga hali Yahwe. (Soma 2 Abakolinso 12:​9, 10.) Kusisanaho naitwe, Paulo nauwe yatalibanizibwa endwaire. (Bag. 4:​13, 14) Ekindi, obwire obumu, kyamugumiraga kukora ekihikire. (Bar. 7:​18, 19) Kandi obundi, yayeralikirraga ekyakumuhikireho. (2 Kol. 1:​8, 9) Baitu, obuyabaga ahoirwemu amaani, nubwo yafookaga w’amaani. Omu mulingo ki? Yahwe yahaga Paulo amaani agamukonyeraga kugumira ebizibu.

3. Bikaguzo ki ebiturukwija kugarukamu omu kicweka kinu?

³ Naitwe Yahwe naraganiza kutuha amaani kugumiisiriza ebizibu. (1 Pet. 5:10) Baitu tutanihira ngu nitwija kutunga amaani ago tutaine ekitukozereho. Ekyokurorraho, injini niyo eha motoka amaani ag’okugenda, baitu tesobora kugenda kakuba omuvugi atarubata ha murro. Omu mulingo nugwo gumu, Yahwe ayetekaniize kutuha amaani baitu naitwe tusemeriire kugira ekitwakoraho. Miringo ki Yahwe eyakozesa  kutuha amaani? Kandi tusemeriire kukora ki kusobora kutunga amaani ago? Nitwija kutunga eby’okugarukamu by’ebikaguzo binu obuturayegaho omulingo Yahwe yahaire nabbi Yona, Malyamu nyina Yesu, n’omukwenda Paulo amaani. Ekindi, nitwija kurora omulingo Yahwe aha abaheereza be ab’omu kasumi kanu amaani nakozesa emiringo niyo emu.

4. Nitusobora tuta kutunga amaani kuruga hali Yahwe?

⁴ Gumu ha miringo tusobora kutunga amaani kuruga hali Yahwe nukwo kumusaba. Agarukamu esaara zaitu kuraba omu kutuha “amaani agali amaingi muno.” (2 Kol. 4:7) Ekindi, nitusobora kutunga amaani kuraba omu kwesomesa Ekigambo kye Baibuli n’okukyecumiitirizaaho. (Zab. 86:11) Obutumwa bwa Yahwe haliitwe oburukusangwa omu Baibuli bwine ‘amaani.’ (Baheb. 4:12) Obworamusaba kandi okasoma Ekigambo kye, noija kutunga amaani ag’orukwetaaga kugumiisiriza, kwikara oine okusemererwa, n’okuhikiiriza obujunanizibwa obugumire. Wetegereze omulingo Yahwe yahaire nabbi Yona obumanzi n’amaani.

5. Habwaki nabbi Yona akaba nayetaaga obumanzi n’amaani?

⁵ Nabbi Yona akaba nayetaaga amaani n’obumanzi. Akaba atiinire kugenda nambere Yahwe akaba musindikire. Nahabweki, akairuka yagenda omu kiikaro ekindi. Ekyarugiremu, akaba ali haihi kufa ihunga ery’amaani obulyatiire kandi akateeka n’obwomeezi obw’abantu abakaba ali nabo omu kabi. Obuyanagirwe omu maizi, encu enkooto ekamumira, kandi aine kuba yatiinire muno obwakaba ali omunda y’encu. Notekereza Yona akehurra ata? Obundi n’asobora kuba yatekeriize ngu nagenda kufa. Rundi n’asobora kuba yatekeriize ngu Yahwe amusigireho. Mali Yona n’asobora kuba yatiinire muno.

6. Kusigikirra ha Yona 2:​1, 2, 7, Yona akakora ki kutunga amaani obwakaba ali munda y’encu?

⁶ Kiki Yona ekiyakozere kutunga amaani obwakaba ali munda y’encu? Eky’okubanza, akasaba Yahwe. (Soma Yona 2:​1, 2, 7.) N’obukiraaba ngu Yona akaba ayangire kuhuliiriza, akegarukamu kandi akaba nakigumya ngu Yahwe naija kuhurra esaara ye. Ekindi, Yona akecumiitirizaaho Ebyahandiikirwe ebyakaba asomere. Habwaki nitugamba tuti? Habwokuba esaara ye erukusangwa omu Yona esuura 2, erumu ebigambo bingi ebirukusisana n’ebiri omu Zabuli. (Lengesaniza Yona 2:​2, 5 na Zabuli 69:1; 86:7.) Nikyeyoleka kurungi ngu Yona akaba namanya enkarra ezi. Kandi obuyazecumiitirizeeho, zikamugumya ngu Yahwe akaba naija kumukonyera. Hanyuma, encu ekatanaka Yona ha musa gw’enyanja kandi akaba ayetekaniize kuhikiiriza obujunanizibwa Yahwe obwakaba amuhaire.​—Yona 2:10–3:4.

7-8. Ow’oruganda kuruga Taiwan asoboire ata kutunga amaani obuyatungire ebizibu?

⁷ Ekyokurorraho kya Yona nikisobora kutukonyera obuturukuba nituraba omu bizibu. Ekyokurorraho, Ow’oruganda Zhiming b kuruga omu ihanga lya Taiwan natalibanizibwa oburwaire obw’amaani. Ekindi, ab’omu ka ye nibamuhakaniza habwokuba ali omu h’Abakaiso ba Yahwe. Kusaba hali Yahwe n’okwesomesa bimukonyera kutunga amaani. N’agamba ati: “Obwire obumu, obuntunga ekizibu kingumira kuteekana kandi mba ntasobora kwesomesa. Baitu nsaba Yahwe kandi hanyuma nkwata obuzindaaro nimbuteeka omu matu nimpuliiriza ebizina by’Obukama. Kandi obwire obumu mbizina omu iraka erya  hansi kuhikya obunteekana nkatandika kwesomesa.”

⁸ Ebintu Zhiming ebiyayegere omu kwesomesa Baibuli bikamukonyera kugumiisiriza. Ekyokurorraho, obwakaba amazire kusemezebwa, dakitaali akamugambira ngu esagama ye terukumara, kandi kikaba nikyetaagisa kumuteekamu esagama. Omu bwire bw’ekiro atakasemeziibwe, Zhiming akaba asomereho ekyokurorraho kya munyaanya itwe ayahikirweho enyikara nk’eye, baitu ataikirize kuteekwamu esagama kandi akakira kurungi. Ekyokurorraho eki kikagumya Zhiming kwikara ali mwesigwa hali Yahwe.

9. Kiki eky’osobora kukora kakuba oba oyetuntwire habw’ebizibu? (Rora ebisisani.)

⁹ Obwoba oine ekizibu, kikugumira kusaba Yahwe okamugambira nk’oku orukwehurra? Rundi, ohurra otaine maani n’ekihika eky’okwesomesa? Ijuka ngu Yahwe nayetegereza kurungi enyikara ey’orukurabamu. Nahabweki kigumye ngu n’obworasaba esaara engufu, Yahwe naija kukuha kyonyini ekyorukwetaaga. (Bef. 3:20) Kakuba kiba nikikugumira kwesomesa habwokuba torukwehurra kurungi rundi oli muceke omu mubiri, n’osobora kuhuliiriza Baibuli rundi ebitabu byaitu ebikwasirwe omu maraka. Nikisobora n’okukukonyera kakuba ohuliiriza ebizina byaitu, rundi okarora vidiyo ha jw.org. Obworasaba Yahwe kandi okarora omulingo arukugarukamu esaara zaawe nakozesa Baibuli n’ebintu ebituheebwa ekitebe kye, noija kutunga amaani agaturukwetaaga.

10. Ab’oruganda na banyaanya itwe batugarramu bata amaani?

¹⁰ Yahwe n’asobora kukozesa ab’oruganda na banyaanya itwe kutugarramu amaani. Nibasobora kutuhuumuza obutuba nituraba omu bizibu, kandi batwekambisa obututunga obujunanizibwa obugumire. (Bak. 4:​10, 11) Tukira kwetaaga abanywani omu kasumi ‘ak’obujune.’ (Nfu. 17:17) Obutuba tuhoirwemu amaani, ab’oruganda na banyaanya itwe batuha ebiturukwetaaga, batuhuumuza kandi batwekambisa kugumizaamu nituheereza Yahwe n’obwesigwa. Tekerezaaho omulingo abantu abandi baakonyiire Malyamu nyina Yesu.

11. Habwaki Malyamu akaba nayetaaga amaani?

 ¹¹ Malyamu akaba nayetaaga amaani ag’okukora Yahwe ebyagonza. Tekerezaaho omulingo yayehuliire malaika Gabiryeri obuyamugambiire obujunanizibwa obw’amaani obwakaba naija kutunga. Akaba atali omu buswere baitu akaba naija kutwara enda. Akaba atakakuzaaga abaana abe habwe, baitu hati akaba nagenda kukuza omwana ayakufookere Masiya. Ekindi, akaba atakabyamaga n’omusaija wena. Malyamu aine kuba yayeralikiriire nk’oku yakusoboroliire Yusufu omusaija ow’akaba amujumbiire!​—Luk. 1:​26-33.

12. Kusigikirra ha Luka 1:​39-45, Malyamu akasobora ata kutunga amaani agakaba nayetaaga?

¹² Kiki ekyakonyiire Malyamu kuhikiiriza obujunanizibwa obu obw’amaani kandi obutanguhire? Akasaba abandi obukonyezi. Ekyokurorraho, akasaba malaika Gabiryeri kumugambira ebirukukiraho ha bujunanizibwa bunu. (Luk. 1:34) Hanyuma, akagenda Yuda omu nsi ey’ensozi kubungira Erisabesi omunyabuzaale we. Orugendo oru, rukamugasira muno. Erisabesi akasiima Malyamu kandi Yahwe yamuleetera kubaza obunabbi oburukugarramu amaani oburukukwata ha mwana wa Malyamu ow’akaba akyali munda. (Soma Luka 1:​39-45.) Malyamu akagamba ngu Yahwe akaba “ayolekere amani nomukonogwe.” (Luk. 1:​46-51) Yahwe akagarramu Malyamu amaani nakozesa malaika Gabiryeri na Erisabesi.

13. Munyaanya itwe kuruga Bolivia akatunga birungi ki obuyaserwire obukonyezi hali ab’oruganda na banyaanya itwe?

¹³ Ab’oruganda na banyaanya itwe nibasobora kukugarramu amaani. Munyaanya itwe arukwetwa Dasuri, kuruga Bolivia, akaba nayetaaga kugarurwamu amaani. Ise obubamukebiremu oburwaire obw’amaani kandi obutarukukira, Dasuri akaba ayetekaniize kumurwaza. (1 Tim. 5:4) Baitu eki kitamwanguhire. N’agamba ati: “Emirundi nyingi, nkehurra ntakyasobora kugumizaamu nimmurwaza.” Ha kubanza, akanga kusaba obukonyezi. N’agamba ati: “Nkaba ntarukugonza kutalibaniza ab’oruganda kandi nkaba nintekereza ngu Yahwe naija kumpa obukonyezi bwona obundukwetaaga. Baitu nkakyetegereza ngu kwesoroora h’abantu abandi nkaba nindengaho kwemarra ebizibu byange nyenka.” (Nfu. 18:1) Dasuri akacwamu kuhandiikira bamu h’abanywani be kandi yabagambira enyikara ey’akaba arumu. N’agamba ati: “Ebigambo tibisobora kusoborra omulingo Abakristaayo bagenzi bange bangarwiremu amaani. Bakandetera ebyokulya omu irwarro, kandi bansomera ebyahandikirwe ebirukugarramu amaani. Mali nikigarramu amaani kukimanya ngu tituli itwenka. Tuli kicweka eky’eka ya Yahwe enkooto ey’erumu abantu abetekaniize kutukonyera, kurra hamu naitwe, kutuhuumuza, n’okutwekambisa.”

14. Habwaki tusemeriire kwikiriza abagurusi kutukonyera?

¹⁴ Omulingo ogundi Yahwe ogw’atuha amaani nukwo kuraba omu bagurusi b’ekitebe. Abagurusi bali bisembo kandi Yahwe abakozesa kutugarramu amaani. (Is. 32:​1, 2) Nahabweki, obworukuba oyetuntwire, bagambire ebirukukweraliikiriza. Obubaragonza kukonyera, ikiriza obukonyezi bwabo. Yahwe n’asobora kukuha amaani kuraba omu bagurusi.

15. Kunihira ki Abakristaayo boona okubaine?

¹⁵ Emirago ey’omu Baibuli etuha okunihira n’amaani ag’okugumizaamu nituheereza  Yahwe. (Bar. 4:​3, 18-20) Abakristaayo abamu baine okunihira okw’okugenda omu iguru kandi abandi baine okunihira okw’okwomeera omu nsi ebiro n’ebiro. Okunihira kutukonyera kugumira ebizibu, kutebeza amakuru amarungi, n’okuhikiiriza obujunanizibwa obutwine omu kitebe. (1 Bas. 1:3) Omukwenda Paulo akagarurwamu amaani habw’okunihira.

16. Habwaki omukwenda Paulo akaba nayetaaga amaani?

¹⁶ Paulo akaba nayetaaga amaani. Omu bbaruha eiyahandikiire Abakolinso akerengesaniza n’ekibindi ekiibumba. Akaba “agosirwe embaju zona,” ‘ayetuntwire,’ ‘nahiigwa,’ kandi ‘anagirwe hansi.’ Obwire obumu obwomeezi bwe bwabaga omu kabi. (2 Kol. 4:​8-10) Paulo akahandiika ebigambo binu obwakaba ali omu rugendo rwe orwakasatu orw’obumiisani. Hanyuma y’okuhandiika ebigambo binu, akahikwaho enyikara ezindi ezigumire muno. Ekiyooro ky’abantu kikamuteera, yateekwa omu nkomo, kandi obwato obwakaba arumu bukacweka.

17. Kusigikirra ha 2 Abakolinso 4:​16-18, kiki ekyakonyiire Paulo kugumira ebizibu?

¹⁷ Paulo akatunga amaani ag’okugumira ebizibu binu habwokuba akateeka omutima ha kunihira kwe. (Soma 2 Abakolinso 4:​16-18.) Akagambira Abakolinso ngu n’obukiraaba ngu omubiri gwe gwali ‘niguhwaho,’ akabatarukwija kuhwamu amaani. Paulo akateeka omutima ha busumi bwe obw’omumaiso. Okunihira okwakaba aine okw’okutunga obwomeezi obutahwaho omu iguru kukaba ‘kw’ekitiinisa kingi,’ kukira emihito yoona ey’akaba narabamu. Obuyayecumiitirizaahoga okunihira oku akeyongera ‘kugarurwa buhyaka bukyabukya.’

18. Okunihira kugarwiremu kuta Tihomir n’eka ye amaani?

¹⁸ Okunihira okw’omu kasumi ak’omumaiso kugarramu amaani Ow’oruganda Tihomir kuruga Bulgaria. Emyaka nke enyuma muto we arukwetwa Zdravko, akafeera omu butandwa. Kumara akasumi, Tihomir akaikara naganya muno. Kusobora kuguma uwe n’eka  ye, bateeramu akasisani okuhumbuuka nikubaho. N’agamba ati: “Tubazaaho nambere tulitangatanganira Zdravko, ebyokulya ebitulimucumbira, abantu abatukiraaliza ha bugenyi bwe obw’okuhuumbuka, n’okumugambira nk’oku ebiro bya ha mpero byabaire.” Tihomir n’agamba ngu kuteeka omutima ha kunihira okw’omu kasumi ak’omumaiso, kibakonyera kugumiisiriza n’okulindirra akasumi Yahwe obwalihumbuura muto we.

19. N’osobora ota kugumya okunihira kwawe? (Rora ekisisani.)

¹⁹ N’osobora ota kugumya okunihira kwawe? Ekyokurorraho, obworaaba oine okunihira okw’okwikara omu nsi ebiro n’ebiro, somaho ebyahandiikirwe ebirukubazaaho orugonjo orurungi kandi obyecumiitirizeeho. (Is. 25:8; 32:​16-18) Tekerezaaho omulingo obwomeezi buliba omu nsi empyaka kandi oteeremu akasisani ohikireyo. Tekerezaaho abantu ab’orukugonza kurora, n’ebintu ebyorukugonza kuhurra n’okurora. Kusobora kukukonyera kuteeramu akasisani, n’osobora kurora ebisisani ebiri omu bitabu byaitu ebirukwoleka omulingo ensi empyaka eriba rundi rora vidiyo ey’ekizina Ensi Empyaka Erukwija, Ensi Empyaka Iriire Haihi, rundi Teramu Akasisani Orole Akasumi. Obuturaikara nitutekerezaaho omulingo obwomeezi buliba omu nsi empyaka, nitwija kurora ebizibu byaitu nk’ebitarukulemeera muno kandi nk’eby’akacu kake. (2 Kol. 4:17) Okunihira Yahwe okwatuhaire nikwija kutukonyera kugumira ebizibu.

20. Nitusobora tuta kugarurwamu amaani obutuba nitwehurra ngu tuli baceke?

²⁰ Obutwehurra tuli baceke, Ruhanga ‘atuha amaani.’ (Is. 40:​29-31) Yahwe atuhaire ebiturukwetaaga kusobora kugarurwamu amaani. Nahabweki obworaaba noyetaaga amaani agarakukonyera kuhikiiriza obujunanizibwa, kugumira ebizibu, rundi kwikara oine okusemererwa, hikirra Yahwe omu kusaba kandi oserre obuhabuzi kuraba omu kwesomesa. Ikiriza ab’oruganda na banyaanya itwe kukukonyera kandi oikale n’otekerezaaho okunihira kwawe. Noija kusobora kutunga amaani ‘nk’amaani g’ekitiinisa kya Ruhanga oku gali, omu kugumiisiriza kwona hamu n’okusemererwa.’​—Bak. 1:11.