1-2. Habwaki nitusobora kwehurra ngu Yahwe tarukugarukamu esaara zaitu?

 “OSEMERE’RWEGE [Yahwe]: nauwe alikuha ebyokusaba ebyomutima gwawe.” (Zab. 37:4) Mali omurago gunu ka murungi! Baitu tusemeriire kutekereza ngu Yahwe naija kutuha buli kimu kyona ekituramusaba ahonaaho? Habwaki nitusobora kwekaguza ekikaguzo eki? Tekerezaaho enyikara zinu. Munyaanya itwe ow’atali omu buswere asaba Yahwe amukonyere kugenda omu Isomero ery’Abatebezi b’Obukama. Baitu harabaho emyaka atakeserwe. Ow’oruganda omuto asaba Yahwe kumukiza oburwaire obw’amaani nukwo asobole kwongera ha buheereza bwe omu kitebe. Baitu kandi aikara akyarwaire. Abazaire Abakristaayo basaba Yahwe ngu omwana wabo aikale omu mananu. Baitu omwana ogu acwamu kuleka kuheereza Yahwe.

² Obundi naiwe oine eky’osabire Yahwe baitu tokakitungire. Kyanguhire kutekereza ngu Yahwe agarukamu esaara ez’abandi hatali ezaawe. Rundi n’osobora kutekereza ngu haroho ekintu ekibi eky’okozere. Munyaanya itwe Janice b nukwo yayehuliire ati. Uwe hamu na iba bakasaba Yahwe abasobozese kugenda kuheereza ha Bbeseri. Janice n’agamba ati: “Nkaba ninkigumiza kimu ngu omu kasumi kataito nitwija kuba tweserwe ha Bbeseri.” Baitu hakarabaho emyaka nyingi batakeserwe. Janice ayongera agamba ati: “Nkasaasa muno naburwa obusinge. Nkatekereza ngu obundi haroho ekibi ekinkozere kyabiihiza Yahwe. Nkaba musabire muno nukwo banyete  kuheereza ha Bbeseri. Nkekaguza, habwaki ataragarukiremu esaara yange?”

3. Nitwija kubazaaho ki omu kicweka kinu?

³ Obwire obumu, nitusobora kwekaguza Yahwe obwaraaba ahurra esaara zaitu. N’abaheereza ba Yahwe abesigwa abaakara, obwire obumu bayekaguzaaga ekintu nikyo kimu. (Yob. 30:20; Zab. 22:2; Hab. 1:2) Kiki ekisobora kukukonyera kukigumiza kimu ngu Yahwe naija kugarukamu esaara zaawe? (Zab. 65:2) Kusobora kugarukamu ekikaguzo eki, nitwija kubanza kugarukamu ebikaguzo binu: (1) Kiki Yahwe ekyarukwija kukora? (2) Yahwe n’agonza tukole ki? (3) Habwaki nikisobora kutwetaagisa kuhinduramu esaara zaitu?

4. Kusigikirra ha Yeremiya 29:​12, Yahwe naraganiza kukora ki?

⁴ Yahwe n’araganiza kuhuliiriza esaara zaitu. (Soma Yeremiya 29:12.) Ruhanga agonza abaheereza be abesigwa nahabweki naija kuhuliiriza esaara zaabo. (Zab. 10:17; 37:28) Baitu kinu tikirukumanyisa ngu naija kugarukamu esaara zaitu zoona. Nikisobora kutwetaagisa kulinda kuhikya tuhikire omu nsi empyaka nukwo zimu ha saara zaitu zigarukwemu.

5. Yahwe asigikirra hali ki kugarukamu esaara zaitu? Soborra.

⁵ Yahwe agarukamu esaara zaitu nasigikirra ha kigendererwa kye. (Is. 55:​8, 9) Ekigendererwa kinu nikitwarramu ensi kwijura abantu abasemeriirwe kandi abarukworobera obulemi bwe. Baitu Sitaani agamba ngu abantu nibaija kuba kurungi muno kakuba berema bonka. (Kub. 3:​1-5) Kwoleka ngu Sitaani mubiihi w’ebisuba, Yahwe aikiriize abantu kwerema. Baitu nabwo obulemi bw’abantu bweyongiire kuleetaho ebizibu kasumi kanu. (Mug. 8:9) Tukimanyire ngu Yahwe tarukwija kwihaho ebizibu byona kasumi kanu. Kakuba akikora abantu abamu nibasobora kutekereza ngu abantu nibasobora kwerema kandi nibamaraho ebizibu byabo byona.

6. Habwaki tusemeriire kukigumya ngu Yahwe akora ebintu omu mulingo gw’okugonza kandi gw’obulyo obwire bwona?

⁶ Yahwe n’asobora kugarukamu esaara zaitu omu miringo erukwahukana. Ekyokurorraho, Omukama Hezekiya obwakaba arwaire muno, akesengereza Yahwe kumukiza. Yahwe akagarukamu esaara ye, yamukiza. (2 Bakam. 20:​1-6) Harubaju orundi, omukwenda Paulo obuyayesengeriize Yahwe kumwihaho “ekicumita omu mubiri,” ataiheho ekizibu eki. (2 Kol. 12:​7-9) Ekindi, tekerezaaho ekyokurorraho ky’omukwenda Yakobo na Petero. Boona babiri, Omukama Herodi akaba n’agonza kubaita. Ekitebe kikasabira Petero kandi nikisobora kuba kyasabiire na Yakobo. Baitu Yakobo akaitwa, kandi Yahwe yajuna Petero omu mulingo ogw’ekyamahano. (Eng. 12:​1-11) Nitusobora kwekaguza, ‘Habwaki Yahwe yajunire Petero baitu Yakobo yaitwa?’ Baibuli tetugambira ensonga habwaki. c Nitusobora kukigumya ngu emihanda ya Yahwe “yobulyo.” (Bir. 32:4) Kandi tukimanyire ngu Yahwe akaba n’agonza Petero na Yakobo. (Kus. 21:14) Obwire obumu, Yahwe n’asobora kutagarukamu esaara zaitu nk’oku tubaire nitunihira. Baitu habwokuba nitukigumya ngu Yahwe agarukamu esaara zaitu omu mulingo ogw’okugonza kandi ogw’obwinganiza, tituhyema habw’omulingo gwona ogw’acwamu kutugarukamu.​—Yob. 33:13.

7. Kiki ekitusemeriire kwetantara kandi habwaki?

⁷ Twetantara kulengesaniza enyikara  eiturumu n’ey’abandi. Ekyokurorraho, nitusobora kusaba Yahwe ekintu kandi tukalemwa kukitunga. Hanyuma, nitusobora kukimanya ngu haroho omuntu ayasabire ekintu nikyo kimu kandi yakitunga. Eki nikyo kyahikire hali munyaanya itwe Anna. Akasaba Yahwe akize musaija we Matthew, ekookoro. Akasumi nuko kamu, banyaanya itwe babiri abakaikuru naabo bakaba baine oburwaire nubwo bumu. Anna akasabira muno iba na banyaanya itwe banu. Banyaanya itwe bakakira, baitu iba yafa. Ha kubanza Anna akekaguza, Yahwe obwaraaba nuwe yakirize banyaanya itwe banu, habwaki atarakirize iba nyowe? Amananu gali, titumanyire omulingo banyaanya itwe babiri baakizire. Baitu tukimanyire ngu Yahwe naija kumarraho kimu ebizibu byona kandi aine ekihika eky’okuhumbuura banywani be boona abaafiire.​—Yob. 14:15.

8. (a) Kusigikirra ha Isaya 43:​2, Yahwe atusagika ata? (b) Okusaba nikusobora kuta kutukonyera obutuba nituraba omu bizibu? (Rora vidiyo Okusaba Kutukonyera Kugumiisiriza.)

⁸ Yahwe naija kwikara natusagika. Nka Isiitwe ow’okugonza, Yahwe tagonza kuturora nitubonabona. (Is. 63:9) Baitu nabwo, tatangira ebizibu ebirukusisana nk’ebyambu n’omurro kutuhikaho. (Soma Isaya 43:2.) Baitu n’aturaganiza ngu naija kutukonyera ‘kubirabamu.’ Kandi tarukwija kwikiriza ebizibu binu kutulemesa kumuheereza. Yahwe atuha omwoyo ogurukwera kutukonyera kugumiisiriza. (Luk. 11:13; Baf. 4:13) Nahabweki, nitusobora kukigumya ngu naija kwikara n’atuha ebiturukwetaaga kusobora kugumiisiriza n’okwikara tuli besigwa haluwe. d

9. Kusigikirra ha Yakobo 1:​6, 7, habwaki tusemeriire kukigumya ngu Yahwe naija kutukonyera?

⁹ Yahwe n’agonza tumwesige. (Baheb. 11:6) Obwire obumu, ebizibu byaitu nibisobora kusisana nk’orusozi oruraihire muno. Nitusobora n’okutandika kugurukyagurukya Yahwe obwaraaba naija kutukonyera. Baitu Baibuli n’etugumya ngu habw’amaani ga Ruhanga nitusobora ‘kuguruka muhuruzi.’ (Zab. 18:29) Nahabweki omu kiikaro ky’okugurukyagurukya, leka tusabe Yahwe twine okwikiriza ngu naija kugarukamu esaara zaitu.​—Soma Yakobo 1:​6, 7.

10. Bazaaho ekyokurorraho ekirukwoleka ngu tusemeriire kugira ekitwakoraho hanyuma y’okusaba Yahwe.

¹⁰ Yahwe n’agonza tukorre ha saara zaitu. Ekyokurorraho, ow’oruganda n’asobora kusaba Yahwe amukonyere mukama we ha mulimo amwikirize kugenda ha rusorrokano orukooto. Yahwe n’asobora kugarukamu ata esaara egi? N’asobora kuha ow’oruganda ogu obumanzi obwarukwetaaga kugambira mukama we. Ow’oruganda n’asobora kukorra ha saara ye obu nagenda kusaba mukama we amwikirize kugenda. Nikisobora nokumwetaagisa kukikora emirundi yingi. N’asobora n’okusaba omukozi mutaahi we kumukonyeraho ha biro ebyataroho. Kandi n’asobora n’okugambira mukama we kutamusasura ha biro ebi ebyataroho.

11. Habwaki tusemeriire kwikara nitusaba?

¹¹ Yahwe n’agonza twikale nitumusaba. (1 Bas. 5:17) Yesu akagamba ngu esaara ezimu Yahwe tazigarukamu ahonaaho. (Luk. 11:9) Nahabweki tutajwaha! Saba kuruga ha mutima kandi oikale nomugambira ebyorukugonza. (Luk. 18:​1-7) Eki obutukikora, twoleka Yahwe ngu ebiturukusaba bikuru muno haliitwe. Ekindi, twoleka ngu twine okwikiriza ngu naija kutukonyera.

12. (a) Kikaguzo ki ekitusemeriire kwekaguza obukirukuhika ha saara zaitu kandi habwaki? (b) Nitusobora tuta kwoleka ngu nituteekamu Yahwe ekitiinisa obuturukuba nitusaba? (Rora akasanduuko “ Ebinsaba Byoleka ngu Ninteekamu Yahwe Ekitiinisa?”)

¹² Kakuba tutatunga ekintu ekitusabire, nitusobora kwekaguza ebikaguzo binu bisatu. Eky’okubanza, ‘Ekindukusaba nikyo kyonyini ekindukwetaaga?’ Tukira kutekereza ngu ekitusabire kyonyini nikyo turukwetaaga. Baitu ekintu ekiturukutekereza ngu nikyo turukwetaaga nikisobora kutatugasira hanyuma y’akasumi. Kakuba tusaba Yahwe kumaraho ekizibu kyaitu, n’asobora kuba amanyire omulingo omurungi ogw’okukimaraho kukira itwe oguturukutekereza. Kandi ebintu ebimu ebitusaba nibisobora kuba bitarukuhikaana na Yahwe eby’agonza. (1 Yoh. 5:14) Ekyokurorraho, tekerezaaho abazaire ababazibweho omu kacweka ak’okubanza. Bakasaba Yahwe akonyere omwana wabo aikale omu mananu. Ekintu eki ekibaasabire kirungi. Baitu Yahwe tahambiriza omuntu wena kumuheereza. N’agonza itwena otwaliremu n’abaana, kwecweramu kumuheereza. (Bir. 10:​12, 13; 30:​19, 20) Nahabweki abazaire baakusabire Yahwe abakonyere beegese omwana wabo kumugonza n’okucwamu kumuheereza.​—Nfu. 22:6; Bef. 6:4.

13. Kusigikirra ha Abaheburaniya 4:​16, nidi Yahwe obwarukwija kutukonyera? Soborra.

¹³ Ekikaguzo ekyakabiri, ‘Akasumi ka Yahwe kugarukamu esaara yange kahikire?’ Obwire obumu, nitusobora kugonza esaara zaitu zigarukwemu ahonaaho. Baitu Yahwe amanyire akasumi akahikire ak’okugarukamu esaara zaitu. (Soma Abaheburaniya 4:16.) Obututatunga ekitusabire ahonaaho, nitusobora  kutekereza ngu Yahwe ayangire kutuha ‘ekitumusabire.’ Baitu obwire obumu nikisobora kuba ngu obwire obw’okukituha ‘tubukahikire.’ Ekyokurorraho, tekerezaaho ow’oruganda ayasabire kukizibwa oburwaire. Kakuba Yahwe yamukirize omu mulingo ogw’ekyamahano, Sitaani yakugambire ngu ow’oruganda onu agumizeemu naheereza Yahwe habwokuba amukirize. (Yob. 1:​9-11; 2:4) Ekindi, Yahwe ataireho akasumi nambere alimarraho kimu endwaire zoona. (Is. 33:24; Kus. 21:​3, 4) Kuhikya akasumi ako obukalihika, titurukunihira Yahwe kutukiza omu mulingo ogw’ekyamahano. Nahabweki ow’oruganda onu yakusabire Yahwe kumuha amaani n’obusinge omu bitekerezo kusobora kugumira oburwaire bwe, n’okugumizaamu namuheereza n’obwesigwa.​—Zab. 29:11.

14. Ekyokurorraho kya Janice nikitwegesa ki?

¹⁴ Ijuka ekyokurorraho kya Janice, ayasabire Yahwe kuheereza ha Bbeseri. Hakarabaho emyaka etaano atakakyetegeriize ngu Yahwe akaba agarukiremu esaara ye. N’agamba ati: “Yahwe akakozesa akasumi ako kunyegesa n’okunkonyera kweyongera kufooka Omukristaayo omurungi. Nkaba nyine kweyongera kumwesiga. Ekindi nkaba nyine kusemezaamu omulingo nyesomesaamu, n’okweyongera kwega kutunga okusemererwa okutarukusigikirra ha nyikara eindumu.” Hanyuma, Janice hamu na iba bakaraalizibwa omu mulimo ogw’okubungira ebitebe. Janice n’agamba ati: “Yahwe akagarukamu esaara yange omu mulingo ogunkaba ntarukunihira. Kikantwarra akasumi kurora omulingo Yahwe yagarukiremu esaara yange, kandi nimusiima muno habw’okunyoleka okugonza n’embabazi.”

15. Habwaki obwire obumu titusemeriire kusaba ekintu kimu kyonka? (Rora ebisisani.)

 ¹⁵ Ekikaguzo ekyakasatu, ‘Nsabe ekintu ekindi?’ N’obukiraaba ngu kirungi kusaba ekintu kyonyini ekiturukwetaaga, nitusobora kumanya Yahwe ekyarukutugondeza kakuba tutasaba ekintu kimu kyonka. Tekerezaaho ekyokurorraho kya munyaanya itwe ow’atali omu buswere, ow’arukugonza kugenda omu Isomero ly’Abatebezi b’Obukama. N’agonza kuligendamu nukwo aheereze nambere hali obwetaago. Obwarukuba nasaba Yahwe amusobozese kumweta omu isomero linu, n’asobora n’okumusaba amukonyere arole n’emiringo endi ey’asobora kwongera ha buheereza bwe. (Eng. 16:​9, 10) Hanyuma, n’asobora kukorra ha saara ye kuraba omu kukaguza omuroleerezi w’ekicweka obuharaaba haroho ekitebe ekiri haihi ekirukwetaaga bapayoniya. Rundi n’asobora kuhandiikira ofiisi y’itaagi nakaguza ebitebe ebirukwetaaga abatebezi. e

16. Kiki ekitusobora kugumya?

¹⁶ Nk’oku twegere, nitusobora kukigumya ngu Yahwe naija kugarukamu esaara zaitu omu mulingo ogw’okugonza kandi ogw’obulyo. (Zab. 4:3; Is. 30:18) Obwire obumu nitusobora kutatunga ekitubaire nitunihira. Baitu Yahwe naija kwikara nagarukamu esaara zaitu. N’atugonza muno kandi talitulekaho. (Zab. 9:10) Nahabweki, ikara ‘n’omwesiga bwona,’ omugambire ebikuli ha mutima kuraba omu kusaba.​—Zab. 62:8.