Nkazarwa omu 1983. Obunkaba kyali muto nkaba nyine obwomeezi burungi, baitu ha myaka ikumi, omubiri gwona gukatandika kunsaasa muno. Kiro kimu, hanyuma y’emyaka ebiri, nkaimuka tarukusobora kurubata. Nkalengaho muno kuhindura amaguru gange baitu gali gataine maani nakake. Kuruga obu ntongere kurubata. Oburwaire bwange bukandetera n’okuleka kukura. N’omu kasumi kanu, ndi mutaito ninyingana omwana.

Obu hali harabireho emyezi ebiri ndwaire kandi ntarukusobora n’okuruga omu nju, Abakaiso ba Yahwe babiri bakatubungire. Abagenyi obubatubungiraga, nakiraga kwesereka baitu kiro eki nkaikiriza abakazi abo kubaza na nyowe. Obu baali nibabazaaho orugonjo orurungi, nk’aijuka ebinahuliire obunkaba nyine emyaka nk’etaano. Omu kasumi ako, omu misaani arukweta Jethro ayaikaraga omu ihanga lya Suriname, yabungiraga ekyaro kyaitu buli kwezi kandi y’ayegesaaga ise nyowe Baibuli. Jethro yantwazaaga omu mulingo gw’embabazi kandi n’amugonzaaga muno. Kandi isenkuru nyowe na nyinenkuru nyowe bagendaga na nyowe obubabaga nibagenda omu nsorrokano ezimu ez’Abakaiso ba Yahwe ezaabaga omu kyaro kyaitu. Nahabweki omu ha bakazi abambungiire kiro eki arukwetwa Florence, obuyankagwize obundaaba ningonza kwega ebirukukiraho, nkaikiriza.

Florence akagaruka na iba arukwetwa Justus, kandi bakatandika kunyegesa Baibuli. Obubakyetereriize ngu timanyire kusoma, bakankonyera kwega kusoma. Hanyuma y’akasumi, nkeega kusoma. Kiro kimu, ow’oruganda na mukazi banu bakangambira ngu, bakaba basindikirwe kugenda kuheereza omu Suriname. Eky’obusaasi kiri ngu omu kasumi ako busaho muntu wena omu Orealla ow’akaba n’asobora kunyegesa Baibuli. Baitu ekirungi, Yahwe atanyebwe.

Hanyuma y’akaire kake payoniya arukwetwa Floyd akaija omu Orealla, kandi akampikaho obwakaba n’atebeza nju ha nju. Obuyangambire ebirukukwata ha Baibuli nk’asemererwa. Akankaguza ati: “Habwaki osemeriirwe?” Nk’amugambira nk’oku nkaba mazire kwega burocuwa Ruhanga Natwetagisa Ki? kandi nk’oku nkaba ntandikire kwega akatabu Knowledge That Leads to Everlasting Life. * Nkamusoborra habwaki nkaba ntakyayega. Floyd akanyegesa akatabu kanu twakamara, baitu na uwe akasindikwa kugenda kutebeza omu kiikaro ekindi. Nkongera n’aburwa ow’okunyegesa Baibuli.

 Baitu omu 2004, bapayoniya babiri ab’embaganiza, Granville hamu Joshua, bakasindikwa omu Orealla. Bakampikaho obubakaba nibatebeza nju ha nju. Obu bankagwize obundaaba ningonza kwega Baibuli, nkasemererwa. Nkabasaba tugarukemu kusoma akatabu ka Knowledge koona. Nkaba ningonza kurora obubaranyegesa ebintu ebirukusisana n’eby’abegesa bange ab’okubanza banyegeseze. Granville akangambira ngu hakaba haroho ensorrokano omu kyaro kyaitu. Nobukiraaba ngu nkaba mazire emyaka ikumi ntakarugaga omu ka, nkaba ningonza kuzigendamu. Nahabweki Granville akaija omu ka yanteeka omu kagaali, y’asindika yantwara ha Kyombeko ky’Obukama.

Hanyuma Granville akanyekambisa kutaaha isomero erya Theocratic Ministry School. Akangambira ati: “Nobworaaba oli mulema tikirukumanyisa ngu tosobora kubaza. Kiro kimu, noija kuha orubazo orwa boona. Eki ninkigumya noija kukikora.” Ebigambo bye ebirukugarramu amaani bikankonyera kufooka mumanzi.

Nkatandika kutebeza hamu na Granville. Baitu habwokuba enguudo ezirukukira obwingi omu kyaro kyaitu ziitaka, kyagumaga kurabyamu akagaali. Nahabweki nkasaba Granville kunteekaga omu nengere niyo asindikiremuga. Amagezi ganu gakakora kurungi muno. Omu Apuli 2005, nkabatizibwa. Hakarabaho akasumi kake ab’oruganda bantendeka kurolerra ebitabu omu kitebe hamu n’okukora ha by’amaraka omu Kyombeko ky’Obukama.

Hanyuma, omu 2007, eky’obusaasi kiri ngu ise nyowe akafeera omu butandwa bw’eryato. Eka yaitu yoona ekaterwa ibumba kanwa. Granville akasaba hamu naitwe kandi y’atusomera ebyahandiikirwe ebirukugarramu amaani. Hanyuma y’emyaka ebiri, kikatuhinguranaho obutwatungire ekizibu ekindi eky’amaani ekya Granville kufa, eryato lye obulyadikiire.

Ekitebe kyaitu ekitaito, eky’ali kiri omu kuganya kikaba kitakyaine mugurusi wena ow’ekitebe oihireho omuheereza omu wenka. Kufa kwa Granville kukansaliza muno habwokuba akaba ali munywani wange muno. Yankonyeraga muno kutunga ebyetaago byange eby’omwoyo hamu n’eby’omubiri. Ha rusorrokano orwayongireho hanyuma y’okufa kwe, ninyowe nkaba nsemeriire kusoma obucweka omu kwega Omunaara gw’Omulinzi. Nk’asobora kusoma obucweka bubiri obw’okubanza, baitu hanyuma katandika kurra kandi kalemwa kuleka kurra. Nkaba nyine kuruga omu maiso.

Nkongera n’atandika kutunga okusemererwa ab’oruganda kuruga omu kitebe ekindi obubaizire kutukonyera omu Orealla. Kandi n’itaagi likasindika payoniya ow’embaganiza arukwetwa Kojo. Kikansemeza muno mama wange hamu na muto wange omwojo obubatandikire kwega Baibuli kandi babatizibwa. Hanyuma omu Maaci 2015, nk’akomwa kuba omuheereza omu kitebe. Hanyuma y’akasumi, nkaha orubazo rwange orwa boona orw’okubanza. Kiro eki, nk’asemererwa kandi nkarra obunaijukire ebigambo bya Granville y’angambiire emyaka nyingi enyuma, obuyangambiire ati: “Kiro kimu, noija kuha orubazo orwa boona. Eki ninkigumya noija kukikora.”

Kurabira omu puroguramu eza JW Broadcasting^®, nyegereho Abakaiso ba Yahwe bagenzi bange abali omu nyikara nk’eyange. Nobukiraaba ngu baine obulema, bekamba kandi basemeriirwe. Nanyowe haroho ebintu ebinsobora kukora. Habw’okugonza kuheereza Yahwe nk’oku ndukusobora kikandetera kutandika kuheereza nka payoniya ow’akasumi koona. Kandi omu Sebutemba 2019 nk’atunga amakuru marungi agankaba ntarukunihira nakake! Kwezi oku nk’akomwa kufooka mugurusi omu kitebe kyaitu eky’abatebezi nka 40.

Ninsiima muno ab’oruganda na banyaanya itwe abagonzebwa abanyegeseze Baibuli, kandi abankonyire kuheereza Yahwe. Baitu kukira muno, ninsiima muno Yahwe habwokuba atanyebwe.