OMU busumi bwakara, omukeeto yarolerraga enju rundi itungo ly’omuntu ondi. Ekigambo eky’Oruheburaniya n’eky’Oruyonaani ekihindurwa omukeeto obwire obumu kimanyisa omuroleerezi rundi omuntu arukuroleerra eka y’abandi.

Yusufu mutabani wa Yakobo, obwakaba ali omwiru omu Misiri, akafooka mukeeto we nju ya mukama we. Kandi mukama we, omusaija Omumisiri akaleka “byona ebyakaba anyinabyo omu mukono gwa Yusufu.” (Kub. 39:2-6) Hanyuma, Yusufu nawe obuyafookere mulemi omu Misiri, akakoma omukeeto ow’okurolerra enju ye.​—Kub. 44:4.

Omu kasumi ka Yesu, abantu abaabaga baine itaka bakiraga kwikara omu mbuga ezakiraga kuba hara n’emisiri yabo. Nahabweki bakama b’amataka bakomaga abakeeto ab’okurolerra abakozi abakoraga omu misiri yabo.

Bantu ba mulingo ki abahebwaga obujunanizibwa obw’okufooka bakeeto? Omuhandiiki Omuroma ow’omu kyasa eky’okubanza arukwetwa Columella akagamba ngu omwiru ayakomwaga kuba muroleerezi rundi mukeeto akaba asemeriire kuba muntu “ow’akaba amazire akasumi nayekamba omu kukora emirimo.” Kandi akaba asemeriire kuba muntu “arukusobora kukora kyona ekirukusobora kurora abakozi abandi bakora emirimo yabo kandi atarukwebembera omu mulingo gw’ekiniga.” Omuhandiiki onu akongera yagamba ati: “Ekirukukira obukuru akaba asemeriire kuba muntu atarukutekereza ngu amanyire buli kimu kyona kandi anyakwetegekere kwega ebintu ebihyaka.”

Ekyokurorraho eky’omukeeto n’omulimo yakoraga nikikozesebwa omu Baibuli kubazaaho emirimo ey’embaganiza ey’ekorwa omu kitebe Ekikristaayo. Ekyokurorraho, omukwenda Petero akekambisa Abakristaayo kukozesa ebisembo Ruhanga akaba abahaire kuheerezangana “nk’abaahuzi abarungi abembabazi nyingi eza Ruhanga.”​—1 Pet. 4:10.

Yesu nawe akakozesa ekyokurorraho eky’omukeeto omu Luka 16:1-8. Kandi n’obwakaba n’abazaaho akokurorraho akalyoleka ngu afookere Mukama, Yesu akagumya abahondezi be ngu akaba nagenda kukoma “omwiru omwesigwa kandi ow’amagezi” rundi “omuketo owokwesiga.” Omulimo omukuru ogw’omukeeto onu gwali gw’okwikara naha abahondezi ba Kristo eby’okulya eby’omwoyo omu biro ebya ha mpero. (Mat. 24:45-47, NW; Luk. 12:42) Mali twine omugisa gw’amaani kuba bamu hali abo abarukutunga ebitabu, vidiyo hamu n’ebintu ebindi ebitugarramu amaani ebitekanizibwa omukeeto omwesigwa. Ebintu binu nitusobora kubitunga hoona nambere tuli omu nsi.