1-2. Nk’oku kyolekerwe omu Engeso Ezabakwenda 8:27-31, 35-38, kiki ekyaletiire omukuru Omunyesiyopya kubatizibwa?

NOGONZA kubatizibwa nukwo ofooke omu h’abegeswa ba Kristo? Okugonza hamu n’okusiima biretiire abantu baingi kukora encwamu egi. Leka tubazeeho ekyokurorraho eky’omukuru omu ayaheerezaaga omugo owa Esiyopya.

² Omunyesiyopya onu obuyakyetegeriize ngu Ebyahandiikirwe nibyoleka ngu asemeriire kubatizibwa akakikora aho naaho. (Soma Engeso Ezabakwenda 8:27-31, 35-38.) Kiki ekyamuletiire kukora encwamu enu? Yagonzaaga Ekigambo kya Ruhanga habwokuba akaba nasoma ekitabu ekya nabbi Isaya obu bakaba nibamuvuga omugaali ye. Kandi Firipo obuyamutebiize, omusaija ogu akasiima Yesu eky’akaba amukoliire. Kiki ekyaletiire omukuru onu kugenda Yerusalemu? Akaba atandikire kara kugonza Yahwe. Kinu nitukimanya tuta? Habwokuba akaba naruga Yerusalemu kuramya Yahwe. Nikizooka omukuru onu akaba arugire omu ediini eyiyazaliirwemu y’ayeteranizaaho ihanga erikaba lyehaireyo hali Ruhanga ow’amananu. Okugonza okwakaba ainiire Yahwe nukwo kwayongiire kwamuletera kukora encwamu endi enkuru ey’okubatizibwa kandi akafooka mwegeswa wa Kristo.​—Mat. 28:19.

3. Kiki ekisobora kulemesa omuntu kubatizibwa? (Rora akasanduuko “ Kiki Ekiri omu Mutima Gwawe?”)

³ Okugonza okwoiniire Yahwe nikusobora kukuletera kubatizibwa. Baitu kugonza okundi nikusobora kukulemesa kubatizibwa. Omu mulingo ki? Tekerezaaho ebyokurorraho binu. Nosobora kuba nogonza muno abanyabuzaale n’abanywani bawe abatarukuheereza Yahwe, kandi kinu nikisobora kukuletera  kutiina ngu obw’orabatizibwa nibaija kukunoba. (Mat. 10:37) Rundi nosobora kuba nogonza muno engeso Yahwe arukunoba, kandi nikisobora kukugumira kuzireka. (Zab. 97:10) Rundi nosobora kuba okuzire nojaguza ebiro bikuru ebinyakwine akakwate n’amadiini ag’ebisuba. Nosobora kuba noijuka ebintu ebirungi ebimwakoraga ha biro ebi, kikakuletera kulemwa kuleka kujaguza emikoro egi etarukusemeza Yahwe. (1 Kol. 10:20, 21) Nahabweki osemeriire kwekaguza, “Noha rundi kintu ki ekindukukira kugonza?”

4. Nsonga ki enkuru ey’esemeriire kukuletera kubatizibwa?

⁴ Nosobora kuba oine ebintu bingi eby’orukugonza kandi ebikuletera okusiima. Ekyokurorraho, n’obwokaba otakatandikire kwega Baibuli n’Abakaiso ba Yahwe nosobora kuba okaba n’ogonza muno Baibuli na Yesu. Kandi hati nk’oku omanyire Abakaiso ba Yahwe nosobora kuba ogonza kwikara nabo. Baitu kugonza ebintu binu ebirungi tikirukumara kusobora kwehayo hali Yahwe kandi okubatizibwa. Ensonga erukukira obukuru ey’esemeriire kukuletera kubatizibwa nukwo okugonza okwoiniire Yahwe. Obworaaba n’ogonza Yahwe muno, torukwija kwikiriza omuntu wena rundi ekintu kyona kukulemesa kumuheereza. Kugonza Yahwe nikwija kukuletera kubatizibwa n’okukukonyera kwikara oli mwesigwa hali we n’obworamara kubatizibwa.

5. Bikaguzo ki ebiturukwija kugarukamu?

⁵ Yesu akagamba ngu tusemeriire kugonza Yahwe n’omutima gwaitu gwona, n’obwomeezi bwaitu bwona, n’amagezi gaitu goona, hamu n’amaani gaitu goona. (Mar. 12:30) Nosobora ota kwega kugonza muno Yahwe n’okumutamu ekitiinisa? Kutekerezaaho okugonza Yahwe atwiniire kituletera naitwe kumugonza. (1 Yoh. 4:19) Kugonza Yahwe nikwija kukuletera kwehurra ota kandi n’okukora bintu ki ebindi? *

6. Kusigikirra ha Abarumi 1:20, mulingo ki ogundi ogutusobora kwega hali Yahwe?

⁶ Yega hali Yahwe kuraba omu bintu ebiyahangire. (Soma Abarumi 1:20; Kus. 4:11) Wecumitirizeeho omulingo ebimera hamu n’ebisoro byoleka ngu Yahwe ay’abihangire aine amagezi maingi muno. Yegaho ebintu bike ebirukwoleka nk’oku omubiri gwawe gwahangirwe omulingo ogwamahano. (Zab. 139:14) Tekerezaaho amaani amaingi Yahwe agayataire omu izooba, kandi obu izooba linu liri rimu ha nyunyuzi obuhumbe n’obuhumbe eziyahangire. * (Is. 40:26) Obworakora eki, nikiija kukuletera kweyongera kuteekamu Yahwe ekitiniisa. Baitu, kumanya ngu Yahwe w’amagezi kandi w’amaani tikiri nikyo kyonka ekitukonyera kutunga enkoragana enungi nauwe. Nahabweki kusobora kutunga enkoragana enungi nauwe, nikikwetagisa kweyongera kumanya bingi ebirukumukwataho.

7. Kiki eky’osemeriire kuba n’ogumiza kimu, kusobora kugondeza kimu Yahwe?

⁷ Iwe nk’omuntu, osemeriire kuba n’okigumiza kimu ngu Yahwe n’akufaaho muno. Kikugumira kwikiriza ngu omuhangi ow’iguru n’ensi akimanyire ngu oroho kandi akufaaho? Obukiraaba nukwo kiri, oijuke ngu Yahwe ‘tali hara n’omu wena haliitwe.’ (Eng. 17:26-28) Yahwe “narora emitima yoona,” kandi naiwe nakuraganiza kukukorra Daudi ekiyagambiire Sulemani ati: “Obwolimuserra, olimuzora.” (1 Byom. 28:9) Nk’oku noyega  Baibuli, nikyoleka ngu Yahwe ‘akucunzire n’embabazi’ kumwirra haihi. (Yer. 31:3) Obworayongera kwoleka okusiima habw’ebintu Yahwe akukoliire nikiija kukuletera kweyongera kumugonza.

8. Nitusobora tuta kwoleka ngu nitusiima habw’okugonza Ruhanga atwolekere?

⁸ Omulingo gumu ogw’osobora kwolekamu Yahwe ngu n’osiima habw’okugonza okw’akwolekere nugwo ogw’okumusaba. Obw’oragambira Ruhanga byona ebikweralikiriize kandi okamusiima habw’ebintu byona akukoliire, noija kweyongera kumugonza. Kandi obw’orarora omulingo Yahwe agarukamu esaara zaawe, enkoragana yaawe nauwe niija kweyongera kuguma. (Zab. 116:1) Noija n’okwongera kukigumya ngu n’akwetegereza kurungi. Baitu kwongera kwirra haihi na Yahwe, noyetaga kwetegereza ebintu eby’agonza, eby’anoba, hamu n’ekimuletera kukora ebintu eby’akora. Kandi osemeriire n’okumanya eby’arukugonza okole. Omulingo gwonka ogw’osobora kutunga okumanya oku nugwo ogw’okwega Baibuli.

9. Nosobora ota kwoleka ngu Baibuli y’omuhendo hali iwe?

⁹ Ekigambo kya Ruhanga, kitwale nk’eky’omuhendo. Baibuli niyo yonka erumu amananu agarukukwata hali Yahwe kandi n’ekigendererwa kye hali iwe. Nosobora kwoleka ngu Baibuli y’omuhendo hali iwe kuraba omu kugisoma buli kiro, kutekaniza kurungi otakasomere n’omusomesa wawe, hamu n’okuteeka omu nkora eby’orukwega. (Zab. 119:97, 99; Yoh. 17:17) Oine entekaniza ey’okusoma Baibuli buli kiro? Kandi entekaniza egi ogihondera?

10. Kintu ki eky’embaganiza ekiri omu Baibuli?

¹⁰ Kimu ha bintu eby’embaganiza ebiri omu Baibuli, kiri ngu erumu ebigambo eby’abantu abarozere Yesu maiso ha maiso. Baibuli nikyo ekitabu kyonka ekihikire ekirukusoborra ebintu Yesu yakukoliire. Obworayeyongera kwega ha bintu Yesu y’abalize n’ebiyakozere, noija kugonza kufooka munywani we.

11. Kiki ekirakukonyera kugonza Yahwe?

¹¹ Gonza Yesu kandi okugonza kwawe hali Yahwe nikwija kweyongera. Habwaki?  Habwokuba Yesu ayoleka emiringo ya Ise kikumi ha kikumi. (Yoh. 14:9) Nahabweki, obw’orayeyongera kwega hali Yesu, nikiija kukuletera kweyongera kwetegereza n’okutamu Yahwe ekitinisa. Tekerezaaho embabazi Yesu y’ayolekere abantu abakaba nibarabibwamu amaiso, nk’abanaku, abarwaire, n’abatarukwesobora. Tekerezaaho n’obuhabuzi obwarukutuha oburukukwata ha nyikara ezabuli kiro, n’omulingo busobora kukugasira kakuba obuteka omu nkora.​—Mat. 5:1-11; 7:24-27.

12. Kwega ebirukukwata hali Yesu nikisobora kukuletera kukora ki?

¹² Okugonza kwawe hali Yesu nikusobora kweyongera kakuba otekerezaaho muno ekihongwa ekiyahaireyo nukwo tusobole kuganyirwa ebibi byaitu. (Mat. 20:28) Kakuba okyetegereza ngu Yesu akehayo ayegondiize kukufeera, nikisobora kukuletera kugonza kwegarukamu kandi okasaba Yahwe kukuganyira. (Eng. 3:19, 20; 1 Yoh. 1:9) Kandi obw’orayeyongera kugonza Yesu na Yahwe, nikiija kukwanguhira kugonza n’abantu abarukubagonza.

13. Kiki Yahwe eky’arukwija kukukorra?

¹³ Gonza abantu abarukugonza Yahwe. Abanyabuzaale n’abanywani baawe abatarukuheereza Yahwe nibasobora kutamanya ensonga habwaki nogonza kwehayo hali Yahwe. Nibasobora n’okukuhiganiza. Baitu Yahwe naija kukuha eka ey’eby’omwoyo. Kakuba oikara omu ka egi, ab’oruganda n’abanyaanya itwe nibaija kukugonza kandi bakukonyere. (Mar. 10:29, 30; Baheb. 10:24, 25) Kandi hanyuma y’akasumi, abanyabuzaale baawe nabo nibasobora kutandika kuheereza n’okworobera Yahwe.​—1 Pet. 2:12.

14. Nk’oku kyolekerwe omu 1 Yohana 5:3, kiki eky’oyetegeriize ha biragiro bya Yahwe?

¹⁴ Siima kandi oteke omu nkora emisingi ya Yahwe. Obwokaba otakegere ebirukukwata hali Yahwe, nosobora kuba niiwe wayecweramuga ekihikire n’ekitahikire baitu hati okyetegereza ngu ebiragiro bya Yahwe nibyo birukukirayo oburungi. (Zab. 1:1-3; soma 1 Yohana 5:3.) Tekerezaaho obuhabuzi oburungi Baibuli obweha banyineeka, banyina bwenge, abazaire, hamu n’abaana. (Bef. 5:22–6:4) Eka yaawe ey’eyongiire kubamu okusemererwa, habw’okuteeka omu nkora obuhabuzi bwa Baibuli? Kworobera obuhabuzi bwa Yahwe obw’okutunga abanywani abarungi kikukonyire kutunga engeso enungi? Hati oli muntu anyakwine okusemererwa? (Nfu. 13:20; 1 Kol. 15:33) Ekyokugarukamu kyawe nikisobora kuba kiri ego.

15. Kiki ekisobora kukukonyera kuteeka omu nkora emisingi ya Baibuli?

¹⁵ Obwire obumu, nikisobora kukugumira kumanya nk’oku osobora kuteeka omu nkora ebintu ebyoyegere kuruga omu Baibuli. Egi niyo ensonga habwaki Yahwe nakozesa ekitebe kye kukuha eby’okulya eby’omwoyo ebirakukonyera kumanya ebihikire n’ebitahikire. (Baheb. 5:13, 14) Kakuba osoma ebintu kuruga omu kitebe kya Yahwe, noija kurora omulingo amagezi agoratunga gasobora kukugasira, kandi n’okugonza kweteranizaaho ekitebe kye.

16. Yahwe akozere ntekaniza ki kukonyera abantu be?

¹⁶ Gonza kandi osagike ekitebe kya Yahwe. Yahwe asoroliize abantu be omu bitebe eby’embaganiza, kandi akomere Omwana we Yesu Kristo kuba mutwe gw’ebitebe ebi byona. (Bef. 1:22; 5:23) Yesu akomere akatebe akataito ak’abasaija abaseserweho amagita kurolerra omulimo ogw’arukugonza gukorwe omu kasumi kanu. Akatebe kanu Yesu nuko yayesere “omwiru omwesigwa kandi ow’amagezi,” kandi bekamba muno kuhikiriza obujunanizibwa bw’abo obw’okukuha eby’okulya  eby’omwoyo n’okukulinda omu by’omwoyo. (Mat. 24:45-47, NW) Omulingo ogumu omwiru omwesigwa ogw’akurolerramu nugwo ogw’okurora ngu abasaija abasemeriire nubo bakomwa kufooka bagurusi abarakuhabura kandi bakakulinda. (Is. 32:1, 2; Baheb. 13:17; 1 Pet. 5:2, 3) Abagurusi banu behaireyo kukora kyona ekirukusoboka kukuhuumuza n’okukukonyera kweyongera kwirra haihi na Yahwe. Kandi ekintu ekikuru muno ekibasobora kukukorra nukwo kukwegesa omulingo osobora kwegesa abantu abandi ebirukukwata hali Yahwe.​—Bef. 4:11-13.

17. Kusigikirra ha Abarumi 10:10, 13, 14, habwaki tugambira abantu abandi ebirukukwata hali Yahwe?

¹⁷ Konyera abantu abandi kugonza Yahwe. Yesu akagambira abahondezi be kwegesa abantu ebirukukwata hali Yahwe. (Mat. 28:19, 20) Nosobora kworobera ekiragiro eki kuhikiriza omukoro kwonka. Baitu obw’orayeyongera kugonza Yahwe, naiwe noija kwehurra nk’omukwenda Petero na Yohana abagambire bati: “Titurukusobora okuleka okugamba ebitwaboine nebitwahuliire.” (Eng. 4:20) Kituletera okusemererwa kwingi obutukonyera omuntu kugonza Yahwe. Tekerezaaho okusemererwa Firipo omutebezi w’enjiri okuyatungire, obuyakonyire Omunyesiyopya kwega amananu kuruga omu Byahandiikirwe kandi akabatizibwa! Obw’orahondera ekyokurorraho kya Firipo kandi akoorobera ekiragiro kya Yesu eky’okutebeza, noija kukyolekera kimu ngu mali nogonza kufooka omu h’Abakaiso ba Yahwe. (Soma Abarumi 10:10, 13, 14.) Eki obw’orakikora naiwe noija kuhika ogambe nk’omusaija Omunyesiyopya oti: “Kiki ekirukuntanga okubatizibwa?”​—Eng. 8:36.

18. Kiki ekiturukwija kubazaaho omu kicweka ekirukwongeraho?

¹⁸ Obworacwamu kubatizibwa noija kuba okozere encwamu erukukirrayo kimu obukuru omu bwomeezi bwawe. Encwamu enu nk’oku eri nkuru muno, osemeriire kubanza kumanya n’etwarramu ki. Biki eby’osemeriire kumanya ha kubatizibwa? Biki eby’osemeriire kukora otakabatiziibwe kandi na hanyuma y’okubatizibwa? Ebikaguzo binu nibiija kugarukwamu omu kicweka ekirukwongeraho.