Ebikaguzo Kuruga omu Basomi Baitu
Ebigambo ebirukusangwa omu Zabuli 12:7 bisemeriire kwetegerezebwa bita?
Ebigambo ebyetoroire orukarra runu nibyoleka ngu orukarra runu nirubazaaho abantu.
Omu Zabuli 12:1-4, nihagamba ngu “abokwesiga bahwa omuli abana babantu.” Kandi omu Zabuli 12:5-7, nihagamba ngu.
‘Obwokusinda kwabaseege,
Habw’okunyaga abanaku,
Hati bunu ndaimuka nukwo,’ [Yahwe] agamba;
‘Ndamutaahya omu businge oubasiimuza.’
Ebigambo bya [Yahwe] bigambo ebisemiire;
Nkefeza enyakulengerwe omu murro hansi, enyakusemeziibwe emirundi musanju.
Iwe orabalindaga, ai [Yahwe];
Orabajunaga hali obusinge bunu ebiro nebiro.’
Orukarra 5 rwoleka Ruhanga ekyagamba obukirukuhika ‘h’abaseege.’ Naija kubajuna.
Orukarra 6 rugamba ngu “ebigambo bya [Yahwe] bigambo ebisemiire,” ‘nkefeeza enyakulengerwe n’omurro.’ Kinu nikyoleka omulingo twehurra ha bigambo bya Yahwe.— Zab. 18:30; 119:140.
Omu mpindura za Baibuli ezimu Zabuli 12:7 ehindurwa eti: ‘Oralindaga.’
Habwokuba orukarra 7 niruhondera ebigambo ebiri omu rukarra 6 ebirukugamba ngu “ebigambo bya [Yahwe],” abamu nibasobora kuteekereza ngu nibimanyisa ngu Ruhanga ‘aralindaga’ ebigambo bye. Kandi tukimanyire ngu Ruhanga alinzire Baibuli n’obukiraaba ngu abantu baingi abarukugihakaniza balengereho kugihwerekereza.—Is. 40:8; 1 Pet. 1:25.
Baitu nabwo, ky’amananu ngu Yahwe alinda abantu abarukubazibwaho omu rukarra 5. Yahwe aikaire nakonyera kandi najuna “abasege” hamu ‘n’abanaku’ kandi n’akyagumizaamu kubakonyera n’okubajuna.—Yob. 36:15; Zab. 6:4; 31:1, 2; 54:7; 145:20.
Hati, orukarra 7 tusemeriire kurwetegereza tuta, nirumanyisa ngu Ruhanga aralindaga abantu rundi ebigambo bye?
Kakuba twetegereza kurungi ebigambo ebirukusangwa omu zabuli enu, nibyoleka kurungi ngu abarukubazibwaho bantu.
Ha kutandika kwa Zabuli 12, nihabazaaho abaheereza ba Yahwe abesigwa abasobora kuba babiihabiihirwe abantu ababi. Hanyuma, omu rukarra 3 nitusangamu ebigambo ebirukwoleka ngu Yahwe naija kugira ekiyakoraho hali abo ababaza ebitarumu. Zabuli enu n’etugumya ngu nitusobora kwesiga Ruhanga kugira ekiyakoraho kurwanirra abantu be habwokuba ebigambo bye bisemiire.
Nahabweki orukarra 7 nirugamba ngu Yahwe aralindaga kandi arajunaga abo abatwaziibwe kubi abantu ababi.
Hati, habwaki empindura za Baibuli ezimu omu rukarra runu zigamba ngu: ‘Oralindaga’? Eki kiri kigambo ekikozesebwa omu bihandiiko eby’Ebyahandiikirwe eby’Oruheburaniya ebirukwesigwa. Baitu Septuagint ey’Oruyonaani ekozesa ekigambo “aratulindaga” na “aratujunaga.” Nahabweki eki nikyongera nikitugarra hali abaheereza ba Yahwe abesigwa abatwazibwa kubi. Nibaija kulindwa hali “obusinge bunu,” ekirukumanyisa hali abantu ababi abakurakuraniza engeso embi. (Zab. 12:7, 8) Omu mpindura ey’Ebyahandiikirwe eby’Oruheburaniya omu rulimi Oruramaiki, orukarra 7 nirugamba ruti: “Iwe, AI MUKAMA, oralindaga abahikiriire, orabajunaga hali obusinge bunu obubi ebiro n’ebiro.” Ebigambo binu nabyo buli bwakaiso oburukwoleka ngu Zabuli 12:7 terukumanyisa ebigambo bya Ruhanga.
Habw’ensonga enu, orukarra runu niruha okunihira ‘abantu abesigwa’ ngu Ruhanga naija kugira ekiyakoraho.
