1. Nitusobora tuta kumara hamu obwire na Yahwe?

TUGONZA kumara obwire n’abantu abaturukugonza. Abaswerangaine abaine okusemererwa begondeza muno omu kumara hamu obwire. Abato bagonza muno kuba n’abanywani baabo. Kandi itwena twegondeza omu bwire obutumara hamu n’Abakristaayo bagenzi baitu. Baitu ekirukukira obukuru tugonza kumara hamu obwire na Ruhanga waitu. Kinu nitusobora kukikora kuraba omu kusaba, kwesomesa Ekigambo kye, kandi n’okwecumitirizaaho ekigendererwa kye hamu n’emiringo ye enungi. Obwire obutumara hamu na Yahwe bw’omuhendo muno!​—Zab. 139:17.

2. Kizibu ki ekiturabamu?

² N’obukiraaba ngu tugonza kumara hamu obwire na Yahwe, tikikira kwanguha. Twine bingi eby’okukora, nahabweki nikisobora kutugumira kutunga obwire obw’okwejumbira omu bintu eby’omwoyo. Emirimo yaitu, obujunanizibwa obw’amaka, hamu n’ebintu ebindi ebitusemeriire kukora, nibisobora kututwarra obwire bwingi ekisobora n’okutuletera kutekereza ngu titwine bwire bw’okusaba, kwesomesa, rundi kwecumitiriiza.

3. Kintu ki ekindi ekisobora kutumarra obwire?

³ Haroho ekintu ekindi ekisobora kutumarra obwire. Kakuba tutegendesereza, nitusobora kumara obwire bwingi omu kukora ebintu ebitali bibi kikatuleetera kuburwa obwire obw’okwirra haihi na Yahwe. Ekyokurorraho, tekerezaaho eby’okwesemeza. Itwena tugasirwa obututunga obwire obw’okwesemeza. Eby’okwesemeza byaitu nibisobora kuba birungi, baitu kakuba tubimarraho obwire bwingi titurukwija kutunga obwire obw’okwejumbira omu bintu eby’omwoyo. Tusemeriire kukiijuka  ngu eby’okwesemeza tikiri nikyo kintu ekirukukira obukuru.​—Nfu. 25:27; 1 Tim. 4:8.

4. Biki ebiturukugenda kubazaaho?

⁴ Omu kicweka kinu, nitwija kubazaaho habwaki nitwetaaga kwebembeza ebintu ebirukukirayo obukuru omu bwomeezi bwaitu. Kandi nitwija kubazaaho omulingo tusobora kukozesaamu kurungi obwire bwaitu kurabira omu kubumara hamu na Yahwe, kandi n’omulingo turagasirwa obuturakozesa obwire bwaitu omu mulingo ogu.

5. Kutekerezaaho obuhabuzi obuli omu Abefeso 5:15-17 nikisobora kita kukonyera omuto kukomamu obwomeezi oburukukirayo oburungi?

⁵Komamu obwomeezi obukukirayo oburungi. Abato bakira kutekerezaaho muno omulingo ogurukukirayo oburungi ogubarakozesaamu obwomeezi bwabo. Abasomesa hamu n’abanyabuzaale abatali omu mananu nibasobora kubekambisa kugenda ha yunivasite nukwo basobole kutunga omulimo omurungi ogurabasobozesa kutunga sente nyingi. Kusoma kwa mulingo ogu kubatwarra obwire bwingi. Baitu abazaire baabo hamu n’abanywani baabo omu kitebe, nibasobora kubekambisa kukozesa obwomeezi bwabo kuheereza Yahwe. Kiki ekisobora kukonyera omuto arukugonza Yahwe kukora encwamu erukukirayo oburungi? Kirungi asome Ekyahandiikirwe ekiri omu Abefeso 5:15-17 kandi akyecumitirizeeho. (Soma.) Hanyuma y’okusoma enkarra ezi, omuto n’asobora kwekaguza ati: ‘Kiki “[Yahwe] ekyarukugonza”? Ncwamu ki eramusemeza? Ncwamu ki erankonyera kukozesa obwire bwange omu mulingo ogurukukirayo oburungi?’ Ijuka ngu, “ebiro biri bibi,” kandi ensi enu erukulemwa Sitaani eri haihi kuhwerekerezebwa. Nahabweki ky’amagezi kukozesa obwire bwaitu omu mulingo ogurasemeza Yahwe.

6. Ncwamu ki Malyamu eyiyakozere, kandi habwaki ekaba y’amagezi?

⁶Webembeze ebintu ebirukukirayo obukuru. Kusobora kukozesa obwire bwaitu omu mulingo ogurukukirayo oburungi nikisobora kutwetaagisa kukomamu hagati y’ebintu bibiri ebitali bibi. Kinu nitusobora kukirorra hakyabaireho Yesu obuyabungiire Malyamu na Maliza. Hataroho kugurukyagurukya Maliza akasemererwa muno Yesu obuyababungiire, eky’amuletiire kumucumbira ekihuuro eky’amaani. Baitu Malyamu mugenzi we, akakozesa omugisa gunu kwikara haihi na Yesu, kandi n’okuhuliiriza ebyarukwegesa. Maliza ekiyakozere kikaba kitali kibi, baitu Yesu akagamba ngu Malyamu ‘akegombooza omugabo ogu ogusemiire.’ (Luk. 10:38-42) Hanyuma y’akasumi, Malyamu nasobora kuba yayeberwe ebyokulya ebibaliire ha kiro eki, baitu nitusobora kukigumya ngu ateebwe ebintu ebiyayegere kuruga hali Yesu. Nk’oku Malyamu y’atwaire obwire y’amazire na Yesu kuba bw’omuhendo, naitwe tusemeriire kutwara obwire obutumara hamu na Yahwe omu mulingo nugwo gumu. Obwire obutumara hamu na Yahwe nitusobora tuta kubukozesa omu mulingo ogurukukirayo oburungi?

7. Habwaki kikuru muno kusaba, kwesomesa, hamu n’okwecumitiriza?

⁷Nitukyetegereza ngu kusaba, kwesomesa, hamu n’okwecumitiriza biri kicweka ky’okuramya kwaitu. Obutusaba tuba nitubaza na Isiitwe ow’omu iguru, ow’arukutugonza muno. (Bef. 2:4) Obutwesomesa Baibuli, tutunga “okumanya [okurukukwata hali] Ruhanga,” endugirro y’amagezi goona. (Nfu. 2:1-5) Obutwecumitirizaaho ebiturukwega hali Yahwe, kituleetera kutekerezaaho emiringo ye enungi  kandi n’okwijuka ebyarukugenda kutukorra hamu n’abantu boona. Gunu nugwo omulingo ogurukukirayo oburungi ogwokukozesaamu obwire bwaitu. Baitu kiki ekiratukonyera kukora eki omu bwire obuke obutwine?

8. Isomo ki eriturukwega kuruga omu mulingo Yesu y’akozesezeemu obwire bwe omu irungu?

⁸Obukiraaba nikisoboka, serra ekiikaro ekiculiire. Tekerezaaho ekyokurorraho kya Yesu. Obwakaba atakatandikire okutebeza kwe omu nsi, Yesu akamara ebiro 40 omu irungu. (Luk. 4:1, 2) Omu kicweka eki ekiculiire, akaba nasobora kusaba hali Yahwe, kandi n’okwecumitirizaaho Ise eby’akaba n’agonza akole. Kinu kikakonyera Yesu kukigumya ngu ayetekaniriize kurungi ebirengo eby’akaba ali haihi kurabamu. Nosobora ota kugasirwa omu kyokurorraho kya Yesu? Obworaaba n’oikara omu ka ey’erumu abantu baingi, nikisobora kukugumira kutunga ekiikaro ekiculiire omu ka. Omu nyikara egi, nikisobora kukwetaagisa kuserra ekiikaro ekiculiire aheeru. Eki nikyo Julie akora obwaba n’agonza kumara obwire hamu na Yahwe omu kusaba. Uwe na musaija, baikara omu France omu kisiika ekitaito, nahabweki kibagumira kutunga obwire bali bonka bataine ekirukubahugura. Julie nasoborra ati: “Nahabweki buli kiro ngenda kurubata omu kiikaro eky’okuhumurramu. Okumba nyenka, ntaho omutima, kandi mbaza na Yahwe kuruga ha mutima.”

9. Nobukiraaba ngu Yesu akaba aine bingi eby’okukora, akooleka ata ngu natwara enkoragana ye na Yahwe nk’ey’omuhendo muno?

⁹ Yesu akaba aine bingi eby’okukora omu bwomeezi bwe. Omu biikaro byona ebiyagendamuga, abantu baingi baikaraga nibamuhondera kandi bagonzaaga abahe obwire. Kiro kimu, ‘orubuga rwona rukasorrokanira ha irembo’ kumurora. Eki n’obukiraaba nukwo kyabaire, Yesu akatunga obwire obw’okugumya enkoragana ye na Yahwe. Emamba obwekaba etakasazire, akaserra ekiikaro ekiculiire nambere akaba n’asobora kumara obwire ali wenka n’asaba hali Ise.​—Mar. 1:32-35.

10-11. Kusigikirra ha Matayo 26:40, 41, kiki Yesu ekiyatereriire abegeswa be kukora omu rugonjo rwa Gesesemane, baitu kiki ekyabaireho?

¹⁰ Ha kiro kye eky’okumalirra omu nsi, obwakaba nagenda kumaliiriza obuheereza bwe, Yesu akongera yaserra ekiikaro ekiculiire nambere akaba nasobora kwecumiitiriza kandi n’okusaba. Ekiikaro eki, akakitunga omu rugonjo rwa Gesesemane. (Mat. 26:36) Omu kiro eki, Yesu akaha abegeswa be obuhabuzi obukuru muno oburukukwata ha kusaba.

¹¹ Tekerezaaho ebyabahireho. Nambere bahikiire omu rugonjo rwa Gesesemane, obwire bukaba bugenzere muno kandi obundi zaali zihingwire saaha mukaaga ez’ekiro. Yesu akasaba abakwenda kwikara nibarora kandi yagenda kusaba. (Mat. 26:37-39) Baitu obwakaba  agenzere kusaba, bakagwijagira. Yesu obuyabasangire bagwijagiire, akongera yabatererra kwikara nibarora kandi nibasaba. (Soma Matayo 26:40, 41.) Akakyetegereza ngu baali betuntwire muno kandi bajwahire. Omu mulingo ogw’embabazi, Yesu akakyetegereza ngu “omubiri nugwo mugara.” Emirundi endi ebiri, Yesu obuyagarukire naruga kusaba akasanga abegeswa be bagwijagiire omu kiikaro ky’okusaba.​—Mat. 26:42-45.

12. Kiki ekitusobora kukora kakuba obwire obumu twehurra ngu twetuntwire muno rundi tujwahire muno tutaine maani ag’okusaba?

¹²Komamu obwire obusemeriire. Obwire obumu, nitusobora kwehurra twetuntwire muno rundi tujwahire muno tutaine maani g’okusaba. Obukiraaba kikubaho, toli wenka. Kiki eky’osobora kukora? Abamu abakaba bamanyiriire kusaba hali Yahwe omu bwire bw’ekiro, bakizooire ngu kirungi kusaba obwire butakagenzere muno obubarukuba batakajwahire muno. Abamu bakyetegeriize ngu omulingo betekanizaamu obubarukuba nibasaba nk’okwikarra rundi kuteeza amaju kibakonyera kutaho omutima. Kiki eky’osobora kukora kakuba oba noyehurra ngu oyetuntwire muno rundi ohoirwemu amaani? Gambira Yahwe omulingo orukwehurramu. Okigumize kimu ngu Isiitwe ow’embabazi n’ayetegereza.​—Zab. 139:4.

13. Ebyoma ebyakalimagezi nibisobora bita kutuhugura obuturukuba nitusaba, nitwesomesa, rundi tuli omu nsorrokano?

¹³Wetantale ebisobora kukuhugura obworukuba noyesomesa. Kusaba tiguli nugwo mulingo gwonka ogutusobora kukozesa kugumya enkoragana yaitu na Yahwe. Kwesomesa Ekigambo kya Ruhanga kandi n’okugenda omu nsorrokano, nibisobora kutukonyera kweyongera kwirra haihi na Ruhanga. Haroho ekintu kyona eky’osobora kukora ekirakukonyera kukozesa obwire obw’okwesomesa hamu n’obwomara omu nsorrokano omu mulingo ogurukukirayo oburungi? Wekaguze, ‘Kiki ekikira kumpugura obumba ndi omu nsorrokano rundi obumba nindengaho kwesomesa?’ Obundi abantu kukuterra amasimu, kukusindikira obutumwa ha siimu rundi ha kyoma ekindi ekyakalimagezi? Kasumi kanu obuhumbe bw’abantu baine ebyoma ebyakalimagezi eby’omugaso. Abarukuseruliiriza abamu nibagamba ngu obworukuba nolengaho kuteekaho omutima kandi oine smartphone yaawe haihi, eki kyonka nikihugura. Omukugu omu akagamba ati: “Kimugire kuteekaho omutima ha kintu ekyorukuba  n’okora. Ebitekerezo byawe nibiba biri ha kintu kindi.” Obutuba tugenzere ha nsorrokano enkooto, tukira kwijukibwa ngu ebyoma byaitu ebyakalimagezi tubiteeke omu mulingo ogutarukwija kutalibaniza abandi. Nitusobora kukora nikyo kimu n’obuturukuba tuli itwenka nukwo ebyoma byaitu ebyakalimagezi bitatuhugura omu bwire bwaitu na Yahwe.

14. Kusigikirra ha Abafiripi 4:6, 7, Yahwe naija kutukonyera ata kutekaho omutima?

¹⁴Saba Yahwe akukonyere kutaho omutima. Kakuba okyetegereza ngu otandikire kuterezaaho ebintu bindi obworukuba noyesomesa rundi oli omu nsorrokano, saba Yahwe akukonyere. Obworukuba oyeralikiriire rundi oyetuntwire nikisobora kutanguha kuleka kutekerezaaho ebikweralikiriize kandi n’omutima kuguteeka ha bintu eby’omwoyo, baitu kikuru muno okikole. Saba Yahwe akuhe obusinge oburalinda ‘ebitekerezo byawe’ hatali omutima gwawe gwonka.​—Soma Abafiripi 4:6, 7.

15. Mulingo ki ogumu ogworagasirwa omu kumara hamu obwire na Yahwe?

¹⁵ Obworatunga obwire obw’okubaza, kuhuliiriza, kandi n’okutekerezaaho Yahwe, noija kugasirwa muno. Omu mulingo ki? Ogw’okubanza, noija kukora encwamu enungi. Baibuli n’etugumya ngu ‘obutugenda n’abantu abamagezi, tufooka b’amagezi.’ (Nfu. 13:20) Nahabweki, obworayeyongera kumara obwire na Yahwe, Endugirro y’amagezi, noija kweyongera kufooka w’amagezi. Noija kwetegereza omulingo oramusemezaamu kandi n’omulingo osobora kwerinda kukora encwamu eziramusaaliza.

16. Kumara hamu obwire na Yahwe kitukonyera kita kuba abegesa abarungi?

¹⁶ Ogwakabiri, noija kufooka omwegesa omurungi. Obutuba nitwegesa omuntu Baibuli, kimu ha bigendererwa byaitu ebikuru kiba ky’okumukonyera kwirra haihi na Yahwe. Nk’oku tweyongera kusaba hali Yahwe kandi n’okumwegaho, nukwo n’okugonza kwaitu hali uwe kweyongera kandi tweyongera kuba bakugu omu kukonyera omwegi waitu kumugonza. Tekerezaaho ekyokurorraho kya Yesu. Akabazaaho Yahwe omu mulingo ogw’obutagasi kandi ogw’okugonza, ekyaletiire n’abegeswa be kumugonza.​—Yoh. 17:25, 26.

17. Okusaba hamu n’okwesomesa bitukonyera bita kugumya okwikiriza kwaitu?

¹⁷ Ogwakasatu, okwikiriza kwawe nikwija kweyongera kuguma. Tekerezaaho ekibaho obwosaba Ruhanga obuhabuzi, kuhumuzibwa rundi obusagiki. Buli murundi Yahwe agarukamu esaara zaawe ezo, okwikiriza kwawe omuli we kweyongera. (1 Yoh. 5:15) Kiki ekindi ekisobora kukukonyera kugumya okwikiriza kwawe? Kwesomesa. Ijuka ngu, “okuikiriza nikuletwa okuhurra.” (Bar. 10:17) Baitu kusobora kwombeka  okwikiriza okugumire, tikirukumara kugarukira ha kwega ebintu kyonka. Kintu ki ekindi ekiturukwetaaga kukora?

18. Bazaaho ekyokurorraho ekirukwoleka obukuru bw’okwecumiitiriza.

¹⁸ Nitwetaaga kwecumiitirizaaho ebiturukwega. Tekerezaaho ekyokurorraho ky’omuhandiiki wa Zabuli eya 77. Akaba ayetuntwire muno habwokuba akaba nayehurra ngu uwe hamu n’Abaisaleri bagenzi be bakaba batakyasiimwa Yahwe. Habw’okwetuntura muno akaba atasobora kugwijagira ekiro. (Orukarra 2-8) Kiki ekiyakozere? Akagambira Yahwe ati: “Ndatekerezaga nemirimo yawe yona, ninyijuka engeso zawe.” (Orukarra 12) Ky’amananu ngu, omuhandiiki wa Zabuli onu akaba amanyire kurungi ebintu Yahwe ebyakaba akoliire abantu be omu busumi obwakara, baitu nabwo akekaguza ati: “Ruhanga ayeberwe okuganyira? Abohere ebyokuganyirakwe omu kiniga?” (Orukarra 9) Omuhandiiki wa Zabuli akecumiitirizaaho emirimo ya Yahwe kandi n’omulingo yayolekeremu embabazi omu kasumi akaakara. (Orukarra 11) Ekyarugiremu? Omuhandiiki wa Zabuli akakigumiza kimu ngu Yahwe tarukwija kulekaho abantu Be. (Orukarra 15) Omu mulingo nugwo gumu, okwikiriza kwawe nikwijwa kweyongera kuguma, obworayecumiitirizaaho ebintu Yahwe akoliire abantu be hamu naiwe nk’omuntu.

19. Mulingo ki ogundi oguturagasirwa obuturamara hamu obwire na Yahwe?

¹⁹ Ogwakana, kandi ogurukukirayo obukuru, okugonza kwawe hali Yahwe nikwija kweyongera. Kukira emiringo endi yoona, okugonza nikwija kukuleetera kworobera Yahwe, kwefeereza kusobora kumusemeza, kandi n’okugumira ekirengo kyona. (Mat. 22:37-39; 1 Kol. 13:4, 7; 1 Yoh. 5:3) Busaho kintu eky’omuhendo ekirukukira enkoragana yaawe na Yahwe!​—Zab. 63:1-8.

20. Kiki ekyorakora kukigumya ngu watunga obwire obwokuba hamu na Yahwe?

²⁰ Ijuka ngu okusaba, kwesomesa, hamu n’okwecumiitiriza kicweka ky’okuramya kwaitu. Nka Yesu, serra ebiikaro ebiculiire nambere oramara hamu obwire na Yahwe. Weyiheho ebintu ebitarukwetaagisa ebisobora kukuhugura. Saba Yahwe akukonyere kuteekaho omutima obworukuba noyejumbira omu bintu eby’omwoyo. Kakuba okozesa obwire bwawe omu mulingo ogurukukirayo oburungi hati, Yahwe naija kukuha obwomeezi obutahwaho omu nsi empyaka.​—Mar. 4:24.