Osomere kurungi magaziini ez’Omunaara gw’Omulinzi ez’omwaka gunu? Hati, rora obworaaba nosobora kugarukamu ebikaguzo ebirukuhonderaho:

Tusemeriire kutwaza tuta Abakristaayo abaseserweho amagita?

Nitubagonza habw’okwikiriza kwabo; baitu titubaha ekitiinisa ekihinguraine. Twetantara kwegomba abantu. (Yud. 16) Titubakaguza ebikaguzo ebirukukwata ha kunihira kwabo.​—w20.01, rup. 29.

Kiki ekisemeriire kukuletera kukigumya ngu Yahwe akutaho omutima?

Baibuli n’eyoleka ngu akakurora otakazairwe. Ahurra esaara zaawe. Namanya ebitekerezo byawe, ekiri omutima gwawe, kandi ebikorwa byawe bimukwataho. (1 Byom. 28:9; Nfu. 27:11) Akucunzire yakuleeta nambere ali.​—w20.02, rup. 12.

Byokurorraho ki ebirukwoleka akasumi tusemeriire kubaza n’akatusemeriire kuculeera?

N’okusemererwa, tubazaaho Yahwe. Tubaza obuturora omuntu nagenda kukora ensobi. Abagurusi babaza obubaha obuhabuzi obu kiba nikyetaagisa. Titubazaaho rundi kukaguza ebirukukwata ha mulimo gwaitu ogw’obuheereza omu mahanga nambere gutangirwe. Twetantara kubaza ensita.​—w20.03, rup. 20-21.

Enzige ezirukubazibwaho omu Yoweri esuura 2 nizahukana zita n’ezi ezirukubazibwaho omu Okusuku’rwa esuura 9?

Yoweri 2:20-29 Nihagamba ngu Ruhanga abinga enzige kandi araganiza kubagarurra eby’enzige z’asiisire. Hanyuma y’ebi, Ruhanga aseesa omwoyo gwe. Obunabbi obu bukahikiirizibwa Baburoni obuyatahiriire Isaleri hamu n’ebyahondiireho. Obunabbi obuli omu Okusuku’rwa 9:1-11 nibubazaaho abaseserweho amagita abali nk’enzige omu kasumi kanu, abarangirra obutumwa bwa Ruhanga obw’okucwera omusango ensi enu embi kandi obuleetera abasagiki baayo kwehurra kubi.​—w20.04, rup. 3-6.

Noha omukama ow’obukiizi bw’emoso omu kasumi kanu?

Russia n’amahanga agarukugisagika. Bakwasireho muno abantu ba Ruhanga, batangire omulimo gwaitu ogw’okutebeza kandi bolekere ngu niba noba Abakaiso be. Omukama ow’obukiizi bw’emoso aikaire narwanisa omukama ow’obukiizi bw’obulyo.​—w20.05, rup. 13.

“Ekyana eky’omwoyo” nikitwarramu emiringo yonka erukubazibwaho omu Abagaratiya 5:22, 23, NW?

Nangwa. Omwoyo ogurukwera gutukonyera kutunga emiringo endi enungi, nk’okugumiisiriza. (1 Tim. 6:11)​—w20.06, rup. 17.

Kabi ki akamu akali ha kuteeka ebintu ebirukutukwataho ha mikura ey’okubalizaaho?

Ebyoteeka ha mikura nibisobora kwoleka ngu n’oyepanka, kandi ngu toli muntu omwebundaazi.​—w20.07, rup. 6-7.

Abakristaayo nibasobora kwega ki kuruga h’abasohi abakugu?

Basoha omu kiikaro n’omu bwire nambere basobora kukwata encu. Batendekwa kukozesa ebikwato ebihikire. Kandi bakora n’obumanzi n’omu nyikara eziikara nizihinduka. Naitwe nitusobora kukora nk’abo omu buheereza bwaitu.​—w20.09, rup. 5.

Miringo ki emu eitusobora kukonyeramu abeegi ba Baibuli kweyongera kugonza Yahwe?

Nitusobora kubekambisa kusoma Baibuli buli kiro kandi n’okwecumitirizaaho ebibaba basomere. Nitusobora kubegesa n’okusaba.​—w20.11, rup. 4.

Nibaha abakubazibwaho omu bigambo binu: “Omu Kristo bona balyomezebwa”?​—1 Kol. 15:22.

Omukwenda Paulo akaba atarukumanyisa ngu buli muntu wena alihumburwa. Akaba nabazaaho Abakristaayo abaseserweho amagita, abo “abanyakweziibwe omu Kristo Yesu.” (1 Kol. 1:2; 15:18)​—w20.12, rup. 5-6.

Abaseserweho amagita nabaija kukora ki hanyuma ‘yokuhindurwa, omu kuzibiriza ekikohi, ha ngwara ya hampero’?​—1 Kol. 15:51-53.

Nibaija kukorra hamu na Kristo kulema abantu n’omwigo gw’ekyoma. (Kus. 2:26, 27)​—w20.12, rup. 12-13.