1-2. (a) Yubile kiki? (Rora  akasanduko “Yubile Yamanyisaaga Ki?”) (b) Nk’oku kyolekerwe omu Luka 4:16-18, Yesu akabazaaho ki?

OMU mahanga agamu omukama rundi omugo obwahikya emyaka 50 nalema habaho okujaguza kw’amaani. Kujaguza kunu kwetwa yubile. Kujaguza kunu nikusobora kumara ekiro kimu, wiiki, rundi n’okukiraho. Baitu akasumi kahika kuhwaho kandi abantu beebwa okusemererwa okubatungire.

² Nitugenda kubazaaho yubile ey’erukukira ezindi zoona. Yubile enu n’ekira n’ey’Abasaleri bajaguzaga hanyuma y’emyaka 50 kandi kujaguza kunu kwamaraga omwaka. Yubile ey’Abaisaleri yabaleteraga kutunga obugabe. Habwaki tusemeriire kwegaho Yubile Abaisaleri bajaguzaaga? Habwokuba omwaka gwa Yubile Abaisaleri ogubajaguzaaga nigutwijukya entekaniza Yahwe ey’atuteriireho erukutugasira omu kasumi kanu kandi eratusobozesa kutunga obugabe obutalihwaho, kandi obugabe bunu nubwo Yesu yabalizeeho.​—Soma Luka 4:16-18.

3. Kusigikirra ha Ebyabalevi 25:8-12, Yubile yagasiraga eta Abaisaleri?

³ Kusobora kwetegereza kurungi obugabe Yesu obwakaba namanyisa, tusemeriire kubanza kubazaaho entekaniza ya Yubile Ruhanga ei yateriireho abantu be abakara. Yahwe akagambira Abaisaleri ati: ‘Kandi mulyeza omwaka gw’amakumi atano, mulidumira obugabe omu nsi yoona abantu boona abaamu: guliba nambere muli ogwa Yubile; kandi muligarukayo omuntu wena hali obutakabwe, kandi muligarukayo omuntu wena hali ab’orugandarwe.’ (Soma Ebyabalevi 25:8-12.) Omu kicweka ekyahoire tukarora omulingo Sabiiti eyabahoga buli wiiki nk’oku yagasiraga Abaisaleri. Kandi Yubile yo yabagasiraga eta? Ekyokurorraho, Omwisaleri obuyalemwaga kusasura amabanja kandi kikamuletera kutunda itaka lye kusobora kugasasura, omu mwaka gwa Yubile itaka eri balimugarurraga.  Nahabweki omusaija ogu yagarukaga “hali obutakabwe” kandi atunga eky’okugweta abaana be. Ekindi omusaija obuyatungaga amabanja maingi gakamuletera kutunda omwana we nk’omwiru rundi uwe wenyini kufooka mwiru kusobora kusasura amabanja ago, omu mwaka gwa Yubile, omwiru ogu akaba asemeriire kugarukayo “hali aborugandarwe.” Nahabweki buli mwiru wena yaikaraga aine okunihira okw’okutunga obugabe! Mali entekaniza enu n’eyoleka ngu Yahwe yafaahoga muno abantu be.

4-5. Habwaki kikuru twegeho Yubile ey’omu Isaleri eya kara?

⁴ Mulingo ki ogundi ogwa Yubile yagasiramuga Abaisaleri? Yahwe akagamba ati: “Tihalibaho abanaku omulinywe; (baitu mazimakwo [Yahwe] alikuha omugisa omu nsi [Yahwe] Ruhanga wawe eyakuha okuba obugwetwa mugirye.)” (Bir. 15:4) Eki nikyahukanira kimu n’ebiturukurora omu nsi kasumi kanu habwokuba abaguuda nibeyongerra kimu kugudahara kandi abanaku nibeyongerra kimu kufooka banaku.

⁵ Nk’Abakristaayo, tituli hansi y’Ebiragiro bya Musa. Kinu nikimanyisa ngu tituhondera ekiragiro kya Yubile eky’okulekera abairu, kuganyira amabanja, hamu n’okugarurra abantu itaka ery’obugwetwa. (Bar. 7:4; 10:4; Bef. 2:15) Baitu nabwo kikuru twegeho Yubile. Habwaki? Habwokuba entekaniza enu netwijukya Yahwe ekiyatukoliire kusobora kutucungura kuruga omu bwiru bw’ekibi.

6. Habwaki abantu nibetaaga kucungurwa?

⁶ Itwena nitwetaaga kucungurwa habwokuba tuli bairu b’ekibi kandi obwiru bunu nubwo burukukirayo kuba bubi. Habwokuba tuli basiisi tukura omu myaka, turwara kandi tufa. Baingi bagumya ekintu kinu obuberora omu ndolerwamu rundi obubarwara bakagenda mwa dakitaali kutunga obujanjabi. Ekintu ekindi, tuhwamu amaani obutusiisa. Omukwenda Paulo akagamba ngu akaba afookere “omuhambwa hali ebiragiro ebyekibi, ebiri omu [mubiri gwe].” Kandi akongera yagamba ati: “Nyowe ndi muntu wobujune! Noha alinjuna omu mubiri ogwokufa kunu?”​—Bar. 7:23, 24.

7. Nabbi Isaya akaranga ki ha bugabe?

 ⁷ Ekirungi kiri ngu, Ruhanga akatuteraho entekaniza ey’okutucungura kuruga omu kibi nukwo tutunge obugabe. Yesu nuwe arukutusobozesa kutunga obugabe bunu. Emyaka nka 700 Yesu atakaizire omu nsi, nabbi Isaya akaranga ngu omu kasumi ak’omu maiso abantu baali nibagenda kutunga obugabe oburukukira obw’Abaisaleri batungaga omu mwaka gwa Yubile. Akahandiika ati: ‘Omwoyo gwa [Yahwe] Ruhanga guli hali nyowe; baitu Mukama ansesereho amagita okudumira abanaku ebigambo ebirungi; antumire okuboha abanyina omutima ogucwekere, okudumira abanyankomo obugabe.’ (Is. 61:1) Obunabbi bunu nibubazaaho oha?

8. Noha yahikiriize obunabbi bwa Isaya oburukukwata ha bugabe?

⁸ Obunabbi bunu obukuru oburukukwata ha bugabe bukatandika kuhikirizibwa Yesu obuyatandikire obuheereza bwe. Obuyagenzere omu isorrokaniro erikaba liri omu rubuga nambere yakuliire orwa Nazalesi, Yesu akasoma obunabbi obu bwonyini omu maiso g’Abayudaaya abaali besoroize. Yesu akoleka ngu obunabbi bunu nibubazaaho we obuyagambire ati: “Omwoyo gwa Mukama guli hali nyowe, baitu akansesaho amagita okutebeza abasege ebigambo ebirungi; akantuma okutebeza okulekerwa hali abanyankomo, nokuigura amaiso gabafu bamaiso, okulekera abasasanguirwe, okutebeza omwaka gwa Mukama ogurukuikirizibwa.” (Luk. 4:16-19) Yesu akahikiriza ata obunabbi bunu?

9. Abantu abarukukira obwingi omu kasumi ka Yesu baali nibanihira kucungurwa kwa mulingo ki?

⁹ Omu kasumi ka Yesu abantu nubwo batandikire kutunga obugabe Isaya obuyarangire kandi Yesu obuyasomere. Kinu Yesu akakigumya obuyarangiriire ati: ‘Hati ebyahandiikirwe binu bihikiriziibwe.’ (Luk. 4:21) Nikizooka ngu baingi abahuliire ebigambo Yesu yasomere baali nibagonza kucungurwa kuruga hansi y’obulemi bwa Roma. Nibasobora kuba nabo baali nibatekereza nk’abasaija ababiri abagambire ngu: “Itwe tukanihira ngu Nuwe alicungura Isareri.” (Luk. 24:13, 21) Tukimanyire ngu Yesu tiyayekambisaga abahondezi be kujemera obulemi obubi obw’Abaroma. Baitu akabaragira kusasura “Kaisali ebya Kaisali.” (Mat. 22:21) Omu kasumi ako Yesu akaletera ata abantu obugabe?

10. Yesu akakonyera abantu kutunga obugabe kuruga hali ki?

¹⁰ Omwana wa Ruhanga akaija kukonyera  abantu kutunga obugabe omu miringo ebiri. Ogw’okubanza, Yesu akakonyera abantu kutunga obugabe kuruga omu nyegesa ez’abakuru b’ediini ezabonabonesaga abantu. Abayudaaya baingi kasumi ako bahambirizibwaga kuhondera emigenzo n’enyikiriza ezitahikire. (Mat. 5:31-37; 15:1-11) Abo abayefooraga kuba nibakonyera abantu omu by’omwoyo nabo bonyini bakaba nibasisana abafu bamaiso. Habw’okwanga Masiya hamu n’ebintu eby’omwoyo ebiyabegeseze, bakasigara omu mwirima hamu n’omu kibi. (Yoh. 9:1, 14-16, 35-41) Yesu akakonyera abaculeezi kutunga obugabe omu by’omwoyo obuyabegeseze ebintu ebihikire kandi y’abateraho ekyokurorraho ekirungi.​—Mar. 1:22; 2:23–3:5.

11. Mulingo ki ogwakabiri Yesu oguyahairemu abantu obugabe?

¹¹ Omulingo ogwakabiri Yesu yakonyire abantu kutunga obugabe, nugwo ogw’okubacungura kuruga omu kibi ekyabagwetiirwe. Ruhanga asigikirra ha kicunguro kya Yesu kuganyira ebibi by’abantu abaikiririza omu kicunguro kandi aboleeka okwikiriza kunu omu bikorwa byabo. (Baheb. 10:12-18) Yesu akagamba ati: “Nukwo Omwana obwalibafora abobugabe muliba bobugabe mali.” (Yoh. 8:36) Obugabe Yesu yabalizeeho nibukirra hara obugabe Abaisaleri batungaga omu mwaka gwa Yubile . Ekyokurorraho, omusaija ayabaga atungire obugabe omu mwaka gwa Yubile akaba nasobora kwongera afooke mwiru, kandi ahike afe. Baitu obugabe kuruga hali Yesu bw’ebiro n’ebiro.

12. Nibaha ababandize kugasirwa omu bugabe Yesu yarangiriire?

¹² Ha kiro kya Pentekote ey’omwaka 33 C.E., Yahwe kasesaho abakwenda hamu n’abaheereza be abesigwa abasaija n’abakazi omwoyo ogurukwera. Akabafoora baana be nukwo omu kasumi ak’omu maiso abahumbuule abatwale omu iguru baleme hamu na Yesu. (Bar. 8:2, 15-17) Banu nubo babandize kugasirwa omu bugabe Yesu yarangiriire omu isorrokaniro lya Nazalesi. Abasaija n’abakazi banu bakaba batakyali bairu b’enyegesa ez’ebisuba hamu n’ebiragiro eby’abebembezi b’amadiini ebikaba bitali omu byahandiikirwe. Kandi Ruhanga akabarora nk’abacungwirwe kuruga omu kibi ekirugwamu okufa. Yubile ey’akokurorraho ey’atandikire n’okusesaho abahondezi ba Kristo omwoyo ogurukwera omu mwaka gwa 33 C.E. niija kuhwaho ha kumalirra kw’Obulemi bwa Yesu obw’Emyaka Rukumi. Bintu ki ebirungi ebirukwija kuba bikozerwe nambere akasumi ako karahwera?

13-14. Oihireho Abakristaayo abaseserweho amagita, bantu ki abandi abarukwegondeza omu bugabe Yesu yarangiriire?

¹³ Omu kasumi kanu, obukaikuru n’obukaikuru bw’abantu kuruga omu mahanga goona bali kicweka ‘eky’entaama ezindi.’ (Yoh. 10:16) Abantu banu tibakomerwe kugenda omu iguru kulema hamu na Yesu. Baitu Baibuli n’eyoleka ngu baine omugisa ogw’okutunga obwomeezi obutahwaho omu nsi. Naiwe nukwo orukunihira oti?

¹⁴ N’omu kasumi kanu, naitwe twine emu ha migisa erukusisana n’ey’Abakristaayo abaseserweho amagita. Habw’okwikiririza omu kicunguro ekya Yesu, nitusobora kusaba Yahwe atuganyire ebibi byaitu. Kinu kitusobozesa kuba n’enkoragana enungi na Ruhanga kandi n’okutunga obusinge. (Bef. 1:7; Kus. 7:14, 15) Tekerezaaho n’emigisa ey’otungire habw’okucungurwa kuruga omu nyegesa ez’ebisuba eziwaikiririzaamuga. Yesu akagamba ati: “Mulimanya amananu, namananu galibafora bobugabe.” (Yoh. 8:32) Katwine omugisa ogw’amaani habw’okutunga obugabe bunu!

15. Bugabe bwa mulingo ki, n’emigisa ebiturukwija kutunga omu kasumi akomu maiso?

¹⁵ Nitunihira kutunga obugabe oburukukira obutwine hati. Omu kasumi akatali kahara, Yesu naija kuhwerekereza ediini ez’ebisuba na gavumenti ez’abantu embi. Ruhanga naija kuliinda abantu ‘ab’ekitebe ekingi’ abarukumuheereza  kandi hanyuma abahe omugisa ogw’okwikara omu rugonjo orurungi omu nsi. (Kus. 7:9, 14) N’abandi baingi muno nibaija kuhumbuuka kandi batunge obugabe habw’okwihibwaho ebizibu byona ebyaleserwe ekibi kya Adamu.​—Eng. 24:15.

16. Abantu nibaija kutunga bugabe ki obw’embaganiza omu kasumi ak’omu maiso?

¹⁶ Omu Bulemi obw’Emyaka Rukumi, Yesu hamu n’abaralema nabo, nibaija kukonyera abantu kufooka abahikiriire n’okutunga enkoragana erukukirrayo kimu oburungi na Ruhanga. Akasumi ako ak’okugarra buhyaka buli kimu kandi n’okuha abantu obugabe nikaija kuba nikasisana na Yubile ey’omu Isaleri. Ekirayongeraho, abantu omu nsi yoona abarukuheereza Yahwe n’obwesigwa balifooka abahikiriire kandi abataine kibi.

17. Kusigikirra omu Isaya 65:21-23 abantu ba Ruhanga nibaija kutunga obwomeezi bwa mulingo ki? (Rora ekisisani ekya ha kyesweko.)

¹⁷ Obunabbi obuli omu Isaya 65:21-23 (Soma) nibusoborra nk’oku obwomeezi buliba omu nsi. Omu bwomeezi obu titurukwija kuba tutaine eby’okukora. Baitu, nitwija kuba twine emirimo enungi ey’okwegondezaamu. Nambere Obulemi obw’Emyaka Rukumi burahwera, nitukigumya ngu “[ebihangirwe] nabyo birilekerwa okuruga omu kutungwa okujunda, okutaha omu bugabe obw’ekitinisa ekyabana ba Ruhanga.”​—Bar. 8:21.

18. Habwaki nitukigumya ngu nitwija kutunga obwomeezi oburungi omu kasumi ak’omu maiso?

¹⁸ Nk’oku Yahwe yakoliire Abaisaleri entekaniza ey’okutunga obwire obw’okukora hamu n’obw’okuhuumura, nukwo arukwija kukorra ati abantu omu bulemi bwa Kristo obw’Emyaka Rukumi. Nihaija kubaho n’obwire obw’okuramya Yahwe. Nk’oku kuramya Yahwe kituletera okusemererwa omu kasumi, nukwo kirukwija kuba n’omu nsi empyaka. Mali, abantu boona abesigwa nibaija kwegondeza omu Bulemi bwa Kristo obw’Emyaka Rukumi habwokuba nibaija kuba baine emirimo enungi kandi nibaramya Yahwe.