Nkazaarwa omu 1955, kandi ninyowe omuto omu baana basatu aboojo. Nkakurra haihi n’omwaro oguli omu masirimuka ga Finland, omu kiikaro hati ekirukumanywa nk’orubuga rwa Vantaa.

Nyina nyowe akabatizibwa nk’omu h’Abakaiso ba Yahwe obunkaba ntakazairwe. Isiitwe yahakanizaaga amananu kandi tiyaikirizaaga nyina itwe kutwegesa Baibuli rundi kututwara omu nsorrokano. Nahabweki yatwegesaaga isiitwe obuyabaga ataraho.

Kuruga omu buto nkaba ncweriiremu kimu kwikara ndi mwesigwa hali Yahwe. Ekyokurorraho, obunkaba nyine emyaka musanju, omwegesa wange akantabukira habw’okwanga kulya ebyokulya ebirumu esagama ebirukumanywa nka verilättyjä. Akakozesa omukono gumu kumiga amatama gange nukwo nyesamye akanwa kange, kandi yalengaho kundiisa ebyokulya ebikaba birumu esagama nakozesa omukono ogundi. Baitu nkasobora kuteera ekigiiko ekikaba kiri omu mukono gwe kandi kyagwa hansi.

Obunahikize emyaka 12, ise nyowe akafa. Hanyuma y’okufa kwe, nkatandika kugenda omu nsorrokano z’ekitebe. Ab’oruganda omu kitebe bakanfaaho muno kandi kinu kikanyekambisa kukurakurana omu by’omwoyo. Nkatandika kusomaga Baibuli buli kiro, n’okusoma ebitabu byaitu ntaireho omutima. Kinu kikansobozesa kubatizibwa obunkaba nyine emyaka 14, omu Agusto 8, 1969.

 Hanyuma y’akasumi kake mmazire kusoma, nkatandika kuheereza nka payoniya ow’akasumi koona. Omu wiiki nke, nkagenda kuheereza nambere hakaba hali obwetaago omu Pielavesi, ekiikaro ekirukusangwa omu Finland.

Oku nuho natangatangaine omwisiki ayafookere mukazi wange omugonzebwa ow’arukwetwa Sirkka. Mali nkamugonza muno habwokuba akaba ali mukazi omuculeezi kandi ayagonzaaga muno Yahwe. Akaba atarukugonza kuba rurangaanwa, rundi kweserurra itungo. Itwena tukaba nitugonza kuha Yahwe ekirukukirayo omu bwomeezi bwaitu katube tuli omu buheereza bwa mulingo ki. Tukataaha obuswere omu Maaci 23, 1974. Omu kiikaro ky’okugenda kwegondeza omu biro byaitu eby’okubanza eby’obuswere, tukacwamu kugenda Karttula, nambere hakaba hali obwetaago bw’amaani obw’abatebezi b’Obukama.

Kuruga obutwataahire obuswere, Yahwe akatwoleka ngu naija kwikara natuhikyaho ebyetaago byaitu kakuba twikara nitwebembeza Obukama bwe. (Mat. 6:33) Ekyokurorraho, obutukaba tuli omu Karttula, tukaba tutaine motoka. Hakubanza twakozesaaga egaali. Baitu omu kasumi k’obufuki, enyikara y’obwire yafukaga muno. Nahabweki kusobora kwejumbira omu buheereza, kikaba nikitwetaagisa kuba na motoka. Baitu tukaba tutaine sente ez’okugigura.

Mugenzi wange omukuru akatubungira omu kaire akatukaba tutarukumunihira. Hanyuma akatukonyera yatuha motoka ye. Omusoro gwayo akaba agusaswire. Itwe ekitukaba twine kugura nugo amafuta gonka. Kandi hati tukaba tutungire ekiiruka ekitukaba nitwetaaga.

Yahwe akatwoleka ngu akaba ahikiriize obujunanizibwa bwe obw’okutuhikyaho ebyetaago byaitu eby’omubiri. Ekitukaba twine kukora nikyo kwebembeza Obukama bwe.

Obutukaba tuli omu Isomero lya Bapayoniya omu 1978, omu h’abegesa baitu ow’arukwetwa Raimo Kuokkanen, a akatwekambisa kwijuza foomu ey’okugenda omu Isomero lya Gilead. Nahabweki tukatandika kwega Orungereeza n’ekigendererwa eky’okugenda omu isomero linu. Baitu, omu 1980, obutukaba tutakaijwize foomu, tukaraalizibwa kuheereza ha ofiisi y’itaagi omu Finland. Omu kasumi ako, Ababeseeri bakaba batarukwikirizibwa kugenda omu Isomero lya Gilead. Baitu tukaba nitugonza kuheereza nambere Yahwe akaba n’agonza  hatali nambere itwe turukugonza. Nahabweki tukaikiriza okuraalizibwa oku. Baitu tukagumizaamu nitwega Orungereeza kakuba habaho omugisa gwona ogw’okwijuza foomu ey’okugenda omu Isomero lya Gilead.

Hanyuma y’okurabaho emyaka nke, Akatebe Akalemi kakaikiriza Ababeseri kwijuza foomu ey’okugenda omu isomero lya Gilead. Ahonaaho tukaijuza foomu, baitu kitabe ngu habwokuba tukaba tutarukugonza Beseri. Ohireho tukaba twehaireyo kuheereza nambere hakaba hali obwetaago obw’amaani kakuba tuba twikiriziibwe. Tukaikirizibwa kugenda omu Isomero lya Gilead kandi twaturukira omu kilaasi ya 79 omu Sebutemba 1985. Tukasindikwa kuheereza omu Colombia.

Omu Colombia, tukabanza kusindikwa kuheereza ha ofiisi y’itaagi. Nkalengaho kukora kyona ekindukusobora kuhikiiriza obujunanizibwa bwange, baitu hanyuma y’omwaka, tukehurra ngu nitwetaaga kuhinduramu. Habw’omurundi gwange ogw’okubanza kandi ogw’okumalirra omu bwomeezi bwange, nkasaba kuheebwa obujunanizibwa obundi. Hanyuma tukasindikwa kuheereza nk’abamiisani omu rubuga rwa Neiva, omu kiikaro ekirukwetwa Huila.

Ngonza muno omulimo ogw’okutebeza. Obunkaba ninkyaheereza nka Payoniya kandi ntakataahire obuswere omu Finland, obwire obumu natebezaaga kuruga nyenkyakara kuhikya rwebagyo. Nyowe na Sirkka obutukaba tukyataahire obuswere, twamaraga ekiro kyona nitutebeza. Obutwabaga nitutebeza omu biikaro ebya hara, obwire obumu twaraaraga omu motoka yaitu. Kinu kyatukonyeraga kutamara obwire bwingi omu ruguudo kandi tutandika obuheereza bwaitu kara ekiro ekyahonderahoga.

Hati nk’oku tukaba tufookere abamiisani, tukongera twatunga ekihika eky’amaani ekitukaba twine omu buheereza kara. Ekitebe kyaitu kikakurakurana, kandi ab’oruganda na banyaanya itwe omu Colombia bakaba bali bantu abarukuteekamu abandi ekitiinisa, abaine okugonza kandi abarukusiima.

Haroho etawuni ezikaba ziri haihi na Neiva nambere hakaba hatali Abakaiso ba Yahwe. Nkaba nyeralikiriire muno ha mulingo ebiikaro ebi bisobora kutungamu amakuru amarungi. Baitu, habw’obulemu, ebiikaro ebi bikaba bitali birungi hali abantu abakaba batali baikazi babyo. Nahabweki nkasaba ngu kakuba omuntu omu afooka omu h’Abakaiso ba Yahwe omu biikaro ebi. Nkateekereza ngu omuntu kuruga omu kiikaro eki kusobora kwega amananu, kyakumwetaagisize kuba naikara omu Neiva. Ekindi, nkasaba ngu omuntu ogu hanyuma y’okubatizibwa n’okukurakurana omu by’omwoyo, asemeriire kugarukayo nukwo atebeze. Ekinkaba ntamanyire nikyo ngu Yahwe akaba aine omulingo omurungi muno ogw’okukikoramu ogurukukira ogwange.

Hanyuma y’obwire buke, nkatandika kwega Baibuli n’omusigazi omuto arukwetwa Fernando González. Yaikaraga omu Algeciras, emu ha tawuni nambere hakaba hatali Abakaiso ba Yahwe. Buli wiiki, Fernando yagendaga orugendo orurukuhingura omu kilomita 50 kwija omu Neiva ha mulimo. Yateekanizaaga kurungi muno buli murundi twabaga nitugenda kwega kandi ahonaaho yatandika kwija omu nsorrokano zoona. Kurugira kimu ha wiiki y’okubanza, Fernando yasoroozaaga abantu nambere arukwikara kandi abegesa ebiyabaga ayegere.

 Fernando akabatizibwa omu Janwali 1990, hanyuma y’okumara emyezi mukaaga nayega Baibuli. Hanyuma akafooka payoniya ow’akasumi koona. Hati nk’oku omu Algeciras hakaba haliyo omu h’Abakaiso ba Yahwe, itaagi likaba nirisobora kusindikayo bapayoniya ab’embaganiza. Kandi omu Febwali 1992, ekitebe kikatandikwaho omu rubuga oru.

Fernando atagarukire ha kutebeza omu kiikaro kye honka. Hanyuma y’okutaaha obuswere, uwe na mukazi we bakagenda omu San Vicente del Caguán, ekiikaro ekindi nambere hakaba hatali Abakaiso ba Yahwe. Kandi oku bakakonyera kutandikaho ekitebe. Omu 2002, Fernando akakomwa kuheereza nk’omurolerezi w’ekicweka, kandi uwe na mukazi we Olga, nibakyagumizaamu kuheereza omu mulimo gw’okubungira ebitebe kuhikya na hati.

Ekintu kinu kikanyegesa obukuru obw’okusaba ekintu kyonyini obukirukuhika ha bujunanizibwa obututunga omu kitebe. Yahwe akora ebintu ebitutasobora kukora. Habwokuba gunu mulimo gwe, baitu tiguli gwaitu.—Mat. 9:38.

Omu 1990 tukasindikwa kuheereza omu mulimo gw’okubungira ebitebe. Obujunanizibwa bwaitu obw’okubanza bukaba omu rubuga rwa Bogotá. Obujunanizibwa bunu bukatutiinisa muno. Nyowe na mukazi wange tuli bantu aba buli kiro abataine bukugu bwona. Kandi tukaba tutamanyiriire kwikara omu bibuga ebirumu abantu baingi. Baitu Yahwe akahikiiriza omurago gwe ogw’okuturolerra ogurukusangwa omu Abafiripi 2:​13, ogurukugamba ngu: “Baitu Ruhanga nuwe akoza omulinywe okugonza nokukora.”

Hanyuma, tukasindikwa omu mulimo gw’okubungira ebitebe omu Medellín, orubuga orunsangirwe mbalizeeho ha kutandika. Abantu omu kiikaro eki bakaba bamanyiriire okurwana okwa ha nguudo kuhika ha rulengo ngu kikaba kitakyabatiinisa. Eky’okurorraho, kiro kimu obunkaba ninyegesa omwegi wa Baibuli, amasasi gakatandika kuteera. Nkaba ndi haihi kugwa hansi baitu uwe omwegi wa Baibuli akagumizaamu nasoma obucweka atatiinire. Obuyamazire kusoma akangambira ngu mmuganyireho kataito, kandi yagenda aheeru. Hanyuma y’akacu kake akagaruka n’abaana babiri abato kandi omu mulingo oguteekaine yangambira ngu, “Nganyira, mbaire ngenzere kwihayo abaana bange.”

Haroho n’obwire obundi obutwabaga omu nyikara ey’akabi. Kiro kimu, tukaba tuli omu kutebeza okw’enju ha nju, mukazi wange akaija nairuka nambere ndi atiinire muno. Akagamba ngu omuntu akaba nateera amasasi nambere ali. Obunakihuliire, nkatiina muno. Baitu hanyuma tukakyetegereza ngu omusaija w’emundu akaba atarukugonza kurasa Sirkka, baitu akaba narasa omusaija ow’akaba namuraba haihi.

Hanyuma y’akasumi, naitwe okurwana okwa ha nguudo kukaba kutakyatutiinisa. Obumanzi bw’ab’oruganda ab’omu kiikaro eki abaarabaga omu nyikara nka zinu n’okukiraho, bukatugarramu amaani. Tukagamba ngu Yahwe obwaraaba nabakonyera, naitwe naija kutukonyera. Twateekaga omu nkora amagezi g’ab’oruganda ab’omu kiikaro eki, twerinda akabi, kandi ebindi tubireka omu mikono ya Yahwe.

Baitu obwire obumu, enyikara tizaabaga z’akabi muno nk’oku twabaga nitunihira. Kiro kimu  nkasisana nk’ow’arukuhurra abakazi babiri nibajumangana aheeru y’enju einkaba mbungiire. Nkaba ntarukugonza kugenda kubarora nibakungana, baitu omuntu ounkaba nintebeza, akansoonasoona kugenda kwikarra ha bbalaza y’enju ye. Hanyuma y’okugenda aheeru nkakyetegereza ngu “enkungane” zikaba ziri hagati ya kasuku ibiri ezikaba nizisibiriza abataahi.

Omu 1997, nkakomwa kuheereza nk’omwegesa omu isomero lya Ministerial Training School. b Nagonzaaga muno kugenda omu masomero g’ekitebe, baitu nkaba ntakatekerezaahoga kutunga omugisa ogw’okwegesa omu limu ha masomero ago.

Hanyuma nkaheereza nka, district overseer. Entekaniza egi obuyaihirweho nkagaruka omu mulimo ogw’okubungira ebitebe. Nahabweki mmazire emyaka ey’erukuhingura omu 30 ninyegondeza omu kuheereza nk’omwegesa kandi nk’omuroleerezi w’ekicweka. Obuheereza bunu burugiremu emigisa nyingi muno, baitu nabwo bibaire bitanguhire. Leka mbagambire habwaki.

Ndi muntu ow’arukweikiririzaamu muno kandi kinu kinkonyiire kuraba omu nyikara ezigumangaine muno. Nagonzaaga kugonjoora ensonga omu kitebe. Obwire obumu nahambirizaaga abandi kwoleka okugonza n’okwetegereza omu kitebe. Baitu omu kasumi nuko kamu nanyowe nkaba ninyetaaga kwoleka emiringo niyo emu.—Bar. 7:​21-23.

Habw’obuceke bwange, obwire obumu kindetera kwehurra mpoirwemu amaani. (Bar. 7:24) Kiro kimu nkasaba Yahwe namugambira ngu kyakubaire kirungi ndeka kuheereza nk’omumiisani kandi ngarukeyo omu Finland. Rwebajo oru, nkagenda omu nsorrokano. Ebinahuliire omu nsorrokano bikanyekambisa kugumizaamu nimpeereza nk’omumiisani n’okwikara nindwanisa obuceke bwange. N’akasumi kanu ninkyasiima omulingo Yahwe yagarukiremu esaara yange. Ekindi, ninsiima muno omulingo Yahwe ankonyiire kusingura obuceke bwange.

Nyowe na mukazi wange Sirkka nitusiima muno Yahwe habw’omugisa ogw’atuhaire ogw’okumuheereza omu buheereza obw’akasumi koona. Ekindi, ninsiima muno Yahwe habw’okumpa omukazi ow’arukungonza kandi omwesigwa haluwe.

Omu kasumi akatali ka hara, ninyija kuhikya emyaka 70, kandi ndeke kuheereza nk’omwegesa omu masomero g’ekitebe n’okuheereza nk’omuroleerezi w’ekicweka. Baitu eki tikirukunyeraliikiriza. Habwaki? Habwokuba ninkigumya ngu ekirukukirayo kusemeza Yahwe nukwo kumuheereza n’obuculeezi n’okumukugiza kuruga ha mutima ogwijwire okusemererwa n’okusiima. (Mik. 6:8; Mar. 12:​32-34) Tikirukutwetaagisa kuba n’obujunanizibwa obw’amaani kusobora kusemeza Yahwe.

Obundukutekerezaaho obujunanizibwa obunyegondiizeemu, nkyetegeriize ngu ntabutunge ngu habwokuba nkaba ninkira abandi rundi ngu habwokuba nkaba nyine obusobozi obw’embaganiza. Oihireho, Yahwe akampa obujunanizibwa bunu habw’embabazi ze ezitatusemeriire. Akampa obujunanizibwa bunu n’obukiraaba ngu nkaba nyine obuceke. Kandi nsoboire kuhikiiriza obujunanizibwa bunu habwobukonyezi bwa Yahwe. Omu mulingo ogu, obuceke bwange bwolekere amaani ga Ruhanga.—2 Kol. 12:9.