Eky’obusaasi, obunahikize emyaka nka ikumi n’esatu, enkoragana yange na Yahwe ekatandika kuceka. Abeegi bataahi bange ha isomero, basisanaga nk’abaine obugabe kukora buli kimu ekibarukugonza kandi na nyowe nkehurra nigonza kuba nkabo. Ebiragiro by’abazaire bange hamu n’emisingi ya Baibuli nkatandika kubirora nk’omugugu kandi nkehurra ngu kuheereza Yahwe kigumire muno. N’obukiraaba ngu nkaba ninkigumya ngu Yahwe aroho, nkaba ntakyaine enkoragana nauwe.

Ntalekere kimu kutebeza baitu natebezaaga kataito. Obunagendaga kutebeza nabaga ntetekaniize, nahabweki kyangumiraga kutebeza omuntu. Ekyarugiremu, nkaba ntakyaine abantu abokugarukira rundi abeegi ba Baibuli. Kinu kikaamaraho okusemererwa naleka kwegondeza omu buheereza. Nayekaguzaaga nti, ‘Muntu ki asobora kwikra natebeza wiiki ha wiiki, kwezi ha kwezi?’

Obunahikize emyaka 17, nkagonza kwetongora. Nahabweki nkasibamu ebyange nagenda omu Australia. Abazaire bange bakasaasa muno obubaarozere ningenda. Bakaba beralikiriire muno, baitu bakatekereza ngu ninyija kugumizaamu nimpereza Yahwe.

 Obunkaba ndi Australia, nkeyongera kuceka omu by’omwoyo. Nkantandika kwosa ensorrokano. Nkanywana ensingaanto abandi abali nka nyowe abaijaga omu nsorrokano nyamusana baitu obwire bw’ekiro nibagenda omu bbaara kuzina n’okunywa amaarwa. Obunyijuka akasumi ako, nkyetegereza ngu okuguru kwange kumu kukaba kuli omu mananu okundi kuli munsi, baitu nayehurraga ngu hoona tinsemeriire kubayo.

Hanyuma y’emyaka ebiri, nkatangatangana munyaanya itwe ayankonyire kutekerezaaho omulingo nkaba nintwazaamu obwomeezi bwange baitu uwe atakyetegereze. Nkaba ninyikara omu nju emu na banyaanya itwe bbana abatali omu buswere, kandi tukaraaliza omuroleerezi w’ekicweka hamu na mukazi we arukwetwa Tamara, kwija kwikara naitwe habwa wiki emu. Omuroleerezi obuyabaga n’akora emirimo y’ekitebe, Tamara yamaraga obwire n’abaza naitwe kandi nituseka hamu. Ekintu eki nkakigonza. Akaba ali mwebundaazi muno kandi ayanguhire kuhikirra. Kikampuniiriza muno ngu n’omuntu ow’eby’omwoyo n’asobora kumara naitwe obwire kandi nitusemererwa nauwe.

Tamara akaba atagasire muno. Okugonza okw’akaba ainiire amananu hamu n’obuheereza kukankwataho. Akaba asemeriirwe kuha Yahwe ekirukukirayo oburungi, baitu kandi nyowe nkaba ntasemeriirwe habwokua namuheerezaaga kake. Entekerezaaye enungi hamu n’okusemererwa okw’akaba aine bikankwataho muno. Ekyokurorraho kye kitandetera kutekerezaaho amananu ganu: Yahwe n’agonza itwena tumeheereze “nokusemererwa” hamu “nokuzina.”​—Zab. 100:2.

Nkaba ningonza kutunga okusemererwa nk’okwa Tamara, baitu kusobora kukutunga kikaba nikinyetagisa kukora empindahinduka z’amaani. Nkatandika kukora empindahinduka n’obukiraaba ngu kikatwara obwire. Nkatandika kuteekaniza ntakagenzere omu buheereza, kandi obwire obumu naheerezaaga nka payoniya omusagiki. Kinu kikankonyera kuleka kutiina kandi kyandetera kutunga obumanzi. Nk’oku nayeyongiire kukozesa Baibuli omu buheereza nukwo nayeyongiire kubwegondezaamu. Hanyuma y’akacu kake, nkatandika kuheerza nka payoniya omusagiki buli kwezi.

 Nkatandika kutunga abanywani ab’emyaka erukwahukana abakaba nibagonza amananu kandi baali nibegondeza omu kuheereza Yahwe. Eky’okurorraho kyabo kikandetera kutekerezaaho ebintu ebinsemeriire kwebembeza omu bwomeezi bwange hamu n’okutandika kusoma Baibuli buli kiro. Nkeyongera kwegondeza omu buheereza kandi hanyuma natandika kuheereza nka payoniya ow’akasumi koona. Hanyuma y’emyaka nyingi, gunu gukaba murundi gwange gw’okubanza kutunga okusemererwa n’okuhurra ntekaine omu kitebe.

Hanyuma y’omwaka gumu nkatangaana Alex, akaba muntu w’embabazi, arukubaza amananu kandi nagonza Yahwe hamu n’obuheereza. Akaba ali muheereza omu kitebe kandi akaba amazire emyaka mukaaga naheereza nka payoniya. Alex akaba aheeriizeho omu kiikaro nambere hali obwetaago omu ihanga lya Malawi. Obwakaba ali oku, akatunga omugisa gw’okumara obwire n’abamiisani abaamuteriireho eky’okurorraho ekirungi kandi bamwekambisa kwebembeza Obukama.

Omu 2003, nyowe na Alex tukataaha obuswere, kandi twagumizaamu nituheereza nkabapayoniya ab’akasumi koona. Twegere amasomo maingi kandi Yahwe atuhaire emigisa nyingi.

Omu 2009, tukasindikwa kuheereza nk’abamiisani omu Timor-Leste, ihanga eritaito eriri omu bizinga bya Indonesia. Kinu kikatuhuniiriza, kyatusemeza baitu ha murundi nugwo gumu kyatuletera kutiina. Hanyuma y’emyezi etaano tukahika omu rubuga orukuru orw’ihanga eri orurukwetwa Dili.

Okufuruka kunu kukatwetagisa kukora empindahinduka nyingi omu bwomeezi bwaitu. Tukaba twine kwetwaza nk’abantu ab’omu kiikaro eki, twege orulimi oruhyaka, tuhindule ha byokulya kandi tube n’omu nju etarukusisana eitukaba twine. Obutwabaga tuli omu buheereza twakiraga kurora abantu abanaku muno, abatamanyire kusoma rundi abamanyire kake hamu n’abaabonabonesiibwe. Twaroraga  abantu abaine enkojo ha miri yabo rundi baine obusaasi habw’obulemu n’ebikorwa eby’obwisi. *

Obuheereza bukaba buli burungi muno! Ekyokurorraho, haroho obunatangaine omwisiki ow’akaba abihiirwe ow’emyaka ikumi n’esatu, arukwetwa Maria. * Nyina akaba afiire emyaka nke enyuma, kandi tiyakiraga kurora ise. Nk’abaana abandi ab’emyaka ye, Maria akaba ataine ekigendererwa omu bwomeezi. Ninyijuka ekiro kimu akatandika kurra obwakaba nangambira nk’oku akaba n’ayehurra. Baitu nkaba ntasobora kwetegereza kurungi eby’akaba nabaza habwokuba kasumi ako nkaba ntakeegere kubaza kurungi orulimi rwe. Nkasaba Yahwe ankonyere kumugarramu amaani, kandi nkatandika kumusomera ebyahandiikirwe ebirukuhuumuza. Hanyuma y’emyaka nke, nkarora omulingo amananu gahindwiremu entekereza ya Maria, omulingo akaba nazookamu hamu n’obwomeezi bwe. Akabatizibwa kandi kasumi kanu nauwe n’ayegesa abeegi be aba Baibuli. Kasumi kanu, Maria aine eka ey’eby’omwoyo enkooto kandi nayehurra ngu hati nagozebwa.

Yahwe n’aha omugisa omulimo ogw’okutebeza ogurukukorwa omu Timor-Leste. N’obukiraaba ngu abatebezi abarukukira obwingi babatiziibwe omu emyaka ikumi enyuma, baingi hali bo nibaheereza nka bapayoniya, abaheereza rundi abagurusi. Abandi baheereza ha ofiisi ey’okuhindurramu ebitabu kandi bakonyera omu kuhindura ebitabu hamu na vidiyo ebirukubazaaho Baibuli omu ndimi eza buli kiro. Kyansemezaaga muno kuhurra nibazina omu nsorrokano, kubarora nibaseka, n’okubarora nibakurakurana omu by’omwoyo.

Obwomeezi omu Timor-Leste bukaba nibwahukana ha bw’omu Australia, baitu tukaba twine okusemererwa kwingi. Obwire obumu, batupakiraga omu bbasi ijwire abantu, encu, emigugu hamu n’eby’okulya kuruga omu katale. Kandi obwire obumu, abeegi ba Baibuli twabegesezaaga omu buju obutoito, oburukwokya kandi obwine ebisiika ebiiragwire, n’enkoko nizirabanganamu. N’obukiraaba ngu twahikwahoga emitalibaine nk’enu, naikaraaga nintekereza ngu, ‘kinu kirungi muno!’

Obundukwiijuka ebitwarabiremu, nikindetera kusiima abazaire bange abaakozere kyona ekirukusoboka kunyegesa hali Yahwe kandi bansagika n’obukiraaba ngu nkaba nimpayo kake omu buheereza bwange. Ndozere amananu agali omu Enfumo 22:6 nigahikirra omu bwomeezi bwange. Nyowe na Alex, ise nyowe na nyina nyowe nibatwenyumiiririzaamu; nikibasemeza muno obubarukurora nituheereza Yahwe. Kuruga omu mwaka 2016, twikaire nituheereza omu mulimo gw’okubungira ebitebe omu Australasia.

Nikiguma kukiikiriza ngu omu myaka ey’enyuma, okutebeza nakuroraga nk’omugugu. Hati ngonza muno obuheereza! Nkyetegariize ngu n’obuturaba omu nyikara za mulingo ki omu bwomeezi, okusemererwa kwonyini kuruga omu kuheereza Ruhanga n’omutima gwaitu gwona. Amananu gali ngu emyaka 18 nyowe na Alex eitumazire nituheereza Yahwe, nuho ntungiire okusemererwa okurukukirayo omu bwomeezi bwange. Hati nimanyira kimu amananu gonyini ag’ebigambo Daudi ebiyagambiire Yahwe ati: “Bona abanyakwesiga iwe basemererwa, Batoke butosa obwokukyanganuka, . . . Nabo abagonza ibara lyawe basemererwa omuliiwe.”​—Zab. 5:11.