1. Yusufu akahikwaho kirengo ki, kandi aketwaza ata?

 YUSUFU mutabani wa Yakobo akahikwaho ekirengo eky’amaani. Omukazi akamugambira ati: “Byama nanyowe.” Omukazi onu akaba ali mukazi wa Potifa mukama we. Yusufu akanga okusaba kwe. Omuntu kasumi kanu nasobora kwekaguza, ‘Habwaki Yusufu yayangire okwohebwa kunu?’ Potifa akaba ataroho. Ekindi, Yusufu akaba ali mwiru omu ka egi; kandi omukazi ogu yakumubonaboneseze kakuba yayangire. Baitu Yusufu akaikara nayanga okusaba kw’omukazi ogu. Habwaki? Akagamba ati: “Ninsobora nta okukora ekibi kinu ekingi muno nokusisira Ruhanga?”​—Kub. 39:7-12.

2. Yusufu akamanya ata ngu kusihana na mukazi w’abandi naaba asisiire Ruhanga?

² Yusufu akamanya ata ngu Ruhanga yakurozere kusihana na mukazi w’abandi ‘nk’ekibi ekingi muno’? Ebiragiro bya Musa, ebyali birumu ekiragiro ekirukugamba ngu “otalisihana,” kikaheebwa Abaisaleri hanyuma y’emyaka 200 kurabaho. (Kurug. 20:14) Baitu nabwo, Yusufu akaba amanyire Yahwe kurungi eky’amukonyire kwetegereza ngu Yahwe tiyakusemeriirwe Yusufu obuyakusihaine na mukazi w’abandi. Ekyokurorraho, Yusufu aine kuba akaba akimanyire ngu Yahwe akatekaniza obuswere kuba hagati y’omusaija omu n’omukazi omu. Kandi aine kuba yahuliire nk’oku emirundi ebiri, Yahwe yakonyire Sara nyinenkuru nyakabiri, kwikara ali mwesigwa hali iba. Omu mulingo nugwo gumu, Ruhanga akalinda Rebeka mukazi wa Isaka. (Kub. 2:24; 12:14-20; 20:2-7; 26:6-11) Yusufu obuyatekerizeeho ensonga ezi, kikamukonyera kwetegereza ekihikire n’ekitahikire omu maiso ga Ruhanga. Habwokuba Yusufu yagonzaaga Yahwe Ruhanga we, akaba acweriiremu kimu kukora Yahwe ekyarukugonza akole.

3. Nitugenda kubazaaho ki omu kicweka kinu?

 ³ Ogonza okuhikirra? Busaho kugurukyagurukya okugonza. Baitu itwena tituhikiriire, kakuba tutegendereza nitusobora kuhabisibwa omulingo ensi eroramu okuhikirra. (Is. 5:20; Bar. 12:2) Nahabweki nitugenda kubazaaho okuhikirra nikumanyisa ki, kandi n’omulingo tugasirwa obutuhondera okuhikirra. Hanyuma nitwija kubazaaho ebintu bisatu ebiratukonyera kweyongera kugonza endengo za Yahwe.

4. Ntekereza ki etahikire abantu baingi eibaine ha kuhikirra?

⁴ Abantu baingi obubatekerezaaho omuntu ow’ahikiriire bakira kutekerezaaho omuntu ow’emyehembo, ow’aikara n’aserra ensobi omu bandi, rundi ow’arukutekereza ngu nakira abandi. Baitu Ruhanga tagonza enyetwaza ezi zoona. Yesu obwakaba ali omu nsi, akajumirra muno abebembezi b’amadiini ab’omu kasumi ke abayeteriireho endengo ezaabo ez’okuhikirra. (Mug. 7:16; Luk. 16:15) Omuntu ow’akora Yahwe ebyatugambira ngu bihikire tasobora kutekereza ngu ahikiriire kukira abandi.

5. Kusigikirra ha Baibuli, okuhikirra nikimanyisa ki? Bazaaho ebyokurorraho.

⁵ Kuhikirra mulingo omurungi muno. Kuhikirra nikimanyisa kukora ebihikire omu maiso ga Yahwe Ruhanga. Omu Baibuli, ebigambo ebikozesebwa habw’okuhikirra nibimanyisa kworobera endengo eza haiguru muno, kandi ezi nizo endengo za Yahwe. Ekyokurorraho, Yahwe akaragira abasubuzi kukozesa “ekipimisa ekihikiriire.” (Bir. 25:15) Nahabweki Omukristaayo ow’arukugonza kuba ow’ahikiriire omu maiso ga Ruhanga, naija kuba w’amananu omu miringo yoona akoramu bizineesi. Omuntu ow’ahikiriire agonza n’obwinganiza, ekirukumanyisa ngu tagonza kurora omuntu wena natwazibwa omu mulingo ogutali gw’obwinganiza. Kandi kusobora kusemeza Yahwe omu bwijwire, omuntu ow’ahikiriire kwo atekerezaaho omulingo Yahwe araroramu encwamu ezarakora.​—Bak. 1:10.

6. Habwaki nitusobora kwesiga endengo za Yahwe ezirukukwata ha bintu ebihikire n’ebitahikire? (Isaya 55:8, 9)

⁶ Baibuli n’esoborra ngu Yahwe nuwe Ndugirro y’okuhikirra. Habw’ensonga egi, nayetwa “nambere haikara okuhikirra.” (Yer. 50:7, NWT) Habwokuba Yahwe nuwe Omuhangi nuwe wenka asemeriire kutekaho endengo ez’ebintu ebihikire n’ebitahikire. Habwokuba Yahwe ahikiriire, entekereza ye ha bintu ebihikire n’ebitahikire n’ekirra hara eyaitu, ey’ekira kuhabisibwa obutahikirra bwaitu hamu n’ekibi. (Nfu. 14:12; soma Isaya 55:8, 9.) Baitu habwokuba tukahangwa omu kisisani kya Ruhanga nitusobora kworobera endengo ze ez’okuhikirra omu bwomeezi bwaitu. (Kub. 1:27) Kandi kinu tugonza kukikora. Okugonza okutwiniire Isiitwe kutuleetera kukora kyona ekiturukusobora kumwegeraho. (Bef. 5:1) Kandi tugasirwa obutworobera endengo za Yahwe omu bwomeezi bwaitu.

7. Habwaki nitwetaaga endengo ezirukwesigwa? Bazaaho ekyokurorraho.

⁷ Tugasirwa obutworobera endengo za Yahwe ezirukukwata ha bintu ebihikire n’ebitahikire. Omanyire ensonga habwaki? Tekerezaaho ekyakubaireho kakuba buli tawuni omu ihanga limu etekaho endengo ezaayo habwayo obukirukuhika ha bwokurorraho hamu n’ebiragiro ebya ha ngundo. Eki nikirugamu akavuyo. Kandi kakuba badakitaali na banaasi baali batarukworobera endengo ezitairweho obubarukuba nibajanjaba abantu, kyakurugireemu abarwaire abamu kufa. Nahabweki, endengo ezitairweho ezirukwesigwa zitulinda. Omu mulingo nugwo gumu, endengo za Ruhanga ezirukukwata ha kihikire n’ekitahikire zitulinda.

8. Migisa ki erindiriire abo abagonza kukora ebihikire?

 ⁸ Yahwe aha omugisa abo abalengaho kworobera endengo ze. Naraganiza ati: “Abahikiriire baligwetwa ensi, baragiikaramuga ebiro nebiro.” (Zab. 37:29) Teramu akasisani orole omulingo halibaho obumu, obusinge, hamu n’okusemererwa abantu boona obubaliba niborobera endengo za Yahwe. Yahwe nagonza oyegondeze omu bwomeezi nk’obu. Itwena twine ensonga enungi ezituletera kugonza ebintu Yahwe ebyatugambira ngu bihikire! Nitusobora tuta kweyongera kugonza okuhikirra? Leka tubazeeho ebintu bisatu ebitusobora kukora.

9. Kiki ekiratukonyera kugonza okuhikirra?

⁹ Eky’okubanza: Gonza Yahwe ow’atuteraho endengo. Kusobora kugonza okuhikirra, nitwetaaga kweyongera kugonza Yahwe ow’atuteraho endengo ezirukukwata ha bihikire n’ebitahikire. Obutweyongera kugonza Yahwe, kituleetera kweyongera kugonza kworobera endengo ze ez’okuhikirra omu bwomeezi bwaitu. Tekerezaaho ekyokurorraho kinu: Kakuba Adamu na Hawa baali nibagonza Yahwe, bakumworobiire.​—Kub. 3:1-6, 16-19.

10. Kiki Iburahimu ekiyakozere kweyongera kwetegereza Yahwe kurungi?

¹⁰ Busaho kugurukyagurukya titwakugondeze kukora ensobi nk’eya Adamu na Hawa eibakozere. Nitusobora kwerinda ensobi egi kakuba twega ebirukukwata hali Yahwe, tugonza emiringo ye, kandi n’okulengaho kwetegereza entekereza ye. Kakuba tukora kinu, nitwija kweyongera kugonza Yahwe. Tekerezaaho Iburahimu. Akaba nagonza Yahwe kuruga ha mutima. N’obukyamugumiraga kwetegereza encwamu za Yahwe, tiyamujemeraga. Oihireho yalengahoga kweyongera kumanya Yahwe kurungi. Ekyokurorraho, obuyamanyire encwamu ya Yahwe ey’okuhwerekereza Sodomu na Gomora, Iburahimu ha kubanza akeralikirra ngu “Omucwi wemisango yensi zona” akaba nagenda kuhwerekereza ababi otwaliiremu n’abahikiriire. Hali Iburahimu, kinu kikazooka nk’ekitahikire, nahabweki n’obwebundaazi akakaguza Yahwe ebikaguzo. N’okugumiisiriza Yahwe akamugarukamu. Ha kumalirra, Iburahimu akakyetegereza ngu Yahwe akebera emitima y’abantu boona, kandi ngu tasobora kufubira abantu abataine musango obwaba n’afubira ababi.​—Kub. 18:20-32.

11. Iburahimu akooleka ata ngu nagonza Yahwe kandi namwesiga?

¹¹ Ebintu Iburahimu y’abalizeeho na Yahwe ebirukukwata ha mbuga za Sodomu na Gomora, bikamukwataho muno. Busaho kugurukyagurukya, akeyongera kugonza kandi n’okuteekamu Ise ow’omu iguru ekitiinisa kukira na kara. Hanyuma y’emyaka, Iburahimu akesanga omu nyikara eyalengere muno obwesigwa bwe hali Yahwe. Yahwe akamusaba kuhonga Isaka omwana we omu wenka omugonzebwa. Baitu Iburahimu hati akaba amanyire Ruhanga kurungi, nahabweki ha murundi gunu atamukaguze kikaguzo kyona. Iburahimu akagenderaho kukora eki Yahwe ekyakaba amusabire. Baitu, tekerezaaho obusaasi obuyatungire omu mutima obwakaba nayetekaniriiza kukora ekintu kinu! Iburahimu aine kuba y’atekerizeeho muno, ebyakaba ayegere hali Yahwe. Akaba akimanyire ngu Yahwe tasobora kukora ekintu eky’okutahikirra rundi ekitali ky’okugonza. Kusigikirra ha mukwenda Paulo. Iburahimu akaba akimanyire ngu Yahwe akaba nasobora kuhumbuura Isaka omwana we omugonzebwa. (Baheb. 11:17-19) Akaba akimanyire ngu Yahwe akaba amuraganiize ngu Isaka naija kurugwamu ihanga, kandi omu kasumi ako, Isaka akaba ataine mwana wena. Iburahimu akaba nagonza  Yahwe, nahabweki akesiga Ise ow’omu iguru ngu naija kukora ekihikire. N’obukiraaba kyali kitanguhire, okwikiriza kwe kukamuletera kumworobera.​—Kub. 22:1-12.

12. Nitusobora tuta kwegera ha kyokurorraho kya Iburahimu? (Zabuli 73:28)

¹² Nitusobora tuta kwegera ha kyokurorraho kya Iburahimu? Nka Iburahimu, naitwe nitwetaaga kwikara nitwega ebirukukwata hali Yahwe. Obuturakikora, nitwija kweyongera kwirra haihi na uwe kandi n’okumugonza. (Soma Zabuli 73:28.) Omuntu waitu ow’omunda naija kutendekwa ahaburwe entekereza eya Ruhanga. (Baheb. 5:14) Ekirarugamu, omuntu obw’aratwohya kukora ekintu ekibi nitwija kwanga. Titurukwija n’okutekerezaaho ekintu kyona ekisobora kusaaliza Isiitwe rundi kusiisa enkoragana yaitu na uwe. Kiki ekindi ekitusobora kukora kwoleka ngu nitugonza okuhikirra?

13. Nitusobora tuta kuhondera okuhikirra? (Enfumo 15:9)

¹³ Ekyakabiri: Lengaho kukurakuraniza kugonza okuhikirra buli kiro. Nitusobora kukurakuraniza kugonza endengo za Yahwe ez’okuhikirra kuraba omu kuteekamu amaani buli kiro, nk’oku tuteekamu amaani buli kiro kukora ebisasaizi obutuba nitugonza kwongera omubiri gwaitu amaani. Kinu tikigumire kukikora buli kiro. Yahwe nayetegereza, tasobora kutusaba kukora ekintu ekitutarukusobora. (Zab. 103:14) Natugumya ngu ‘agonza ogu anyakuhondera okuhikirra.’ (Soma Enfumo 15:9.) Obutuba nitulengaho kuhika ha kigendererwa omu buheereza bwaitu hali Yahwe, twikara nituteekamu amaani kusobora kukihikaho. Nikyo kimu tusemeriire kukora obutuba nituhondera okuhikirra. N’okugumiisiriza, Yahwe naija kutukonyera kukurakurana kandi n’okusemezaamu mpora mpora.​—Zab. 84:5, 7.

14. “Ekyaha kifuba ekyokuhikirra” nikimanyisa ki, kandi habwaki nitukyetaaga?

¹⁴ Omu mulingo ogw’okugonza Yahwe atwijukya ngu okuhikirra tiguli mugugu. (1 Yoh. 5:3) Oihireho, okuhikirra bulinzi obuturukwetaaga buli kiro. Ijuka ekijwaro eky’okurwanisa eky’omwoyo omukwenda Paulo ekiyabalizeeho. (Bef. 6:14-18) Kicweka ki ekyalindaga  omutima gw’omusirikale? Nikyo “ekyaha kifuba.” Nk’oku ekyaha kifuba kirinda omutima, nukwo “ekyaha kifuba ekyokuhikirra,” ekirukukiikirra endengo za Yahwe ez’okuhikirra, kisobora kulinda omutima gwawe ogw’akokurorraho, kandi kinu nikitwarramu enyehurra hamu n’ebitekerezo byawe. Egi niyo nsonga habwaki kiri kikuru, eky’okujwara kyawe eky’okurwanisa kitwarremu ekyaha kifuba eky’okuhikirra!​—Nfu. 4:23.

15. Nosobora ota kujwara ekyaha kifuba eky’okuhikirra?

¹⁵ Nosobora ota kujwara ekyaha kifuba eky’okuhikirra? Kinu nosobora kukikora buli kiro, kuraba omu kutekerezaaho Ruhanga ekyarukugonza okole obwoba n’okora encwamu. Obwoba n’ocwamu ebyorukugenda kubazaaho, ebizina eby’orahuliiriza, hamu n’ebitabu eby’orasoma, banza oyekaguze: ‘Biki ebindaaba nintaahya omu mutima gwawe? Ebintu binu nibiikiranganiza n’ebya Yahwe agonza? Rundi nibikurakuraniza obusihani, kurwana, omururu, hamu n’okwegonza itwenka, ebintu Yahwe eby’arora nk’ebitali by’okuhikirra?’ (Baf. 4:8) Encwamu ez’okora obuziraaba niziikiranganiza na Yahwe eby’agonza, noija kuba n’oikiriza endengo ze ez’okuhikirra kulinda omutima gwawe.

16-17. Isaya 48:18, n’etugumya eta ngu nitusobora kugumizaamu nitworobera endengo za Yahwe omu bwomeezi bwaitu ebiro n’ebiro?

¹⁶ Haroho obwoyeralikirra ngu torukwija kusobora kworobera endengo za Yahwe ez’okuhikirra obwomeezi bwawe bwona? Tekerezaaho ekyokurorraho Yahwe eky’akozesa ekirukusangwa omu Isaya 48:18. (Soma.) Yahwe naraganiza ngu okuhikirra kwaitu nikusobora kuba “nkebigonzi byenyanja.” Teramu akasisani oyemeriire ha musa gw’enyanja oroleriire ebigonzi nibiteera bitarukuleka. Omu kiikaro eki ekitekaine nosobora kweralikirra ngu akasumi kalihika ebigonzi ebi bireke kuteera? Nangwa! Okimanyire ngu ebigonzi ebi biikaire nibiteera kumara enkumi n’enkumi z’emyaka kandi ngu nibiija kugumizaamu nibiteera.

¹⁷ Okuhikirra kwawe nikusobora kusisana nk’ebigonzi by’enyanja! Omu mulingo ki? Obworaaba oine encwamu ey’okukora, banza otekerezeeho Yahwe ekiyakugondeze okole. Hanyuma okikole. Encwamu n’obweraaba egumire kwingana nkaha, So ow’omu iguru naija kukuha amaani, akukonyere kwikara nokora ebihikire buli kiro.​—Is. 40:29-31.

18. Habwaki tusemeriire kwerinda kucwera abandi omusango nitusigikirra ha ndengo ezitweteriireho?

¹⁸ Ekyakasatu: Leka Yahwe nuwe acwe emisango. Obuturaaba nitulengaho n’amaani kworobera endengo za Yahwe ez’okuhikirra omu bwomeezi bwaitu, tusemeriire kwetantara kucwera abandi omusango kandi n’okutekereza ngu tuhikiriire kukira abandi. Omu kiikaro ky’okurabyamu abandi maiso tukasisana oti rundi twine obusobozi obw’okubacwera omusango nitusigikirra ha ndengo ezitweteriireho, tusemeriire kwikara nitukiijuka ngu Yahwe nuwe “Omucwi wemisango yensi zona.” (Kub. 18:25) Yahwe tatuhaire bujunanizibwa obwokucwera abandi omusango. Amananu gali, Yesu akaturagira ati: “Mutalicwererra omusango, mutacwerwa inywe.”​—Mat. 7:1. *

19. Yusufu akooleka ata ngu nayesiga omulingo Yahwe acwamu emisango?

¹⁹ Tekerezaaho ekyokurorraho kya Yusufu omusaija ow’akaba ahikiriire. Aketantara kucwera abandi omusango, otwaliiremu naabo abakaba bamukozere kubi. Bagenzi be bakamutwaza kubi, bamutunda omu bwiru, kandi  baaletera ise kwikiriza ngu Yusufu akaba afiire. Hanyuma y’emyaka, Yusufu akongera yatangatangana n’abanyabuzaale be. Yusufu omu kasumi ako, ow’akaba ali mulemi ow’amaani akaba nasobora kucwera bagenzi be omusango omu mulingo ogw’obukaali kandi n’okuhoora enzigu. Bagenzi ba Yusufu bakatiina ngu eki kyonyini nikyo akaba nagenda kubakora, n’obukiraaba ngu bakaba begarukiremu kuruga ha mutima habw’ebintu ebibakaba bakozere. Baitu Yusufu akabagumya ati: “Mutatina: baitu nyowe ndi mukikaro kya Ruhanga?” (Kub. 37:18-20, 27, 28, 31-35; 50:15-21) N’obwebundaazi Yusufu akaleka Yahwe nuwe acwe omusango.

20-21. Nitusobora tutua kwetantara kutekereza ngu tuhikiriire kukira abandi?

²⁰ Nka Yusufu, naitwe tuleka Yahwe nuwe acwe emisango. Ekyokurorraho, titutekereeza ngu tumanyire ekireetera ab’oruganda na banyaanya itwe kukora ebibakora. Titusobora kurora ekiri ha mitima y’abantu abandi; oihireho, “Yahwe nuwe ayekebiija ebigendererwa.” (Nfu. 16:2, NWT) Agonza abantu boona kuruga omu mahanga n’enganda ezirukwahukana. Kandi Yahwe n’atwekambisa kugalihiza kimu emitima yaitu. (2 Kol. 6:13) Tusemeriire kugonza Abakristaayo bagenzi baitu boona, hatali kubacwera omusango.

²¹ Ekindi titusemeriire n’okucwera omusango abantu abali aheeru y’ekitebe. (1 Tim. 2:3, 4) Nosobora kucwera omusango omunyabuzaale wawe ow’atali omu mananu n’ogamba ngu, “Omusaija ogu talisobora kwija omumananu”? Nangwa, oku nikuba kwetumiisiriza n’okwefoora omuhikiriire kukira abandi. Yahwe akyahaire “abantu bona abali honahona” omugisa ogw’okwegarukamu. (Eng. 17:30) Ikara n’okiijuka ngu Yahwe arora abantu abarukutekereza ngu bahikiriire kukira abandi, nk’abantu abatahikiriire.

22. Habwaki ocwerireemu kimu kugonza okuhikirra?

²² Leka okugonza okutwiniire endengo za Yahwe ez’okuhikirra kutuleetere kusemererwa kandi kuleetere abandi kutwirra haihi, hamu na Ruhanga waitu. Tutalireka ‘kurumwa enjara n’okukwatwa iroho obw’okuhikirra.’ (Mat. 5:6) Kigumize kimu ngu Yahwe n’arora amaani ag’orukuteekamu kandi asemererwa kurora ngu n’olengaho n’amaani kukora ekihikire. Nk’oku abantu omu nsi barukweyongera kukora ebikorwa eby’okutahikirra, huumura! Oikale nokiijuka ngu ‘Yahwe agonza abahikiriire.’​—Zab. 146:8.