Baitu, abantu baingi bagurukyagurukya obubaraaba nibasobora kutunga obwomeezi obwa mulingo ogu. Bahikirweho ebizibu ebibabaire batarukunihira. Ekyokurorraho, oburwaire bwa Korona obubwacwekereho, bukaleetaho ebizibu omu byentahya, baingi bakarwara, kandi abandi baafa. Kandi eki kibaletiire kweralikirra ekiraabaho omu kasumi ak’omumaiso.

Habwokuba abantu tibamanyire ekiraabaho omu bwomeezi, balengaho kuserra nambere baratunga obuhabuzi oburabakonyera kuba n’obwomeezi oburungi omu kasumi ak’omumaiso. Abamu batekereza ngu haroho amaani agatarukurorwa agasobora kubakonyera kumanya ekiraabaho omu bwomeezi bwabo. Baingi baserra obwegese rundi sente nyingi, nibatekereza ngu nibiija kubakonyera kutunga ebibarukugonza. Abandi batekereza ngu kuba bantu barungi nikimara kusobora kuba n’obwomeezi oburungi.

Ebintu binu nibisobora kukonyera omuntu kuba n’obusumi obw’omumaiso oburungi? Kusobora kutunga eky’okugarukamu tusemeriire kubanza kutekerezaaho ebikaguzo binu:

• Obusumi bwawe obw’omumaiso busigikirra hali ki?

• Obwegese rundi sente nyingi nibisobora kukukonyera kuba n’obwomeezi oburungi?

• Kuba muntu murungi nikisobora kukukonyera kuba n’obwomeezi oburungi?

• Ninkaha nambere osobora kutunga obuhabuzi oburakukonyera kuba n’obusumi obw’omumaiso oburungi?

Magaziini enu niija kukukonyera kutunga eby’okugarukamu.