LUZIA ARUBATA NAKOKOIZIRA HABW’OKUGURU KWE OKW’EMOSO. Obwakaba akyali muto, akarwara oburwaire obwa poliyo, oburwaire bunu bujanjaara muno kandi bukwata obusimu bw’omubiri, obwongo, hamu n’orukizi. Luzia obwakaba aine emyaka 16, omukazi ouyakorraga akamugambira ati, “Ruhanga akakufubira n’obulema habwokuba okaba otakuhurra kandi n’otalibaniza nyoko.” N’obuharaaba harabireho emyaka nyingi, Luzia nakyaijuka omulingo ebigambo ebi by’amusaliize.

OMUKAZI ARUKWETWA DAMARIS OBUYAKIMANYIRE NGU AINE EKOOKORO EY’OBWONGO, ise akamukaguza: “Kibi ki, eky’okozere ekikuletiire ekizibu kinu? Oine kuba okozere ekibi eky’amaani. Enu niyo ensonga habwaki Ruhanga nakufubira.” Ebigambo bya ise binu bikamumaramu muno amaani.

Abantu bamazire enkumi n’enkumi z’emyaka nibaikiriza ngu oburwaire kifubiro kuruga hali Ruhanga. Ekitabu ekirukwetwa Manners and Customs of Bible Lands nikisoborra ngu, baingi omu kasumi ka Yesu baikirizaaga ngu “oburwaire bwaletwaga ekibi omuntu ekiyabaga akozere, rundi habw’ekibi eky’abanyabuzaale be kandi ngu oburwaire kyabaga kifubiro habw’ekibi eki.” Kandi kusigikirra ha kitabu Medieval Medicine and the Plague abantu abamu abaali baroho emyaka 800 enyuma, “baali nibaikiriza ngu Ruhanga yaletaaga oburwaire kufubira abantu habw’ebibi byabo.” Obukaikuru n’obukaikuru bw’abantu abaisirwe oburwaire omu Bulaaya omu kyasa kya 14, tugambe ngu Ruhanga akaba n’afubira abasiisi? Rundi oburwaire bunu bukaletwa obuhuka obuleeta oburwaire nk’oku abarukuseruliiriza bazonzoire? Abamu bekaguza, mali Ruhanga akozesa oburwaire kufubira abantu habw’ebibi byabo? *

TEKEREZAAHO KINU: Oburwaire n’okubonabona obu biraaba bifubiro kuruga hali Ruhanga, habwaki Yesu, yakirize abarwaire? Eki, tikyakubaire nikihakaniza obulyo hamu n’obuhikiriire bwa Ruhanga? (Matayo 4:23, 24) Yesu akaba atasobora kuhakaniza encwamu za Ruhanga. Habwokuba akagamba ngu: “Nkora obutosa ebyagonza,” kandi “Isenyowe okuyandagiire, nukwo nkora nti.”​—Yohana 8:29; 14:31.

Baibuli n’ekyoleka kurungi ngu, Yahwe Ruhanga “wobulyo.” (Ekyebiragiro 32:4) Nk’ekyokurorraho, Ruhanga tasobora kuletera enyonyi kugwa, ekahwerekereza abantu abataine musango, ngu habwokuba abaire nagonza kufubira omusiisi omu owali omu nyonyi egi! Iburahimu omuheereza wa Ruhanga omwesigwa, akasigikirra ha kuhikirra kwa Ruhanga yagamba ati, Ruhanga tasobora ‘kuhwerekereza ababi akatwarramu abahikiriire.’ Akongera yagamba ngu “mahano okukora oti.” (Okubanza 18:23, 25) Baibuli eyongera egamba eti: “Ruhanga talikora kubi” kandi ‘takora eby’okutahikirra.’​—Yobu 34:10-12.

Kubonabona okuturabamu tikiri kifubiro kuruga hali Ruhanga habw’ekibi ekituba tukozere. Yesu akasoborra kurungi abegeswa be ensonga enu, obu baboine omusaija ayazairwe ali mufu wa maiso. ‘Abegeswabe bakamukaguza nibagamba ngu, Rabi, noha yasiisire, onu rundi abamuzaire, ekyamuletiire kuzaarwa ali mufu w’amaiso?’ Yesu akabagarukamu ati: “Onu atasiise nobubakuba bali abamuzaire: rundi emirimo ya Ruhanga eyolekebwe haluwe.”​—Yohana 9:1-3.

Kusigikirra ha ntekereza ezitahikire ezaali ziroho omu kasumi ako, abegeswa ba Yesu baine kuba bahuniriire muno obuyabagambiire ngu omusaija ogu atasiise kandi ngu bazaire be tibali nubo barugiriireho ekizibu eki. Yesu atagarukire ha kukiza omufu w’amaiso kwonka, baitu akakyolekera kimu ngu entekereza ey’erukugamba ngu okubonabona kuruga hali Ruhanga  tehikire. (Yohana 9:6, 7) Abo boona abarukubonabona habw’endwaire z’amaani kasumi kanu, nibasobora kutunga okuhumuzibwa habw’okumanya ngu Ruhanga tali nuwe ndugirro y’obusaasi bwabo.

Ebyahandiikirwe nibitugumya ngu

• “Ruhanga tasobora okwohebwa nobubi, kandi uwe wenka tayohya omuntu wena.” (YAKOBO 1:13) Ebintu byona ‘ebibi’ nk’oburwaire, obusaasi, hamu n’okufa ebiikaire nibibonabonesa abantu kumara emyaka nyingi, nibiija kwihwaho omu kasumi akatali kahara.

• Yesu Kristo ‘akakiza boona abakaba barwaire.’ (MATAYO 8:16) Omwana wa Ruhanga obuyakirize boona abaizire nambere ali, akooleka Obukama bwa Ruhanga eki bulikora ha rulengo orw’ensi yoona.

• Ruhanga “alisusura amaizi gona ha maiso gabu; kandi tihakiroho okufa; nobukwakuba okutera empamo, nobukwakuba oku’ra, nobukwakuba okusasa tibikiroho: ebyokubanza bihoireho.”​—OKUSUKU’RWA 21:3-5.

Habwaki, abantu babonabona kandi basaasa muno? Abantu baikaire nibekaguza ekikaguzo eki kumara emyaka nyingi muno. Obuturaaba tutasemeriire kujunaana Ruhanga, noha ou tusemeriire kujunaana? Ebikaguzo ebi nibiija kugarukwamu omu kicweka ekirukuhonderaho.