Ibara Lya Ruhanga Niryo Liha? Ruhanga uwe wenka nagamba ati: “Ninyowe Yahwe; Niryo ibara lyange.” (Isaya 42:8) Ibara lya Ruhanga nirisangwa omu Baibuli emirundi nka 7,000. Baitu, empindura ezindi eza Baibuli ziihamu ibara lya Ruhanga nizitamu ekitinisa nka “MUKAMA.” Ruhanga n’agonza obe munywani we, kandi egi niyo ensonga habwaki nakwekambisa ‘kukunga ibara lye’​—Zabuli 105:1.

Ebitinisa bya Yahwe. Baibuli ebazaaho Yahwe n’ekozesa ebitiinisa nka “Ruhanga,” “Ow’obusobozi bwona,” “Omuhangi,” “Isitwe,” “Mukama,” hamu n’Omulemi. Haroho esaara nyingi ezihandiikirwe omu Baibuli ezirukubazaaho Yahwe nizikozesa ebitiinisa hamu n’ibara lye, Yahwe.​—Danieri 9:4.

 Omulingo Ruhanga Arukusisanamu. Ruhanga mwoyo ogutarukurorwa. (Yohana 4:24) Baibuli n’ekigumiza kimu ngu “busaho muntu araboine Ruhanga.” (Yohana 1:18) Baibuli eyoleka enyehurra ye. Abantu nibasobora kumubihiza, rundi ‘kumuletera okusemererwa.’​—Enfumo 11:20; Zabuli 78:40, 41.

Emiringo ya Ruhanga ey’Erukuhuniriza. Ruhanga tasoroora abantu nasigikirra ha mahanga rundi ha buhangwa bwabo. (Engeso Ezabakwenda 10:34, 35) Kandi aine ‘embabazi hamu n’okuganyira, tarahuka kubihirwa kandi aijwire okugonza n’amananu.’ (Okuruga 34:6, 7) Baitu haroho emiringo ya Ruhanga ena enkuru muno.

Amaani. Nk’oku Ruhanga nuwe “Wobusobozi bwona,” aine amaani agataine bugarukiro agarukumusobozesa kuhikiriza byona ebiyaraganiize.​—Okubanza 17:1.

Amagezi. Amagezi aga Ruhanga nugo garukukirrayo kimu. Kandi niyo ensonga habwaki Baibuli egamba ngu nuwe “owamagezi omu wenka.”​—Abarumi 16:27.

Obwinganiza. Ruhanga akora ebihikire. Emirimo ye ‘ehikiriire,’ kandi “agonza obwinganiza.”​—Ekyebiragiro 32:4, NW

Okugonza. Baibuli egamba ngu “Ruhanga nukwo kugonza.” (1 Yohana 4:8) Ruhanga tatwoleka okugonza kwonka​—baitu nuwe arukukirayo kuba n’okugonza. Okugonza kwe okwingi, kuba omu buli kimu kyona eky’akora kandi kutugasira omu miringo nyingi.

Obunywani Obuli Hagati ya Ruhanga n’Abantu. Ruhanga Isiitwe ow’omu iguru atwoleka okugonza. (Matayo 6:9) Kakuba tumwikiriza, nitusobora kufooka banywani be. (Zabuli 25:14) Kandi uwe wenka naturaaliza kumwirra haihi kuraba omu kusaba obu ‘nitumunagira okutuntura kwaitu kwona habwokuba natufaaho.’​—1 Petero 5:7; Yakobo 4:8.

Yesu Tali Ruhanga. Yesu w’embaganiza​—habwokuba Ruhanga nuwe yabandize kuhanga. Egi niyo ensonga habwaki Baibuli emubazaaho nk’Omwana wa Ruhanga. (Yohana 1:14) Hanyuma y’okuhanga Yesu, Yahwe akamukozesa ‘nkomukozi omukuru’ kuhanga ebintu ebindi byona.​—Enfumo 8:30, 31; Abakolosai 1:15, 16.

 Yesu Kristo Takagambaga ngu Nuwe Ruhanga. Baitu akagamba ngu: “Nkaruga namberali [Ruhanga], kandi nuwe yantumire.” (Yohana 7:29) Yesu obu akaba nabaza n’omu ha bahondezi be, akeeta Yahwe “Isenyowe kandi Isiinywe,” akongera yagamba ati: “Ruhanga wange kandi Ruhanga wanyu.” (Yohana 20:17) Yesu obuyamazire kufa, Yahwe akamuhumbuura yamutwara omu iguru kandi yamwikaliza ha mukono gwe ogw’obulyo yamuha obusobozi bwingi.​—Matayo 28:18; Engeso Ezabakwenda 2:32, 33.

Yesu Kristo Nasobora Kukukonyera Kwirra Haihi na Ruhanga

Yesu akaija omu nsi kutwegesa ebirukukwata hali Ise. Yahwe akabazaaho Yesu nagamba ati: “Onu nuwe Mwana wange oungonza: mumuhurre.” (Marako 9:7) Yesu amanyire kurungi Ruhanga kukira omuntu ondi weena. Akagamba ati: “Busaho amanyire Ise kwihaho Omwana, hamu n’ogu wena Omwana ow’agonza kumusukurra.”​—Luka 10:22, NW.

Yesu ayolekera kimu emiringo ya Ruhanga kikumu ha kikumi. Yesu akakwatira kimu emiringo ya Ise. Kandi nikyo yagambiire ngu: “Anyakundozire nyowe, buli arozire Isenyowe.” (Yohana 14:9) Yesu akairiza abantu haihi na Ruhanga obu nayoleka okugonza nk’okwa Ise kurabira omu bintu ebiyabazaaga n’ebiyakoraga. Akagamba ati: ‘Ninyowe muhanda n’amananu n’obwomezi: busaho aija hali Isenyowe rundi buli arabire omuli nyowe.’ (Yohana 14:6) Akongera yagamba ati: “Akasumi nikaija kandi kahikire abarukuramya [omu mazima] akabararamizamuga Isitwe omu mwoyo namananu: baitu Isitwe naserra abali nkabo okuba abarukumuramya.” (Yohana 4:23) Kiteekerezeeho! Yahwe naserra abantu nkaiwe abarukugonza kumanya amananu agarukumukwataho.