Kujwara n’Okwekoraho Byantabaijuraga

BIKAGAMBWA EILEEN BRUMBAUGH

NKAZAALIRWA omu diini erukwetwa Old Order German Baptist Brethren, ey’erukusisana n’ediini ya Amish na Mennonite. Ediini eya Brethren ekatandiikira omu Bugirimaani omu 1708 n’ekigendererwa eky’okwiha abantu omu mwirima gw’eby’omwoyo kandi kinu kyayetwaga Pietism. Ekitabu The Encyclopedia of Religion kikagamba ngu ekitebe kinu “kikarora ngu abantu nibetaaga kumanya Enjiri ya Kristo.” Entekereza egi ekaletera ekitebe kinu kutandikaho kampeini ez’okusindiika abamiisani omu mahanga agarukwahukana kandi nyingi hali zo zikarugamu obusinguzi.

Omu 1719, guruupu entaito ey’ekaba n’eyebemberwa omusaija arukwetwa Alexander Mack ekaija omu kiikaro hati ekirukumanywa nka Pennsylvania, omu United States. Kuruga obu, hakatandikwaho guruupu ezindi nyingi kandi nazo zayecwamucwamu. Enyikiriza za buli guruupu nizisigikirra ha nyegesa za Alexander Mack. Guruupu yaitu entaito ekaba erumu abantu nka 50. Batwekambisaaga kusoma Baibuli n’okusagika encwamu ezabaga zikozerwe abarukutwebembera.

Kurugira kimu hali isenkuru nyowe ow’enyakasutu, itwena omuka tukaba tuli omu diini enu kandi nituhondera enyegesa zaayo. Nkaikiriza kufooka kicweka ky’ediini enu kandi nabatizibwa nyine emyaka 13. Kurugira kimu omu buto, nkegesebwa ngu kibi kutunga rundi kukozesa ekiiruka kyona, nka turakita, kukozesa esimu, rediyo rundi ekintu kyona ekikozerwe abantu ekikozesa amasanyarazi. Abakazi bajwaraga engeyo ezanguhire, titwasaraga isoke kandi twaikaraga tuswekeriire emitwe yaitu. Abasaija bakuzaaga omuleju. Twaikirizaaga ngu kutaba kicweka ky’ensi nikitwarramu kutajwara engoye ez’akasumi kanu, kutekoraho, rundi kujwara enkwanzi n’ebikomo habwokuba eki twakiroraga nk’okwoleka emyehembo.

Tukegesebwa kutekamu Baibuli ekitiinisa, kandi twagitwaraga nk’ebyokulya eby’omwoyo. Buli nyenkyakara tutakaliire ekya nyenkya, twayesorozaaga hamu nituhuliiriza isiitwe n’atusomera esuura kuruga omu Baibuli kandi buli muntu yabazaaga ekyayegere kuruga omu bisomerwe. Hanyuma itwena twatezaaga amaju isiitwe n’asaba. Kandi hanyuma, nyina itwe yagarukamuga esaara ya Isiitwe ali omu mwiguru. N’ekihika nalindirraga okuramiza hamu nk’eka buli nyenkyakara, kyatuleteraga kuteka omutima ha by’omwoyo.

Twaikaraga ha faamu yaitu haihi na Delphi, Indiana, nambere twalimaga ebintu ebirukwahukana. Twabitwaraga omu tawuni nitukozesa embaraasi enyakwine ekigaali enyuma kandi nitubitundira ha rubaju rw’omuhanda rundi nju ha nju. Twayehurraga ngu kukora emirimo y’amaani kikaba kiri kicweka by’obuheereza bwaitu hali Ruhanga. Nahabweki twakoraga muno oihireho Sande honka nubwo tutaakoraga emirimo ey’amaani. Obwire obumu, omu ka twayemarraga ha kukora emirimo ya ha faamu, nikitugumira n’okuhondera entekaniza yaitu ey’eby’omwoyo.

Obuswere n’Eka

Omu 1963, obunkaba nyine emyaka 17, nkaswerwa James, nauwe ow’akaba ali omu diini ya Old Brethren. Ab’omu ka yabo nabo bakaba bali omu diini enu kurugira kimu ha isenkuru na nyinenkuru ab’enyakabiri. Itwena tukaba twine ekihika eky’amaani eky’okuheereza Ruhanga kandi twaikirizaaga ngu ediini yaitu niyo yonka ehikire.

Omu 1975, tukaba twine abaana mukaaga, kandi omu 1983 omwana waitu owa musanju kandi macura akazaarwa. Rebecca, ow’akaba ali mwana wakabiri, nuwe akaba ali mwisiki wenka. Twakoraga muno, nitukozesa sente ntaito kandi titwaguraga ebintu eby’amaani. Tukalengaho kwegesa abaana baitu emisingi ya Baibuli eitukaba twegere kuruga ha bazaire baitu, hamu n’abantu abandi ab’omu diini yaitu.

Omu diini ya Old Brethren enjwara kyabaga kikuru muno. Twayehurraga ngu habwokuba busaho muntu asobora kurora ebiri omu mutima, omulingo omuntu ajwaramu gwoleka kiki ekyali omunda. Nahabweki, omuntu obuyakoraga muno isoke lye, twakitwaraga ngu aine emyehembo. N’obuyajwaraga engoye ezirumu erangi endi, kandi zitaraihire nako kaabaga kokurorraho akemyehembo. Obwire obumu, eki kyatuleteraga kuteka omutima ha njwara, omu kiikaro ky’okuguteeka ha Byahandiikirwe.

Ebirukukwata ha Kutwarwa omu Nkomo

Hakumalirra kw’emyaka ya 1960, muramu wange arukwetwa Jesse, nauwe ow’akaba ali mu diini yaitu akatwarwa omu nkomo habw’okwanga kutaaha amahe. Oku nuho yatangatanganiire Abakaiso ba Yahwe, nabo abehurra ngu kwejumbira omu bulemi nikicwa emisingi ya Baibuli. (Isaya 2:4; Matayo 26:52) Jesse yagonzaaga kubazaaho Baibuli n’Abakaiso ba Yahwe kandi yaroraga omulingo omurungi ogubarukwetwazaamu. Hanyuma y’okwega Baibuli ha bw’akasumi akabatizibwa nk’omu h’Abakaiso ba Yahwe kandi eki kikatuhuniiriza muno.

Jesse akagambiraho iba nyowe eby’akaba ayegere. Ekindi, akakora ekirukusoboka kurora ngu James yaikara natunga akatabu k’Omunaara gw’Omulinzi na Awake! Kusoma obutabu bunu kikaletera James kweyongera kugonza kumanya ebiri omu Baibuli. Nk’oku James akaba n’agonza kuheereza Ruhanga baitu nahurra amuli hara, yatekaga omutima ha kintu kyona ekiyaroraga ngu nikisobora kumukonyera kwirra haihi na Ruhanga.

Abebembezi baitu batwekambisaaga kusoma ebitabu by’ediini ya Amish, Mennonites, hamu n’ebyaba Old Brethren abenyikiriza ezirukwahukana n’ezaitu, n’obukiraaba ngu ediini zinu twaziroraga nk’eziri kicweka ky’ensi. Baitu ise nyowe tiyagonzaaga Abakaiso ba Yahwe. Akaba atarukugonza tusome ebitabu byabo. Nahabweki natukumiraga obunaroraga James nabisoma. Natiinaga ngu n’asobora kwegamu enyegesa ezitahikire.

Kurugira kimu kara James yayehurraga ngu zimu ha nyikiriza z’ediini yaitu tizirukusigikirra ha Baibuli, kukira muno enyegesa erukugamba ngu kibi kukora emirimo y’amaani ha kiro kya Sande. Ekyokurorraho, batwegesaaga ngu ha kiro kya Sande, nikiikirizibwa kuha ebisoro byawe amaizi baitu tikirukwikirizibwa kumeenya ekinyansi. Abebembezi banu baali batasobora kumuha ekyahandiikirwe ekirukubazaaho ekiragiro kinu. Mporampora, nanyowe nkatandika kugurukyagurukya enyegesa nka zinu.

Habwokuba tukaba tumazire emyaka nyingi nitwikiriza ngu ediini yaitu niyo ehikire omu maiso ga Ruhanga, kandi tumanyire ekisobora kutuhikaho kakuba tugirugamu, kikatugumira kugyecwaho. Baitu omuntu waitu ow’omunda akaba atasobora kutwikiriza kwikara omu diini eitwali tumanyire ngu terukuhondera Baibuli omu bwijwire. Nahabweki omu 1983 tukahandiika ebbaruha nitusoborra ensonga habwaki nituruga omu diini enu kandi twasaba esomwe omu maiso g’ekitebe. Hanyuma tukabingwa omu diini enu.

Kuserra Ediini y’Amananu

Kuruga obu, tukatandika kuserra ediini ey’amananu. Tukaba nituserra ediini erukwegesa amananu kandi enyakurumu abantu abarukukora ebintu ebibarukwegesa abandi. Eky’okubanza tukasazaamu ediini yoona erukwejumbira omu bulemu. Tukaba nitukyayehurra ngu kuba n’obwomeezi obworobere hamu n’okujwara engoye eziraihire kandi eziine erangi emu etarukwangasana bwokurorraho bw’ediini etali kicweka ky’ensi. Kuruga 1983 kuhika 1985, tukamara obwire nitwetoroora ihanga lyona, nitwekebiija ediini ezitali zimu na zimu. Tukagenda omu diini ya Mennonites, Quakers, hamu n’ezindi.

Omu kasumi ako Abakaiso ba Yahwe bakaija omu ka yaitu ey’ekaba eri haihi na Camden, Indiana. Twabakaguzaaga ebikaguzo, nitubasaba kukozesa Baibuli eya King James yonka. Nabatekamuga ekitiinisa habwokuba tibejumbira omu bulemu. Baitu kikangumira kubahuliiriza habwokuba nayehurraga ngu teri diini y’amananu habwokuba bajwara engoye ezirumu erangi nyingi kandi eza buli kiro. Nayehurraga ngu emyehembo niyo yaleteraga abantu kwanga kujwara nk’oku twajwaraga. Naikirizaaga ngu ebintu rundi itungo lyaleteraga omuntu kuba n’emyehembo.

James akatandika kugenda ha Kyombeko ky’Obukama eky’Abakaiso ba Yahwe, naatwara bamu ha batabani baitu. Kinu kikambihiiza muno. Iba nyowe akansaba kugenda nauwe baitu nayanga. Kiro kimu akangambira ati: “N’obworaaba otarukwikiririza omu nyegesa zaabo, ija orole nk’oku batwazaamu abantu abandi kyonka.” Kinu kikaba kimukwasireho muno.

Hakumalirra, nkacwamu nagenda nauwe baitu ninyegendereza muno. Nkataaha omu Kyombeko ky’Obukama njwaire orugoye rwange oruraihire orw’erangi emu kandi nyeswekere ha mutwe. Aboojo baitu abamu bakaba batajwaire enkaito, kandi nabo engoye zaabo zikaba ziri nk’ezange. Baitu Abakaiso ba Yahwe bakaija nambere tuli kandi batutwaza omu mulingo ogw’okugonza. Nkatekereza nti, ‘Tuli bembaganiza halibo, baitu batutangiriire.’

Nkakwatwaho omulingo baatutwaizemu, baitu nabwo nkarora burora kyonka. Ntemerre kandi ntazine ebizina byabo. Hanyuma y’ensorrokano nkabakaguza ebikaguzo bingi, ebirukukwata ha binkaba nintekereza ngu tibihikire rundi enkarra ezimu ekizirukumanyisa. N’obukiraaba ngu tinakikoraga omu mulingo omurungi, buli muntu ounakaguzaaga yayolekaga ngu nanfaaho. Ekindi, nkakwatwaho muno kurora ngu nakaguzaaga abantu abarukwahukana ekikaguzo nikyo kimu, nibangarukamu omu mulingo ogurukusisana. Obwire obumu bampandikiraga eby’okugarukamu, kandi eki kyankonyeraga habwokuba nayongeraga nyesomera ndi nyenka.

Omu 1985, tukagenda omu rusorrokano orukooto orw’Abakaiso ba Yahwe omu Memphis, Tennessee, kurora kwonka. James akaba akyaine omuleju kandi twali nitukyajwara engoye zaitu. Omu kasumi k’okuhuumuramu, abantu baikaraga nibaija kubaza naitwe. Tukakwataho muno habw’omulingo baatwolekere okugonza, batufaaho kandi baatutangirra. Ekindi, tukakwatwaho obumu obutwarozere, hoona nambere twagendaga omu nsorrokano, baabaga nibegesa ebintu nibyo bimu.

James, obuyarozere omulingo Abakaiso ba Yahwe barukutufaaho, akaikiriza kwega Baibuli. Yaseruliirizaahoga buli kimu, n’agonza kugumya ebyarukwega obugaraaba gali mananu. (Engeso Ezabakwenda 17:11; 1 Abasesalonika 5:21) Hanyuma y’akasumi, akakirora ngu azoire amananu. Baitu nyowe nkaba ninyehurra mbaganizibwemu. Nkaba ningonza kukora ekihikire baitu ha murundi nugwo gumu ntarukugonza kuleka obwomeezi bwange obwa kara ngu habwokuba ninyija kuba n’afooka kicweka ky’ensi. Obunaikiriize kwega Baibuli, nkaba nyine Baibuli eya King James Version ha rubaju rumu kandi ha rubaju orundi nyine eya New World Translation. Nasomaga buli rukarra omu Baibuli zoona nukwo nkigumye ngu ebindukusoma mananu.

Omulingo Nakigumize ngu Ebindukwega Mananu

Obutwayeyongiire kwega Baibuli n’Abakaiso ba Yahwe, tukeega ngu Isiitwe ow’omu iguru ali Ruhanga omu, tibali basatu omu Ruhanga omu. Tukeega ngu titwine ekintu ekiturugamu hanyuma y’okufa kikaikara kiri kyomeezi. (Okubanza 2:7; Ekyebiragiro 6:4; Ezekyeri 18:4; 1 Abakolinso 8:5, 6) Ekindi, tukeega ngu omurro ogutaraara tiguliyo. (Yobu 14:13; Zabuli 16:10; Omugambizi 9:5, 10; Engeso Ezabakwenda 2:31) Kwega amananu agarukukwata ha murro ogutaraara kikahindurra kimu obwomeezi bwange, habwokuba omu diini yaitu eya Old Brethren kyasobororwaga omu miringo erukwahukana.

Baitu nabwo, nayekaguzaaga omulingo Abakaiso ba Yahwe esobora kuba diini y’amananu kandi kunu bajwara omu mulingo ogurukwoleka ngu bali kicweka ky’ensi. Bakaba bataine obwomeezi obworobere kandi nyowe nkaba nindora eki nikyetaagisa. Baitu kandi nkongera narora ngu nibahikiiriza ekiragiro kya Yesu eky’okutebeza amakuru amarungi ag’Obukama hali abantu boona. Nahabweki nkahurra nsobiirwe!​—Matayo 24:14; 28:19, 20.

Omu kasumi kanu, okugonza kw’Abakaiso ba Yahwe kukankonyera kweyongera kukigumya ngu ediini yabo y’amananu. Ekitebe kyona kikooleka ngu nikifaaho eka yaitu. Baingi hali bo baijaga muka yaitu, abandi nibekwasa ngu baizire kutuguraho amaata rundi amahuli. Tukatandika kubarora nk’abantu abarungi mali. Tibayangaga kwija muka yaitu ngu habwokuba tibalinubo abarukwega naitwe Baibuli. Oihireho, buli murundi abantu kuruga omu kitebe kyaitu baarabaga haihi n’enju yaitu, baijaga nibaturamukyaho. Kinu kikatukonyera kutunga omugisa gw’okubamanya kurungi, kandi mali tukakwataho okugonza okubaatwolekere n’omulingo baatufaahoga.

Abakaiso ba Yahwe ab’omu kitebe kyaitu tibali nubo bonka abaatwolekaga okugonza. Obutwali nitukyatalibanizibwa ensonga y’okujwara, Kay Briggs, kuruga omu kitebe ekindi, ayacwiremu kutekoraho ekihinguraine n’okujwara omulingo ogwanguhire akaija kumbungira. Obunkaba ndi nauwe nkahurra ntekaine kandi tukabaza kurungi. Kiro kimu Lewis Flora, nauwe ayakuliire omu diini erukugonza kusisanaho n’eyange nauwe akaija kumbungira. Aketegereza omulingo ndukwehurramu kandi akansindikira ebbaruha ey’empapura ikumi, naalengaho kumpumuza n’okungarramu amaani. Omulingo gw’embabazi oguyagihandiikiremu gukandetera kurra kandi nkagisoma emirundi nyingi.

Nkasaba omuroleerezi w’ekicweka, Ow’oruganda O’Dell, kunsoborra Isaya 3:18-23 na 1 Petero 3:3, 4. Namukaguza nti: “Enkarra zinu tizirukwoleka ngu kusobora kusemeza Ruhanga tusemeriire kujwara engoye ezerangi emu kandi eziraihire?” Nauwe akankaguza ati: “Kibi kweswekerra ha mutwe? Kibi kusiba isoke?” Omu diini ya Old Brethren, abaisiki abato twabasibaga isoke kandi abakazi nibajwara obukofiira rundi nibesiba ebitambara. Nkakirora ngu binu tibirukukwatagana, kandi nkakwatwaho omulingo yantwaize kurungi kandi yangumiisiriza.

Mporampora nkeyongera kugumya ngu ebinkaba ninyega mananu. Baitu haroho ekintu ekindi ekyantabaijuraga muno​​—abakazi baasaraga isoke lyabo. Abagurusi bakansoborra ngu abamu baine isoke erihika rikaleka kukura baitu abandi baine eriraiha muno. Nkekaguza nti, ekirukumanyisa abamu baine isoke erirukukira ery’abandi oburungi? Baitu nabwo bakankonyera kumanya omugaso gw’omuntu ow’omunda obukirukuhika ha kujwara n’okwekoraho. Hanyuma haroho ebibaampaire ngende kusomera muka.

Kuteeka omu Nkora Ebinkaba Ninyega

Tukaba nituserra ediini nambere barukukora ebibarukwegesa kandi tukaba tugizoire. Yesu akagamba ati: “Bona balimanya muli begeswa bange, obumurabaga nokugonzangana inywenka.” (Yohana 13:35) Tukakigumiza kimu ngu Abakaiso ba Yahwe bali bantu abooleka okugonza okw’amananu. Baitu omu kasumi ako, abaana baitu abakuru Nathan na Rebecca bakaba babuzabuziibwe, habwokuba bakaba baikiriize kweteraniza ha diini ya Old Brethren kandi babatiziibwe. Hanyuma nabo bakaikiriza amananu kuruga omu Baibuli agatwabegeseze kandi baakwatwaho n’okugonza Abakaiso ba Yahwe okubaabolekere.

Ekyokurorraho, Rebecca, yagonzaga muno kuba n’enkoragana enungi na Ruhanga. Kikamwanguhira kumusaba obuyayegere ngu Ruhanga tacwamu kara ebirahika ha muntu rundi omulingo arayetwaza. Akeyongera kwirra haihi Ruhanga obuyakimanyire ngu tali kicweka ky’obusatu obutasobora kusobororwa baitu ali muntu outusobora kwegeraho. (Abefeso 5:1) Kandi akasemererwa habw’okuleka kukozesa ebigambo ebya kara ebigumire obwarukuba nabaza nauwe. Akeyongera kwirra haihi Ruhanga obuyayegere omulingo oguhikire ogw’okusaba, hamu n’ekigendererwa kye hali abantu eky’okwomeera ebiro n’ebiro.​—Zabuli 37:29; Okusuku’rwa 21:3, 4.

Emigisa Eitutungire

Nyowe, James hamu n’abaana baitu bataano abakuru​—Nathan, Rebecca, George, Daniel, na John​—tukabatizibwa omu 1987. Harley akabatizibwa omu 1989, kandi Simon omu 1994. Na kasumi kanu eka yaitu n’eyekamba kukora omulimo Yesu Kristo oguyahaire abegeswa be, ogw’okutebeza amakuru amarungi ag’Obukama bwa Ruhanga.

Bataano h’abaana baitu abakuru​—Nathan, George, Daniel, John, Harley na Rebecca​—buli omu akaheerezaaho ha ofiisi y’itaagi eya U.S. Amerika. George aikaireyo kumara emyaka 14, kandi Simon, ayamazire kusoma omu 2001, obwire buke enyuma nauwe akatandika kuheereza ha itaagi. Batabani baitu abamu bagurusi kandi abandi baheereza omu bitebe by’Abakaiso ba Yahwe. Iba nyowe naheereza nk’omugurusi omu kitebe kya Thayer, omu Missouri, kandi nyowe nyikara ninyekamba omu kutebeza.

Hati twine abaijukuru basatu​—Jessica, Latisha, na Caleb​—kandi kibasemeza kurora ngu abazaire baabo nibabegesa kugonza Ruhanga. Itwena nk’eka nikitusemeza kurora ngu Yahwe akatucunda kandi yatukonyera kumanya abaheereza be ab’amananu kurabira omu kugonza okubaatwolekere.

Nituganyira muno abo abarukugonza kuheereza Ruhanga, baitu nibalemesebwa habwokuba omuntu wabo ow’omunda akatendekwa kusigikirra ha kiikaro n’omulingo baakuziibwemu, omu kiikaro ky’okutendekwa emisingi ya Baibuli. Nitunihira ngu akasumi nikaija kuhika nabo batunge okusemererwa okututunga obutugenda nju ha nju nitugambiraho abandi obutumwa oburukukwata ha Bukama bwa Ruhanga n’ebirungi buraleta, omu kiikaro ky’okugenda nitubaguza ebyokulya. Kinsemeza muno obunyijuka omulingo abarukwetwa ibara lya Yahwe baatugumiisirizemu kandi baatwoleka okugonza!

[Ekisisani]

Obunkaba nyine nk’emyaka musanju, kandi hanyuma nkuzire

[Ekisisani]

James, George, Harley, na Simon, bajwaire omulingo twajwaraga omu diini yaitu eya kara

[Ekisisani]

Ekisisani kinu ekirukwoleka nintwara ebyokulya omu katale kikaizira omu rupapura rw’amakuru

[Nambere ekisisani kiihirwe]

Journal and Courier, Lafayette, Indiana

[Ekisisani]

Ndi n’abomu ka yange kasumi kanu