ISOMO 28
Yoleka ngu n’Osiima habw’Ekintu Yahwe na Yesu Baakukoliire
Oyehurra ota munywani wawe obw’akuha ekisembo ekirungi muno? Kinu nikisobora kukuletera okusemererwa kwingi n’okwoleka munywani wawe ngu n’osiima habw’ekisembo ekyakuhaire. Yahwe na Yesu bakatuha ekisembo ekirukukirrayo kimu oburungi. Ekisembo eki nikyo ekicunguro. Nitusobora tuta kwoleka ngu nitusiima habw’ekisembo eki?
1. Mulingo ki ogumu ogutusobora kwolekamu ngu nitusiima habw’ekintu Ruhanga na Kristo baatukoliire?
Baibuli eraganiza ngu “omuntu wena anyakumuikiriza [Yesu]” n’asobora kwomeera ebiro n’ebiro. (Yohana 3:16) Kinu nitusobora kukikora tuta? Titusemeriire kugarukira ha kwikiririza omuli Yesu kwonka. Baitu tusemeriire n’okwoleka okwikiriza kwaitu kurabira omu ncwamu zaitu n’omu bikorwa byaitu. (Yakobo 2:17) Obutwoleka okwikiriza kwaitu kurabira omu bikorwa n’omu bigambo byaitu, tugumya obunywani bwaitu na Yesu hamu na Ise, Yahwe.—Soma Yohana 14:21.
2. Mukoro ki ogw’embaganiza ogutukonyera kwoleka ngu nitusiima habw’ekintu Yahwe na Yesu baakozere?
Omu bwire bwa rwebagyo Yesu atakafiire, akagambira abahondezi be omulingo ogundi ogw’okwoleka ngu nibasiima habw’ekihongwa kye. Akatandikaho omukoro ogw’embaganiza Baibuli ogweyeta “Ekiihuro kya Mukama Waitu,” kandi ekirukumanywa nka Ekiijukyo ky’Okufa kwa Kristo. (1 Abakolinso 11:20) Yesu akatandikaho omukoro gunu, nukwo abakwenda, hamu n’Abakristaayo ab’amananu boona abaakwizire hanyuma, basobole kwijuka nk’oku yahaireyo obwomeezi bwe ha bwaitu. Nahabweki akaragira ati: “Mukolege muti okuijuka nyowe.” (Luka 22:19) Obwobaho ha Kiijukyo, oyoleka ngu n’osiima habw’okugonza kwingi Yahwe na Yesu okubatwiniire.
YEGA EBIRUKUKIRAHO
Manya emiringo endi ey’osobora kwolekamu ngu n’osiima habw’engonzi nyingi Yahwe na Yesu ezibakwolekere. Yega habwaki omukoro gw’Okwijuka okufa kwa Yesu mukuru muno.
3. Bintu ki ebitusobora kukora kwoleka ngu nitusiima
Teeramu akasisani ngu obaire n’odikira omu maizi baitu omuntu yajuna obwomeezi bwawe. N’osobora kwebwa ekintu omuntu ogu eky’akukoliire? Rundi n’osobora kuserra emiringo orayoleka ngu n’osiima habw’ekintu eky’akukoliire?
Twine omugisa ogw’okwomeera ebiro n’ebiro habw’embabazi za Yahwe. Musome 1 Yohana 4:8-10, hanyuma mubazeho ebikaguzo binu:
-
Habwaki ekihongwa kya Yesu kiri kisembo ky’embaganiza?
-
N’oyehurra ota ha kintu Yahwe na Yesu baakukoliire?
Nitusobora kwoleka tuta ngu nitusiima hahw’ekintu Yahwe na Yesu baatukoliire? Musome 2 Abakolinso 5:15 na 1 Yohana 4:11; 5:3. Hanyuma y’okusoma buli kyahandiikirwe, mubazeeho ekikaguzo kinu:
-
Kusigikirra ha kyahandiikirwe kinu, kiki ekitusobora kukora kwoleka ngu nitusiima?
4. Hondera ekyokurorraho kya Yesu
Omulingo ogundi ogutwoleka ngu nitusiima nukwo kuhondera ekyokurorraho kya Yesu. Musome 1 Petero 2:21, hanyuma mubazeeho ekikaguzo kinu:
-
Miringo ki ey’osobora kuhonderamu ebigere bya Yesu?
Yesu yagonzaaga Ekigambo kya Ruhanga, yatebezaaga amakuru amarungi, kandi yakonyeraga abandi
5. Baho ha kwijuka okufa kwa Kristo
Kusobora kurora ekyabaireho ha Kiihuro kya Mukama Waitu Ekyarwebagyo ekyabandize, musome Luka 22:14, 19, 20. Hanyuma mugarukemu ebikaguzo binu:
-
Kiki ekyabaireho ha Kiihuro kya Mukama Waitu Ekyarwebagyo?
-
Omugaati na viini [empwahwa] nibikiikirra ki?—Rora orukarra 19, na 20.)
Yesu akaba n’agonza abegeswa be babege n’omukoro gw’Ekiijukyo omurundi gumu buli mwaka ha kiro yaferiiremu. Nahabweki, Abakaiso ba Yahwe besorooza hamu buli mwaka kwijuka okufa kwa Kristo omu mulingo gwonyini Yesu oguyaragiire. Kumanya ebirukukiraho ha rusorrokano runu orukuru, mutekeho VIDIYO. Hanyuma mugarukemu ekikaguzo kinu.
-
Kiki ekiba ha Kiijukyo?
Omugaati n’eviini haroho ekibikiikirra. Omugaati gukiikirra omubiri gwa Yesu oguhikiriire oguyahaireyo nk’ekihongwa ha bwaitu. Eviini ekikiirra esagama ye
ABANTU ABAMU BAGAMBA: “Nkaikiriza Yesu kuba mujuni wange. Eki nikimara.”
-
N’osobora ota kukozesa Yohana 3:16 na Yakobo 2:17 kubooleka ngu haroho ebindi ebirukwetaagisibwa?
OYEGERE KI?
Twoleka ngu nitusiiima habw’ekintu Yesu yatukoliire kurabira omu kumwikiririzaamu n’okubaho ha kwijuka okufa kwe.
Kweijukyamu
-
Nikimanyisa ki kwikiririza omuli Yesu?
-
Wakugondeze kwoleka ota ngu n’osiima habw’ekintu Yahwe na Yesu baakukoliire?
-
Habwaki kikuru muno kubaho ha mukoro gw’Okwijuka okufa kwa Kristo?
SERULIIRIZA
Okufa kwa Kristo nikutwekambisa kukora ki?
Manya ebirukukiraho ha kwikiriza hamu n’omulingo tusobora kukwoleka.
“Ikiririza omu Mirago ya Yahwe” (Watchtower, eya Okitobba 2016)
Omu kicweka “Nimpurra ndi Mwecumi, Mwomeezi kandi Busaho Ekiimbuzireho,” rora omulingo obwomeezi bw’omukazi bwayeyongiire kusemera hanyuma y’okumanya amakuru g’ekihongwa kya Kristo.
“Baibuli Ehindura Obwomeezi” (Watchtower, eya Agusto 1, 2011)
Wetegereze habwaki ha Kiijukyo abantu bake nubo balya ha mugaati kandi bakanywa ha viini.
