1, 2. Baramu akakora ntekaniza ki kutega abantu ba Yahwe?

OMUSOHI agenda omu kaikaro akagonza kusoheramu. Aine ekika ky’encu eky’arukugonza kukwata. Atunga akantu ak’okuta ha irobo kandi alinaga omu maizi. Hanyuma y’edakiika nke, ahurra irobo niryetengesa amanya ngu akwasize kandi alisikayo. Ahurra asemeriirwe habwokuba akatego akakozeseze kakwasire encu ey’abaire n’agonza.

² Omu mwaka 1473 omu mbara eya ira, omusaija arukumanywa nka Baramu akatekerezaaho muno ha mutego ogw’akaba n’asobora kukozesa kutega abantu ba Ruhanga abaali batiire enkande haihi n’ebyeya bya Moabu ekaba eheraine n’Ensi ekaba Ebaraganiziibwe. Baramu akefoora kuba nabbi wa Yahwe, baitu akaba ali musaija w’omururu apangisiibwe okukyena Abaisareri. Baitu habw’amaani ga Yahwe, Baramu akaha Isareri omugisa omu kiikaro ky’omukyeno. Baitu habw’okugonza muno kutunga ekisembo eki bakaba bamuraganiize, Baramu akatekerezaho omulingo ogundi ogw’okuletera Abaisareri kukora ekibi ky’amaani nukwo Ruhanga abekyenere wenka. Kinu nikyo yakozere, akakozesa abaisiki ba Moabu abarukusikiriza.—Okubara 22:1-7; 31:15, 16; Okusuku’rwa 2:14.

3. Omutego gwa Baramu gukakora kwingana nkaha?

³ Omutego gunu gukakwasa? Ego, gukakwasa. Enkumi n’enkumi z’abasaija ba Isareri bakagwa omu mutego gunu “babanza okusihana nabahara ba Moabu.” Bakatandika n’okuramya ba ruhanga b’ebisuba aba Moabu nka Baali peora, ruhanga  w’oruzaaro rundi ow’okuterana. Ekyarugiremu, Abaisareri abarukuhika 24,000 bakahwerekerezebwa bali haihi kutaaha omu Nsi Eraganiziibwe. Ganu ka gakaba mahano!—Okubara 25:1-9.

4. Habwaki enkumi n’enkumi z’Abaisareri bagwire omu mutego gw’obusihani?

⁴ Kiki ekyaleteriize akabi kanu? Abaingi bakaba baizirwemu omutima omubi ogw’okuruga hali Yahwe Ruhanga ow’akaba abajunire kuruga omu bwiru, abalisize bali omu irungu, kandi abahikize ha nsaro saro ez’Ensi ekaba Ebaraganiziibwe. (Abaheburaniya 3:12) Omukwenda Paulo akabazaaho ensonga enu ati: “Kunu tutasihana, nkabamu halibo okubasihaine, kandi bagwa ha kiro kimu bukumi bubiri mwenkumi isatu.” *—1 Abakolinso 10:8.

5, 6. Habwaki ekyahikireho Abaisareri obu baali ha byeya bya Moabu kikuru hali itwe?

⁵ Ekyandiikirwe kinu kirumu eby’okwega bingi hali abantu ba Ruhanga ab’omu kasumi kanu abanyakwemeriire ha nsaro saro y’ensi empyaka eraganiziibwe. (1 Abakolinso 10:11) Ekyokurorraho, entekereza y’abantu omu kasumi kanu ha bikwatiraine  n’okuterana n’esisana n’ey’abantu ba Moabu baitu yo eri ha rulengo rw’ensi yoona. Buli mwaka, enkumi n’enkumi z’Abakristaayo bagwa omu mutego gw’obusihani—nugwo mutego gwonyini Abaisareri ogu bagwiremu. (2 Abakolinso 2:11) Nka Zimiri ataratinire kuleeta omukazi Omumidiani omu hema ye nambere Abaisareri bakaba batiire orukande, abamu hali abo abaturamya nabo basisire bagenzi baitu omu kitebe.—Okubara 25:6, 14; Yuda 4.

⁶ Naiwe n’oyerora oli ha byeya bya Moabu ey’akasumi kanu? Ekisembo eky’ensi empyaka eyi twikaire tulindiriire n’okirora ngu kiri haihi? Obworaaba n’okirora, faayo muno kukora kyona ekirukusoboka okwerindira omu kugonza kwa Ruhanga n’ohondera ekiragiro kye ekirukugamba: “Muiruke obusihani!”—1 Abakolinso 6:18.

7, 8. “Obusihani” nikyo kiki, kandi abasihana bagesa ebi basiga omu mulingo ki?

⁷ Kusigikirra ha Baibuli, ekigambo “obusihani” (omu Ruyonaani, por·neiʹa) nikimanyisa okwetaba omu bikorwa byona eby’okuterana ebitarukwikirizibwa omu Baibuli. Binu nibitwarramu kuterana n’omuntu aheeru y’obuswere, obwamalaya, abantu abataswerangaine kuterana hamu, kukozesa omunwa kuzanisa ebicweka by’ensoni eby’omuntu ondi, okukwata kwata ebicweka by’ensoni eby’omuntu ondi ow’otali nauwe omu buswere, hamu n’emiringo endi ey’okuterana etali y’obuhangwa. Kandi nibitwarramu kuterana n’omuntu ow’orukusisana nauwe omu buhangwa, kuterana n’ekisoro, rundi kuzanisa ebicweka by’ensoni eby’ekisoro n’ebigendererwa ebitahikire. *

⁸ Ebyahandiikirwe byoleka kurungi ngu: Abasihani tibarukusobora kwikara omu kitebe Ekikristaayo kandi tibarukwija  kutunga obwomeezi obutahwaho. (1 Abakolinso 6:9; Okusuku’rwa 22:15) Okwongerezaho, kirugirramu abantu okutabesiga n’okutabatamu ekitiinisa, okutunga obutetegerezangana omu maka, omuntu w’omunda kubajunaana, kutwara enda ezi batarukugonza, endwara, rundi n’okufa. (Soma Abagaratiya 6:7, 8.) Ky’amagezi mali kukwata omuhanda ogwijwiremu ebizibu? Eky’enaku, abantu baingi tibabanza kutekereza ha bizibu ebi baratunga obu bateera orutambu rw’okubanza omu kusihana, kandi orutambu runu rukira kuba okurora ebisisani eby’obuhemu.

9. Okurora ebisisani eby’obuhemu tikiine akabi nk’oku abamu bagamba? Soborra.

⁹ Omu mahanga maingi, ebisisani eby’obuhemu byolekwa omu mpapura z’amakuru, omu bizina, n’aha tivi, kandi bijwire ha mikura ya intaneti. * Abamu bagamba ngu tibiine akabi, baitu eki kisuba! Abarora ebisisani binu nibasobora kugifoora ngeso yabu okuzanisa ebicweka byabo eby’ensoni kandi nibasobora kufooka bairu b’engeso ezirukukwasa ensoni. Kinu nikisobora kubarugirramu okutetanga obu kirukuhika ha kuterana, okwegomba okubi, okutunga ebizibu omu buswere, rundi n’okugaitururwa. * (Abarumi 1:24-27; Abefeso 4:19) Omuseruliizi omu akalengesaniza engeso y’okugonza kuterana buli kaire n’oburwaire bwa kokoro. N’agamba ngu “Engeso enu ikara n’ekura kandi n’ejanjara, teyanguhire kugijanjaba kandi egumire kukira.”

10. N’osobora ota kuta omu nkora omusingi oguli omu Yakobo 1:14, 15? (Rora akasanduuko  OMulingo n’Atungire Amaani g’Okwecwa ha Bikorwa Ebibi.)

 ¹⁰ Tekerezaaho ebigambo ebiri omu Yakobo 1:14, 15, orukugamba: “Omuntu wena ayohebwa obwacundwa okwegombakwe wenka nabihabihibwa. Kandi okwegomba oku obukumara okutwara enda, kuzara okusisa: nokusisa oku obukumara okukura, kuzara okufa.” Nahabweki obw’oraijwamu ekitekerezo ekibi, kirwanise obwire obu bwonyini! Ekyokurorraho, kakuba orora ebisisani ebitasemiire otakigenderiire, ihayo amaiso, rundi zimya kompyuta, rundi hindura omukura gwa Tivi orole ogundi. Kora kyona ekirukusoboka kwetantara ebitekerezo eby’obusihani bitakakuhinguraineho bikakunaga omu kabi!—Soma Matayo 5:29, 30.

11. N’osobora ota kwoleka ngu noyesiga Yahwe obworukuba n’orwanisa ekwegomba okubi?

 ¹¹ Yahwe, anyakutumanyire kurungi kukira nk’oku twemanyire n’atutererra ati: “Nukwo [mufiise] ebicweka byanyu ebyahansi, obusihani, nobugwagwa, nokwegomba okwensoni, nomukoijo omubi, nokwegomba okuli okuramya ebisisani.” (Abakolosai 3:5) Mananu tikyanguhire. Baitu ijuka ngu, nitusobora kwesengereza Isiitwe Yahwe ow’okugonza kandi anyakugumisiriza atukonyere. (Zabuli 68:19) Nahabweki kakuba oijwamu ekitekerezo ekibi, omusabe omu bwangu. Musabe akuhe “amani agali amaingi muno,” kandi ebitekerezo byawe bihambirize kutekereza ha kintu ekindi.—2 Abakolinso 4:7; 1 Abakolinso 9:27; rora akasanduuko “ Ninsobora Nta Kuleka Engeso Embi?” akali ha rupapura 104.

12. “Omutima” gwaitu nikyo kiki, kandi habwaki tusemeriire kugulinda kurungi?

¹² Sulemani omusaija ow’amagezi akagamba: “Oyerinde omutima gwawe nokwekamba kwona; baitu nuho haruga ensoro ezobwomezi.” (Enfumo 4:23) “Omutima” gwaitu nikyo eki ekituli omunda, eki ekituli kusigikirra hali Ruhanga. Baitu twijuke, kutunga obwomeezi obutahwaho rundi okutabutunga nikiija kusigikirra hali Ruhanga anyakulenga “omutima” hatali abantu eki baturoraho. Nukwo kyanguhire kiti. Baitu nabwo kintu kikuru muno. Omusaija Yobu akakora endagaano n’amaiso ge nukwo atarora omukazi n’ebigendererwa ebibi. (Yobu 31:1) Kinu ka kyokurorraho kirungi eki yatuteriireho! Omuhandiiki wa Zabuli nauwe akaba n’entekereza nk’enu obu yasabire Yahwe n’agamba: “Ohindule amaiso gange, galeke okurora ebitarumu.”—Zabuli 119:37.

13. Dina akaba nuwe oha, kandi habwaki abanywani abayatungire batarabaire barungi?

¹³ Nk’oku twarozere omu Suura 3, abanywani baitu nibasobora kutuletereza kukora ebirungi rundi ebibi. (Enfumo 13:20; soma 1 Abakolinso 15:33.) Tekerezaaho ekyokuorraho kya Dina muhara wa Yakobo. Dina n’obwaraaba yakuziibwe kurungi,  akakora encwamu embi ey’okunywana abaisiki ba Kanani. Abakanani n’abo bakaba bantu babi nk’Abamoabu. (Ebyabalevi 18:6-25) Abasaija Abakanani, otwaliiremu na Sekemu “akabanyina ekitinisa” okukira enju yoona eya ise, bakarora Dina nk’omwisiki ou bakaba nibasobora kuterana nauwe.—Okubanza 34:18, 19.

14. Omuganjano Dina yatandikireho gukamuletera guta ebizibu?

¹⁴ Dina uwe n’asobora kuba ataratekeriizeho eby’okuterana obu yarozere Sekemu. Baitu Sekemu uwe akakora ekintu Abakanani baingi eki bagambaga ngu ky’obuhangwa kukora kakuba ogonza kuterana n’omuntu. Dina akaba atakyaine eky’amaani eky’akaba n’asobora kukora habwokuba Sekemu ‘akamutwara’ “yabyama nauwe.” Nikisisana ngu hanyuma ya kaire, Sekemu akatandika kugonza Dina habwokuba Baibuli egamba ngu ‘omutima gwe gukaterana n’ogwa Dina,’ baitu kinu tikyakuhindwire eky’akaba amazire ira kumukora. (Soma Okubanza 34:1-4.) Kandi tali Dina wenka ayabonaboine habw’ekikorwa kinu. Omuganjano gwe gukamurugirramu  okuswaza ab’omu ka ye yoona.—Okubanza 34:7, 25-31; Abagaratiya 6:7, 8.

15, 16. Nitusobora tuta kutunga amagezi gonyini? (Rora n’akasanduuko  Ebyahandiikirwe by’Okwecumitirizaaho.)

¹⁵ Ebizibu Dina ebi yatungire bikamwegesa isomo ly’amaani. Abaheereza ba Yahwe tibasemeriire kubanza kulinda ebizibu bikabegesa ekintu ekihikire. Habw’okugonza kuhuliiriza  Ruhanga, bacwamu ‘kugendaga n’abantu ab’amagezi.’ (Enfumo 13:20a) Kinu kibaletera kwetegereza “omuhanda gwona omurungi” kandi kibakonyera kwetantara ebizibu n’obujune.—Enfumo 2:6-9; Zabuli 1:1-3.

¹⁶ Amagezi kuruga hali Ruhanga gatungwa bona abagaserra kuraba omu kusaba n’okusoma Baibuli hamu n’ebitabu ebitiirwe omwiru omwesigwa. (Matayo 24:45; Yakobo 1:5) Obuculezi nabwo nibwetaagisa, kandi omuntu ayoleka ngu muculezi obw’ahondera obuhabuzi bwa Baibuli. (2 Ekyabakama 22:18, 19) Ekyokurorraho, Omukristaayo n’asobora kuba n’aikiriza ngu mali omutima gwe nigusobora kuba mugobya. (Yeremiya 17:9) Baitu ekikaguzo kiri, kakuba kimwetagisa kukora encwamu baitu akagikora n’asigikirra ha mutima gwe, mali araaba ayolekere ngu w’amagezi?

17. Soborra ensonga erukusobora kwimukaho omu ka, kandi oyoleke omulingo taata asobora kukonyera omuhara kugyetegereza.

¹⁷ Teramu akasisani, taata ayangiriire muhara we kugenda okwesemezamu n’ow’oruganda bataine omuntu arukubarolerra. Omwisiki akaguza ise: “Taata mali torukunyesiga? Titurukugenda kukora ekintu kyona ekibi!” N’asobora kuba n’agonza Yahwe kandi ataine ekitekerezo kyona eky’okukora ekintu ekibi, baitu mali n’agendera omu “magezi [ga Ruhanga]”? Omwisiki onu mali ‘nairuka obusihani’? Rundi ‘nayesiga omutima gwe’? (Enfumo 28:26) N’osobora kutekerezaho ha misingi endi eya Baibuli erukusobora kukonyera taata onu n’omuhara we kwetegereza ensonga enu.—Rora Enfumo 22:3; Matayo 6:13; 26:41.

18, 19. Yusufu akohebwa ata, kandi kiki eki yakozere?

¹⁸ Yusufu yali omusigazi omurungi ayagondeze Ruhanga yairuka obusihani, kandi akaba ali mugenzi wa Dina. (Okubanza 30:20-24) Omu buto bwe, Yusufu akaba ayeroliire wenka akabi munyaanya aka yagwiremu. Hataroho kugurukyagurukya, okwijuka ebintu binu hamu n’okugonza kwe okw’okusemeza Ruhanga bikamukonyera emyaka eyahondiireho  obwakaba ali omu nsi ya Misiri nambere omukazi w’omukama we yamwohyaga “bukyabukya.” Yusufu akaba ali mwiru, nahabweki akaba ataine obugabe bw’okuleka omulimo ogu! Akaba aine kujangurra ensonga enu omu mulingo gw’amagezi kandi n’obumanzi. Kandi mali akakozesa amagezi habwokuba emirundi nyingi yamugambaga nangwa. Kandi obu kyamuhinguraine, akamalirra n’amwirukaho.—Soma Okubanza 39:7-12.

¹⁹ Banza oyekaguze hali kinu: Kakuba Yusufu yaikaire n’ateekereza ha mukazi onu, rundi yaikaire n’atekereza ha kuterana nauwe, yakusoboire kulinda obwesigwa bwe? Tiyakusoboire. Mukiikaro ky’okwikara n’atekereza ha kukora ekibi, kusigikirra ha bigambo bye, Yusufu akatwara enkoragana ye na Yahwe kuba y’omuhendo. Yagambaga: “[Mukama wange] atanyime ekintu kyona, rundi iwe wenka, baitu oli mukaziwe: nukwo, ninsobora nta okukora ekibi kinu ekingi muno nokusisira Ruhanga?”—Okubanza 39:8, 9.

20. Yahwe akakonyera ata Yusufu?

²⁰ Teramu akasisani orole omulingo Yahwe yasemeriirwe obu yaboine Yusufu n’obwaraaba yali hara muno n’abanyabuzaale be baitu yalinda obwesigwa bwe buli kiro. (Enfumo 27:11) Hanyuma ya kasumi, Yahwe akataaha omu nsonga za Yusufu yamukonyera kuruga omu nkomo kandi yaforwa omuhikirwa w’ensi ya Misiri arukujunanizibwa kugaba eby’okulya! (Okubanza 41:39-49) Kinu nikigumya ebigambo ebiri omu Zabuli 97:10: “Inywe abanyakugonza Mukama, munobe obubi. Ogu alinda obwomezi bwabarukwerabe”!

21. Ow’oruganda kuruga omu nsi emu eya Africa akoleka ata ngu akaba amaliriire kuba n’engeso ezisemiire?

 ²¹ Nikyo kimu n’omu kasumi kanu, abaheereza ba Yahwe abarukukira obwingi bolekere ngu ‘nibanoba ebibi, kandi nibagonza ebirungi.’ (Amosi 5:15) Ow’oruganda omu nsi ya Africa n’aijuka ngu omwisiki ou yasomaga nauwe akamugamba ngu amukonyereho omu kirengeso eky’okubara nukwo hanyuma araterana nauwe kwoleka okusiima kwe. Ow’oruganda n’agamba ngu, “nkangiraho aho n’aho. Habw’okulinda obwesigwa bwange, nsoboire kulinda ekitiinisa kyange ekirukukira efeza n’ezabu omu muhendo.” Mananu ngu ekibi nikisobora kuletaho okusemererwa okw’akaire kake, baitu okusemererwa kw’omulingo ogu kurugamu oburumi bw’amaani. (Abaheburaniya 11:25) Kandi okusemererwa kunu tikwine mugaso na kake kakuba tukulengesaniza n’oku okuruga omu kworobera Yahwe.—Enfumo 10:22.

22, 23. (a) Kakuba Omukristaayo akora ekibi eky’amaani, eki nikimanyisa ngu tihakyaroho okunihira kwona? (b) Bukonyezi ki omusiisi obw’asobora kutunga?

²² Habw’okutahikirra, itwena turwanisa muno okwegomba okw’omubiri nukwo tukole Ruhanga eby’asiima. (Abarumi 7:21-25) Yahwe nayetegereza ekizibu kinu, “aijuka okutuli ecucu.” (Zabuli 103:14) Baitu haroho obwire obu Omukristaayo asobora kukora ekibi ky’amaani. Nitusobora kugamba ngu tasobora kuganyirwa? Nangwa, n’asobora kuganyirwa! Baitu omuntu onu n’asobora kutunga ebizibu kuruga omu kibi kye nk’oku Omukama Daudi yabitungire. Baitu Ruhanga ‘arahuka kuganyira’ omuntu weena ayeijukya “akagamba” ebibi bye.—Zabuli 86:5; Yakobo 5:16; soma Enfumo 28:13.

²³ Kwongerezaaho, Yahwe ahaire ekitebe Ekikristaayo ebisembo omu bantu, banu nubo abaroleerezi abakuzire omu by’omwoyo, abaine obusobozi kandi abarukugonza kukonyera. (Abefeso 4:8, 12; Yakobo 5:14, 15) Ekigendererwa kyabu nukwo kukonyera anyakukozere ekibi ky’amaani kugaruka kutunga enkoragana enungi na Yahwe, n’okumukonyera kutunga  “okwetegereza” nukwo atagarukira ekibi kye.—Enfumo 15:32.

24, 25. (a) Omusigazi arukubazibwaho omu Enfumo 7:6-23 akoleka ata ngu akaba ‘atanyina amagezi’? (b) Nitusobora tuta ‘kutunga amagezi’?

²⁴ Baibuli ebazaaho abantu “abatanyina amagezi” hamu n’omuntu ‘anyakutunga okwetegereza.’ (Enfumo 7:7) Omuntu ‘atanyina amagezi’ n’asobora kulemwa kuba n’okwetegereza rundi kukora encwamu ez’amagezi habwokuba n’aba atakuzire omu by’omwoyo kandi atamanyire bingi omu kuhereza Yahwe. Nk’omusigazi arukubazibwaho omu Enfumo 7:6-23, omuntu ow’omulingo gunu nikimwanguhira kukora ekibi eky’amaani. Baitu omuntu “anyakutunga amagezi” ayekebera kurora kiki ekyali omunda kuraba omu kusaba n’okusoma Baibuli buli kiro. Nobwaraaba ali muntu atahikiriire, akora kyona ekirukusoboka kurora ngu ebitekerezo bye, okwegomba kwe, enyehurra ye, hamu n’ebigendererwa bye nibikirraniza n’ebi Ruhanga asiima. Nahabweki ayoleka ngu “agonza obwomezibwe,” kandi “alibona ebirungi.”—Enfumo 19:8.

²⁵ Wekaguze: ‘Mali ninkigumya ngu ebiragiro bya Ruhanga bihikire? Ningumiza kimu ngu okubihondera nikisobora kundetera okusemererwa kw’amaani?’ (Zabuli 19:7-10; Isaya 48:17, 18) Obworaaba oinemu okugurukyagurukya n’obukwakuba kuke, kweyihemu. Cumitiriza ha bizibu ebirukusobora kuruga omu kucwa ebiragiro bya Yahwe. Okwongerezaho, ‘Roza, omanye Mukama okwali murungi’ obu nohondera amananu omu bwomeezi bwawe kandi n’otekereza ha bintu ebisemiire byonka—ebyamazima, eby’obulyo, ebisemiire, byona ebirukugonzebwa, kandi ebirungi. (Zabuli 34:8; Abafiripi 4:8, 9) Okimanye ngu, obw’oratamu amaani, noija kweyongera kugonza Ruhanga, kugonza eby’agonza, n’okunoba eby’anoba. Yusufu akaba atahikiriire. Baitu nabwo akasobora ‘kwiruka obusihani’ habwokuba akaleka Yahwe okumubumba emyaka egi yona kumufora muntu w’amagezi. Naiwe ikiriza Yahwe akubumbe.—Isaya 64:8.

26. Isomo ki erikuru erirukugenda kwongeraho?

 ²⁶ Omuhangi waitu atahange ebicweka byaitu eby’ensoni kuba eby’okuzanisa baitu akabihanga kubikozesa okuzaara n’okutunga okusemererwa omu buswere. (Enfumo 5:18) Entekereza ya Ruhanga ha by’obuswere niija kubazibwaho omu suura ibiri ezirukuhonderaho.