N’orora omwisiki ali omu kisisani?— Muhara w’omusaija arukwetwa Yefuta. Baibuli tetugambira ibara lye baitu etugambira ngu akaleetera ise na Yahwe kusemererwa. Katusome ebirukubakwataho uwe na ise, Yefuta.

Yefuta akaba ali musaija murungi kandi yamaraga obusumi bwingi n’ayegesa muhara we ebirukukwata hali Yahwe. Yali mwebembezi murungi kandi omumanzi. Nikyo Abaisareri bamusabiire abebembere nibagenda kurwana n’abanyanzigwa baabu.

Yefuta akasaba Yahwe batunge obusinguzi. Akagamba Yahwe ngu kakuba abakonyera bakasingura, akumuhaire omuntu ayakubandize kuturuka omu  nju ye agarukireyo omuka. Omuntu onu akaba aine kwikara n’okuheereza Yahwe omu heema ye ebiro bye byoona. Eheema enu nuho abantu bagendaga kuramya Yahwe. Ruhanga akakonyera Yefuta yasingura. Omanyire ayabandize kuturuka omu nju ye kwija kumutangiirra obu y’agarukire omuka?—

Akaba muhara we! Nuwe weenka akaba aine, baitu akaba aine kumuhayo. Kikamusaaliza muno. Baitu ijuka akaba yeragire. Muhara we akamugamba: ‘Taata, okeeraga hali Yahwe, oine kuhikiriza.’

Muhara wa Yefuta nauwe kikamusaaliza muno. Akaba atarukusobora kuswerwa rundi kuzaara abaana n’akora omu hema ya Yahwe. Baitu akaba n’agonza muno kuhikiriza ekya ise akaba yeragire n’okusemeza Yahwe. Ekyo kyaali nikimukirra kuswerwa n’okuzaara abaana. Nahabwekyo, akagenda yatandika kwikara omu heema ebiro bye byoona.

N’oteekereza ekiyakozere kikasemeza Ise na Yahwe?— Kikabasemeza! Obworaaba muhulizi kandi okagonza Yahwe osobora kuba nka muhara wa Yefuta. Naiwe oija kusemeza muno Yahwe n’abazaire baawe.