Ekyanda obu kyali nikikyagenda omu maiso, Yahwe akagambira Eriya ati: ‘Genda Zalefasi. Haliyo omufakati arukwija kukuha eby’okulya.’ Eriya obu yahikire ha mulyango gw’orubuga, akarora omufakati omunaku n’aseenya enku. Akamusaba amaizi g’okunywa. Omukazi obwakaba n’agenda kumuletera amaizi, Eriya akongera yamweta yamugambira ati: ‘Ninkusaba, ompeho n’omugaati gw’okulya.’ Baitu omufakati yamugambira ati: ‘Tinyine mugaati ogw’okukuha. Nsigaizeho ensaano ntaito hamu n’amagita mataito ebindukugenda kukozesa na mutabani wange.’ Eriya akamugamba ati: ‘Yahwe agambire ngu kakuba onkorra omugaati, ensaano n’amagita tibirukwija kuhwaho.’

Omufakati obu yahulire kinu, akagenda yamukorra omugaati. Nk’oku Yahwe akaba agambire, omufakati na mutabani we bataburwe eby’okulya obwire bwona obw’ekyanda. Ensaano ye n’amagita ge bitahweho.

 Baitu haroho ekintu ekibi muno ekyahikire ha mufakati onu. Mutabani we akarwara kandi yafa. Omufakati onu akesengereza Eriya kumukonyera. Eriya akamumwihaho yamutwara omu kisiika kindi haiguru y’enju egi. Akabyamya omutumbi gw’omwana onu ha kitabu nukwo yasaba Yahwe n’agamba ati: ‘Ai Yahwe, nkwesengeriize ohumbuule omwana onu.’ Nomanya habwaki kuhumbuura omwana onu kikaba nikigenda kuba kintu ekirukuhuniriza muno kuruga hali Yahwe? Kusigikirra nk’oku tumanyire, omu byafayo by’abantu hakaba hatakahumburwaga muntu wena. Kandi omufakati onu na mutabani we bakaba batali Bantu ba Isareri.

Baitu omwana onu akahumbuka yagaruka kuba mwomeezi! Eriya akagambira omufakati ati: ‘Dora! Mutabani wawe ali mwomeezi.’ Omufakati onu akasemererwa muno kandi yagambira Eriya ngu: ‘Mananukwo oli musaija wa Ruhanga. Eki ninkimanya habwokuba eby’orukubaza byona nibyo Yahwe aba akuragiire kubaza.’