Yosuha akafa ahikize emyaka 110, hanyuma y’okumara emyaka nyingi n’ayebembera abantu ba Yahwe. Omu bwebembezi bwa Yosuha bwona, Abaisareri bakaramya Yahwe wenka. Baitu Yosuha obu yafiire, bakatandika kuramya ebisisani nk’oku abantu ba Kanani bakoraga. Yahwe akaleka omukama wa Kanani arukwetwa Yabini okugumanganiza obwomeezi bw’Abaisareri habwokuba bakaba balekere kumuramya. Abaisareri bakesengereza Yahwe abajune. Yahwe akabagarukamu obu y’abahaire omwebembezi omuhyaka arukwetwa Baraka. Akaba n’agenda kubakonyera kwongera kuramya Yahwe.

Nabbi omukazi arukwetwa Debora akatuma bamwetere Baraka. Yahwe akaba atumire Debora kugambira Baraka ngu: ‘Tunga abasaija abarukuhika omu 10,000 mugende murwane n’ihe lya Yabini ha kyambu Kisoni. Kinu nikyo ekiikaro nambere orasingurra Sisera na Yabini omukuru w’ihe lye.’ Baraka akagambira Debora ati: ‘Ninyija kugenda, obw’oraaba nogenda hamu nanyowe.’ Debora akamugarukamu ati: ‘Nitwija kugenda hamu, baitu okimanye ngu tali niiwe aliita Sisera. Yahwe agambire ngu omukazi nuwe alimwita.’

 Debora akagenda na Baraka hamu n’ihe lye bahika ha Rusozi Tabora kwetekaniriza obulemu. Sisera obu y’akihuliire, aho n’aho nauwe akasorooza ebigaali bye eby’obulemu hamu n’ihe lye bayesoroleza omu kihanga. Debora yagambira Baraka ati: ‘Kiro kinu Yahwe arakuha obusinguzi.’ Baraka n’abasaija be 10,000 bakatandika kusirimuka kuruga ha rusozi nukwo barwanise ihe ly’amaani erya Sisera.

Yahwe akaletera amaizi g’ekyambu kya Kisoni kusandaara. Ebigaali by’obulemu eby’ihe lya Sisera bikakwatira omu bisaabu kandi Sisera akarugamu y’atandika kwiruka. Baraka n’ihe lye bakasingura ihe lya Sisera, baitu uwe Sisera akairuka! Akairuka yayesereka omu hema y’omukazi arukwetwa Yayeri. Omukazi onu akaha Sisera amata yanywa hanyuma yamusweka na bulangiti. Omusaija onu akagwijagira habwokuba akaba ajwahire muno. Kandi Yayeri akasobasoba yamudubura n’omusumaali gw’eheema omu mutwe yamwita.

Baraka akaija n’aserra Sisera. Yayeri akaturuka kuruga omu heema ye yamugambira ati: ‘Tahamu. Ninyija kukwoleka omusaija ow’orukuserra.’ Baraka akatahamu yasanga Sisera abyamire hansi afiire. Baraka na Debora bakahaisaniza Yahwe habw’okukonyera Abaisareri kusingura abanyanzigwa babo. Emyaka 40 eyahondiireho, Abaisareri bakaikara baine obusinge.