YOSIYA akaba aine emyaka munana yonka ey’obukuru obu yafokere omukama w’obukama obw’enganda ibiri ezomu masirimuka. Onu akaba ali muto muno okufooka mukama. Omukubanza, abantu abamu abakuru bakamukonyera okulema ihanga.

Yosiya obu yamazire emyaka musanju nalema, akatandika kuserra Yahwe. Akakuratira ekyokurorraho ky’abakama abarungi nka Daudi, Yehosafati na Hezekiya. Baitu akaba akyali musigazi obu yakozire ekintu eky’obumanzi.

Abaisareri baali bamazire obusumi bwingi nibakora ebibi. Baali nibaramya baruhanga b’ebisuba n’okwinamira ebisisani. Nukwo Yosiya yagenzire n’abasaija be, okutandika kwihiramu kimu okuramya okw’ebisuba omu nsi, gunu gukaba mulimu gw’amaani muno habwokuba abantu baingi bakaba nibaramya baruhanga ab’ebisuba. Nosobora kurora Yosia n’abasaija be nibasasangura ebisisani.

Hanyuma, Yosiya akakoma abasaija basatu okusemeza yekaru ya Yahwe. Sente zikasorozebwa kuruga omubantu okusasura abasaija banu habw’omulimu ogukaba gukozirwe. Obu bakaba nibasemeza omu yekaru, nyakatagara omukuru Hirikiya akazoora ekintu ky’omugaso muno. Ekintu kinu kikaba kitabu kyonyini ekyebiragiro bya Yahwe, Musa ebyakaba ahandikire ira muno. Kikaba kibuzire kumara obusumi.

Ekitabu bakakitwarra Yosiya, nukwo kusaba bakimusomeremu. Obu yahulirize, Yosiya aketegereza ngu abantu bakaba batarukukuratira ebiragiro bya Yahwe. Akahurra kubi muno nukwo okutagura ebijwaro bye nkoku orukurora. Akagamba ati: ‘Yahwe atubihirirwe muno habw’abaisitwe obutalinda ebiragiro ebihandiikirwe.’

Yosiya akaragira nyakatagara omukuru Hirikiya okuserra kiki Yahwe ekyakaba nagenda kubakora. Hirikiya akagenda owa Hulida omukazi ayabaire murangi, yamukaguza. Akamuha obukwenda kuruga hali Yahwe okubutwarra Yosiya. Bukaba nibugamba buti: ‘Yerusalemu n’abantu baamu boona nibagenda kufubirwa habw’okuramya baruhanga ab’ebisuba n’ensi okwijura obubi. Baitu habwokuba iwe, Yosiya okozire ebirungi, ekifubiro kiriija hanyuma y’okufa kwawe.’