LOTI n’amaka ge baikaraga na Iburahimu omu nsi ya Kanani. Kiro kimu, Iburahimu akagambira Loti ati: ‘Obunyansi tiburukumara amagana gaitu. Nkwesengerize twahukane. Iwe obworagya habumoso, nyowe ndagya ha bulyo.’

Loti obu yarozire ensi, yarora ekicweka ekimu okuba kirungi muno, kiine amaizi, n’obunyansi oburungi ha bw’ebisoro bye. Kinu kikaba Kicweka kya Yorudani. Nuho, Loti n’amaka ge hamu n’ebisoro bye bafurukiire. Hanyuma ya byoona batandikira kimu kwikara omu rubuga rwa Sodomu.

Abantu abomu Sodomu baali babi muno. Kinu kikatuntuza muno Loti habwokuba uwe akaba ali musaija murungi. Na Ruhanga kitamusemeze. Hampero, Ruhanga akatuma bamaraika kugambira Loti ngu akaba nagenda kuhwerekereza Sodomu hamu n’orubuga orukaba ruruheriire orwa Gomora habw’obubi bwazo.

Abamaraika bakagambira Loti bati: ‘Rahuka! Twaara mukazi waawe n’abahara bawe babiri oruge hanu!’ Baitu Loti nab’omuka ye bakaba nibekerereza, nukwo bamaraika kubakwata ha mikono n’okubaturukya omu rubuga. Baitu maraika omu akabagambira ngu: ‘Mwiruke okukiza obwomezi bwanyu! Kyonka mutarora enyuma. Mwirukire omu nsozi nukwo muleke okufa.’

Loti n’abahara be bakahurra ekiragiro kinu bakairuka kuruga omu Sodomu batemeriire nakake kandi batarole enyuma. Baitu omukazi wa Loti atahurre. Obu bakaba bagenzireho ekicweka kuruga omu Sodomu, muka Loti akemerra yarora enyuma. Mu kaanya ako akafooka empagi y’ekisura. N’osobora kumurora omu kisisani?

Mu kinu nitusobora kwegamu eisomo erirungi. Nikyoleka ngu Ruhanga ajuna abo boona abamworobera, kyonka abo abatamuhurra balifeerwa obwomezi bwabu.