MUSA akaba agendiire kimu ha rusozi orwa Holebu okuserurra entaama ze obunyansi. Hanu akarora ekisaka kiroho omurro, baitu kikaba kitarukusiriira!

‘Ekintu kinu kanikihuniriza muno,’ nukwo Musa yatekerize. ‘Ati kanyirre haihi nukwo nyetegereze kurungi.’ Obu yakikozire, iraka likaruga omu kisaka nirigamba ngu: ‘Otairra haihi. Oihemu enkaito mubigere byawe habwokuba nambere oyemeriire harukwera.’ Ruhanga nuwe akaba nagamba naraba omu maraika, nahabwekyo Musa yayesweka h’amaiso.

Ruhanga akagamba: ‘Baitu ndozire emihito y’abantu bange omu Misiri. Ningenda kubajuna kandi niwe ndukugenda kutuma kwebembera abantu bange kubaiha Misiri.’ Yahwe akaba nagenda kwiha abantu be kuruga Misiri n’okubaleeta mu nsi enungi eya Kanani.

Baitu Musa akagamba: ‘Ninyowe oha. Nsobora nta kukora ekintu kinu? Kakuba ngenda h’Abaisareri. Nibaija kunkaguza bati: “Noha akutumire? Ndibagarukamu nta?”

‘Kinu nikyo olibagambira,’ Ruhanga yagarukamu. ‘YAHWE, Ruhanga wa Iburahimu, Ruhanga owa Isaka, Ruhanga owa Yakobo nuwe antumire hali inywe.’ Kandi Ruhanga akongeraho ati: ‘Eri niryo ibara lyange ebiro byona.’

Musa yagarukamu ati: ‘Baitu kakuba batanyikirize obu ndabagambira ngu niwe ontumire.’

Ruhanga yamukaguza ati: ‘Kiki ekiri omu mukono gwawe?’

Musa yagarukamu ati: ‘Mwigo.’

Ruhanga yamugambira ati: ‘Gunage hansi.’ Obu Musa yakikozire, omwigo gwafooka enjoka. Yahwe akoleka Musa ekyamahano ekindi. Akamugamba: ‘Ta omukono gwawe omunda y’ekijwaro kyawe.’ Musa obu yakikozire, kandi obu yagwihireyo gwona gwaali nigwera nk’ebirika! Omukono gukazooka gwine oburwaire obubi muno oburukumanywa nk’ebigenge. Yahwe akaha Musa amaani kukora ekyamahano ekyakasatu. Hamperu akamugambira ngu: ‘Obu orakora ebyamahano binu byoona, Abaisareri nibaija kwikiriza ngu nkutumire.’

Hanyuma ya binu, Musa akagenda omuka yagambira Yesero: ‘Nkwesengerize leka ngende hali abanyabuzaale bange ab’omu Misiri ndole nkoku bali.’ Nahabwekyo Yesero akaraga Musa, na Musa akatandikiraho orugendo rwe okugaruka Misiri.