EKIKAGUZO 9
Nsemeriire Kwikiriza Ngu Ebintu Bitahangwe?
WAKUKOZERE KI?
Tekerezaaho kinu: Alex ali omu biteekerezo. Akuzire n’aikiririza omu Ruhanga kandi n’akigumya ngu nuwe yahangire ebintu byona. Kyonka hati omwegesa we abegeseze ngu okusigikirra ha kuseruliriza okwakozerwe abanyasayansi, ebintu bitahangwe. Alex akutiina kwahukana hali bagenzi be. Ateekereza, ‘abanyasayansi obu baraaba baine obukaiso oburukwoleka ngu ebintu bitahangwe, ninywowe oha okubahakaniza?’
Kakuba niwe Alex, wakwikirize ngu ebintu bitahangwe habwokuba ebitabu bya sayansi nukwo byegesa?
TEKEREZA HALI KINU!
Emirundi erukukira obwingi, abantu abagamba ngu ebintu bitahangwe n’abo abagamba ngu bikahangwa kibanguhira kugambira abandi ekibaikiriza gonze batarukusobora kusoborra ebibarukwikiriza.
-
Abantu abamu bagamba ngu ebintu bikahangwa habwokuba nukwo bayegesiibwe omu madiini gaabo.
-
Abantu abandi bagamba ngu ebintu bitahangwe habwokuba nukwo bayegesiibwe ha isomero.
EBIKAGUZO MUKAAGA EBYOKUTEREZAAHO
Baibuli n’egamba ngu: “Baitu enju yona eyombekwa omuntu, baitu ayayombekere byona nuwe Ruhanga.” (Abaheburaniya 3:4) Ky’amagezi okwikiririza omu kintu nk’ekyo?
Kugamba ngu ebintu bitahangwe kuba nk’okugamba ngu enju enu busaho omuntu ayagyombekere
ABAMU BAGAMBA: Ebintu byona omu nsi bikabaho hanyuma y’okuhuliika okw’amaani.
1. N’oha ayalesereho okuhuliika kunu?
2. Kiraha ekyangu ky’okwiriza—ngu ebintu bikaijaho bwijaho rundi biine ayabihangire?
ABAMU BAGAMBA: Abantu bakaruga omu bisoro.
3. Abantu obu baraaba barugire omu bisoro—nk’ebikuya—habwaki haroho embaginiza y’amaani ha magezi g’abantu n’ag’ebikuya?
4. Habwaki n’obuntu obutaito muno nk’obutafaali obuba omu bintu byona ebyomeezi buhuniriza omulingo bukoramu?
ABAMU BAGAMBA: Haroho obukaiso oburukugumya ngu ebintu bitahangwe.
5. Ogu arukukugambira ebintu binu ayekoliire okuseruliriize okwe akakigumya ngu mali nukwo kiri ebintu bitahangwe?
6. Okimanyire ngu abantu baingi baikiririza omu nyegesa enu habwokuba babagamba ngu abantu boona abasomere bagikiririzaamu?
“Kakuba oba n’orubata omu kibira okasangayo enju enungi, osobora kugamba ngu emiti ekagwa yayepanga kurungi hanyuma harugamu enju egyo?’ Tikirukusoboka! Tikihikire n’okukitekerezaaho. Hati, tusobora tuta kugamba ngu ebintu bikabaho bubaho byonka bitahangirwe?”—Julia.
“Kakuba omuntu akugamba ngu omw’ikolero ly’ebitabu elimu ekyoma ekimu kikahulika erangi ekozesebwa omu kuteera ebitabu lyamaisukira ebisiika n’ibbati. Ekyarugiremu, niyo katondogorozi enu eyorukurora. Wakumwikiriize mali?”—Gwen.
HABWAKI TUSEMERIIRE KWIKIRIRIZA OMULI RUHANGA?
Baibuli etuterera kukozesa ‘amagezi.’ (Abarumi 12:1) Kinu nikimanyisa ngu titusemeriire kwikiriza bwikiriza ngu Ruhanga aliyo
-
HABW’ENYEHURRA YAITU (Ninteekereza haina kuba haliyo ogu aina obusobozi ha bintu byona)
-
HABW’ABANDI (Ninyikara omu kiikaro ekurumu abanyadiini)
-
HABW’OKUTIINA ABANDI (Bazaire bange bakanyegesa okwikiririza omu Ruhanga—nkaba ntaine eky’okukora)
Osemeriire kuba n’ensonga enungi ezikuletetea okwikiririza omu Ruhanga.
“Omwegesa obwaba n’ayegesa omulingo emubiri yaitu ekoramu, tinsigara n’okugurukyagurukya ngu mali Ruhanga aliyo. Buli kicweka ha mibiri yaitu kiine omugaso gonze tutasobora kurora omulingo ebicweka ebyo bikoramu. Ruhanga akahanga omubiri gw’omuntu omu mulingo ogurukuhuniriza!”—Teresa.
“Obundora ekyombeko kya kaina, emeeri, rundi emotoka, nyekaguza n’oha ayabikozere? Nk’ekyokurorraho, bakalimagezi bateraniza ebyoma bingi kusobora kukora emotoka. Nahabwekyo, nk’oku emotoka ziina abazikora, n’abantu baina kuba baina ayabahangire.”—Richard.
“Obunayeyongiire kwega hali sayansi nkeyongera kirora ngu enyegesa ngu ebintu bitahangwe tehikire. Ninkirora kurungi hati ngu omuntu aina kuba n’okwikiriza kw’amaani kusobora kwikiriza ngu ebintu bitahangwe kukira okw’akwetaaga kwikiriza ngu bikahangwa.”—Anthony.
TEKEREZA HALI KINU!
N’obukiraaba ngu aba sayansi bamazire emyaka nyingi nibaseruliiriza, na gunu gujwa bakyalemerwe kusoborra nkoku ebintu by’abaireho. Aba sayansi abarukwetwara nk’aba magezi obu baraaba nibehakaniza boonka ha mulingo ebintu byaizireho, oba otakozere ensobi okubagurukyagurukya?
Nosobora Kugonza na Binu;
EBITEKEREZO KURUGA OMU BAGENZI BAWE
Ky’Amagezi Kwikiririza Omuli Ruhanga?
Huliiriza ensinganto babiri abaali nibagurukyagurukya Ruhanga obwaraaba aroho n’omulingo baagumize okwikiririza kwabo.
