Teramu akasisani: Julia obwayerora omu ndolerwamu, arora ali mukooto muno n’obukiraaba ngu bazaire be n’abanywani be baikara nibamugamba ngu ali mutaito. Aikara n’aijwamu ekitekerezo ngu: “Nyine kukehyaho omunyeto gunu.”

Ebiro eby’enyuma, Julia akaijwamu ekiteekerezo kukora kyona ekirukusoboka hakire kukehya “kilo 2” ha munyeto gwe, n’obukiraaba nikyetaagisa kumara ebiro atarukulya . . .

Kakuba obaire oli Julia, wakukozere ki?

Tikiri kibi kugonza kuzooka kurungi. Baibuli ebazaaho abakazi n’abasaija abaali nibazooka kurungi, nka Sara, Rakeri, Abigairi, Yusufu, hamu na Daudi. Kandi egamba ngu Abisagi yali mukazi “murungi muno ha maiso.”—1 Bakama 1:4.

Baitu ensinganto ezirukukira obwingi zeralikirra ekihinguraine ha nzooka yabo kandi eki kikira kurugirramu ebizibu bingi. Tekerezaaho ebyokurorraho binu:

• Okuseruliiriza nikwoleka ngu abaisiki 58 ha buli 100 bateekereza ngu banyesere ekihinguraine, kandi kunu 17 ha buli 100 nubo banyesere.

• Okuseruliiriza okundi kukazoora ngu, abakazi 45 ha buli 100 bateekereza ngu banyesere ekihinguraine kandi kunu tibali bakooto!

• Ensinganto ezimu zitungire oburwaire oburukwetwa anorexia habw’okutiina kunyeta—bunu burwaire oburukuletera omuntu kutiina ekihinguraine kunyeta kandi oburukusobora kurugirramu obuceke rundi n’okufa habw’okwesiibya enjara.

 Obwaratunga obwokurorraho obw’oburwaire bunu, rundi okahurra otakyagonza kulya, tunga obukonyezi. Banza ogambireho omuzaire waawe rundi omuntu ondi weena omukuru. Baibuli egamba: “Enganjani yonyini eyoleka okugonza obwire bwona, kandi afooka mugenzi waawe omu bwire bw’obujune.”—Enfumo 17:17, NW.

Engeso zaawe nizo zisobora kuletera abantu kukugonza rundi kukunoba hatali omulingo orukuzookamu. Tekereza ha kyokurorraho kinu ekya Abusalomu arukubazibwaho omu Baibuli.

“Omu Isareri yoona, hakaba hatarumu muntu weena akaba amanyirwe kuba murungi kwingana Abusalomu. . . . akaba ataine kamogo.”—2 Samuiri 14:25, NW.

Baitu, omusigazi onu akaba aine emyehembo nyingi, n’arurukirra obulemi, kandi ali mugobya! Nahabweki, Baibuli ebazaaho kubi Abusalomu; emubazaaho nk’omuntu atarukwesigwa, kandi ow’ennobi y’amaani.

Enu niyo ensonga habwaki Baibuli etuhana eti:

‘Mujule omuntu owaira n’engeso ze, kandi mujwale omuhyaka.’—Abakolosai 3:10.

“Okwecuma kwanyu kutaba okwokuzigisa isoke okwa haruguru . . . , baitu kube kwomuntu owomunda, omu mutima.”—1 Pet 3:3, 4.

Tikiri kibi kugonza kuzooka kurungi, baitu ekintu ekitusemeriire kwebembeza niyo enyetwaza yaitu. Kinu nikiija kuletera abantu kutugonza habw’enyetwaza yaitu ennungi hatali oburungi bw’omubiri gwaitu! Omwisiki omu arukwetwa Phylicia akagamba ngu, “Abantu nibasobora kurora ngu oli murungi. Baitu ekibarukwija kukwijukaho niyo enyetwaza n’emiringo yaawe ennungi.”

Ohurra otarukugonza omulingo orukuzokamu?

Wali otekeriizeho okweyeza rundi kukora ekintu kindi kyona eky’akabi kwongera ha burungi bwawe?

Kiki ekiwakugondeze kuhindura ha mubiri gwawe kakuba wali n’osobora? (Komamu ekirukukwataho.)

• OBURAIRA

• ENSIKA

• ISOKE

• OBUKOOTO

• HA MAISO

• ERANGI Y’OMUBIRI

Ebikaguzo bibiri ebirukubanza obworaaba obigarukiremu ngu ego, kandi wakomamu ebintu bisatu omu kikaguzo ekyakasatu, kinu nikyo osemeriire kumanya: Abantu nibasobora kuba batarukukurora kubi nk’oku orukwerora. Kandi kinu nikyoleka ngu n’osobora kukora ebintu eby’akabi habw’okweralikirra muno omulingo ogw’orukuzokamu.—1 Samuiri 16:7.